ދިވެހިރާއްޖޭގެ އެކި ކަންކޮޅުތަކުގައި ކުރިމަތިވާ ކާރިސާތަކާއި އެމަރޖެންސީ ހާލަތްތަކުގައި، ރައްޔިތުންނަށް ބޭނުންވާ އިންސާނީ އެހީތެރިކަން ފޯރުކޮށްދިނުމުގައި ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ، އެންޑީއެމްއޭއިން އިސްސަފުގައި ހަރަކާތްތެރިވެ، އަންނަނީ ނަމޫނާ މަސައްކަތްތަކެއް ކުރަމުންނެވެ.
ވޭތުވެދިޔަ އަހަރުތަކުގައި ރާއްޖޭގެ އެކި ސަރަހައްދުތަކަށް ކުރިމަތިވި އަލިފާނުގެ ހާދިސާތަކާއި، ފެންބޮޑުވުމުގެ ހާދިސާތަކުގައި އެންޑީއެމްއޭގެ ރެސްޕޮންސް ކޯޑިނޭޝަން ޓީމުން ވަނީ ރެޔާއި ދުވާލު ބުރަ މަސައްކަތްތަކެއް ކޮށްފައެވެ. ވަކިން ޚާއްސަކޮށް، ކާރިސާތަކުގެ ސަބަބުން ގެދޮރާއި ބޯހިޔާވަހިކަން ގެއްލުނު އާއިލާތަކަށް އިންސާނީ އެހީތެރިކަން ފޯރުކޮށްދިނުމުގައި، ޤައުމުގެ ފުރަތަމަ އިޖާބަދޭ މުއައްސަސާތަކާ ގުޅިގެން އެ އޮތޯރިޓީން ވަނީ ފާހަގަކޮށްލެވޭ ފަދަ އޯގާތެރި އަދި ފަންނީ ޚިދުމަތްތަކެއް ފޯރުކޮށްދީފައެވެ.
އެންޑީއެމްއޭއިން ފާހަގަކުރި ގޮތުގައި، އެ އޮތޯރިޓީގެ ރެސްޕޮންސް ކޯޑިނޭޝަން ޓީމަކީ އަދަދުގެ ގޮތުން މަދު ބައެއް ނަމަވެސް، އެ ޓީމުގެ ބާރަކީ މީހުންގެ ގިނަކަމެއް ނޫނެވެ. އޭގެ ބަދަލުގައި އެއީ މެންބަރުންގެ މެދުގައި އޮތް ބަދަހި އެއްބައިވަންތަކަމާއި، އިޚްލާޞްތެރިކަމާއި، އެއް މަގްސަދެއްގައި ކުރާ ހިތްވަރުގަދަ މަސައްކަތެވެ. މިއީ ރައްޔިތުންގެ ފުރާނައާއި މުދާ ރައްކާތެރިކުރުމަށް ކުރެވޭ އަގުނުކުރެވޭ ފަދަ މުހިންމު ޚިދުމަތެކެވެ.
"ކޮންމެ ކާރިސާއެއްގެ ހާލަތެއްގައިވެސް ފެނިގެންދަނީ ދިވެހިންގެ މެދުގައި އޮތް އެއްބައިވަންތަކަމުގެ ނަމޫނާ. ރަށު ކައުންސިލްތަކާއި، އާންމު ރައްޔިތުންނާއި އެހެނިހެން އިދާރާތަކާއެކު އޮތް ގާތް ގުޅުމުގެ ސަބަބުން، ހާލުގައި ޖެހޭ ފަރާތްތަކަށް ވަގުތުން އެހީތެރިކަން ފޯރުކޮށްދިނުމުގެ ނިޒާމު ވަނީ އިތުރަށް ވަރުގަދަވެފައި." އެންޑީއެމްއޭގެ މަސައްކަތްތަކާ ގުޅޭގޮތުން ނެރުނު ބަޔާނުގައިވެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ގެންގުޅުއްވާ "ވިލުންތެރި ރާއްޖެއެއް" ބިނާކުރުމުގެ ތަސައްވުރު ހަގީގަތަކަށް ހެދުމަށް އެންޑީއެމްއޭއިން ދަނީ އަމާޒުތަކެއް ކަނޑައަޅަމުންނެވެ. އޭގެ ތެރޭގައި މުޖުތަމައުގެ ތައްޔާރީކަން އިތުރުކުރުމާއި، ރަށްރަށުގެ ގާބިލުކަން ހަރުދަނާކުރުމާއި، ކާރިސާތަކުން ލިބޭ ގެއްލުންތައް ކުޑަކުރުމުގެ މަސައްކަތްތައް މުޅި ރާއްޖެއަށް ފުޅާކުރުން ހިމެނެއެވެ.
އެންޑީއެމްއޭގެ ކޮންމެ މެންބަރަކީވެސް އިސްސަފުގައި ވިޔަސް ނުވަތަ ފަހަތުގައި ތިބެގެން ރޭވުންތެރިކަމާއެކު މަސައްކަތްކުރުމުގައި ވިޔަސް، ރައްޔިތުންނަށް އުންމީދު އާކޮށްދޭ ބައެއްގެ ގޮތުގައި އެ އޮތޯރިޓީން ފާހަގަކުރެއެވެ. އަދި ކުރިމަތިވާ ކޮންމެ ގޮންޖެހުމަކާއެކުވެސް، މުޖުތަމައުތައް ބާރުވެރިކުރުވައި، ވިލުންތެރި ޤައުމެއްގެ ގޮތުގައި ރާއްޖެ ދެމިއޮތުމަށް ކުރާ މަސައްކަތުގައި އެ އޮތޯރިޓީން ސާބިތުކަމާއެކު ދެމިއޮންނާނެ ކަމުގެ ޔަގީންކަން ވަނީ ދީފައެވެ.