އިރާއި ހަނދަކީ މާތް ﷲގެ ކުޅަދުންވަންތަކަން ދައްކައިދޭ ވަރަށް ވަރުގަދަ ދެ ދަލީލުކަމުގައި މައުމޫން ފައުންޑޭޝަންގެ ޗެއާމަން އަދި ކުރީގެ ރައީސުލްޖުމްހޫރިއްޔާ އަލްއުސްތާޛް މައުމޫން އަބްދުލްގައްޔޫމް ވިދާޅުވެއްޖެ އެވެ.
ރަމަޟާން މަހުގެ ރޭތައް އިޚްޔާ ކުރުމުގެ ގޮތުން މައުމޫން ފައުންޑޭޝަންގެ ފަރާތުން އިންތިޒާމްކޮށްގެން ރޭ އިސްލާމީ މަރުކަޒުގައި ބޭއްވެވި ޖަލްސާގައި ވާހަކަފުޅު ދައްކަވަމުން، ރައީސް މައުމޫން ވިދާޅުވީ ތަބީއީ މާހައުލުގައިވާ ތަކެތީގެ ތެރެއިން އިންސާނުންގެ ހަޔާތަށް އެންމެ ބޮޑު އަސަރެއްކުރާ ދޭއްޗަކީ އިރާއި ހަނދެވެ. އަދި ދުނިޔޭގައި އިންސާނުންގެ ދިރިއުޅުމުގެ ނިޒާމް ބިނާވެފައި އޮންނަނީ ރޭދުވާ ބަދަލުވުމުގެ މައްޗަށާއި އަހަރު ތެރޭގައި މޫސުމަށް އަންނަ ބަދަލުތަކުގެ މައްޗަށް ކަމަށެވެ.
މައުމޫން ވިދާޅުވީ މިކަންކަމަކީ ބިން އޭގެ އަމިއްލަ ނަފްސުގެ ވަށައިގެން ދައުރުކުރާ ކުރުމާއި ބިން އިރުގެ ވަށައިގެން ދައުރުކުރާ ކުރުމުގެ ސަބަބުން ވަމުން އަންނަ ކަމެއް ކަމަށެވެ. އަދި ދީނުގެ ފަރުލުތައް އަދާކުރުމާއި، ރޯދަ މަހު ރޯދަހިފުމާއި، ހައްޖުގެ ދުވަސްތައް ކަނޑައެޅުމުގައި ވެސް އަޅުގަނޑުމެން ބަލަންޖެހެނީ އިރާއި ހަނދާއި ބިން ހަރަކާތްތެރިވަމުންދާ ގޮތުގެ މައްޗަށް ކަމުގައި މައުމޫން ވިދާޅުވި އެވެ.
ރޭގެ ޖަލްސާގައި "ކީރިތި ޤުރްއާނުގެ އަލީގައި އިރާއި ހަނދު" މި މައުޟޫއުގެ މައްޗަށް ރައީސް މައުމޫން ދެއްކެވި ވާހަކަފުޅުގައި ކީރިތި ޤުރްއާނުން ދަލީލު ދައްކަވަމުން އެމަނިކުފާނު ވިދާޅުވީ އިރާއި ހަނދަކީ މާތް ﷲގެ ކުޅަދުންވަންތަކަމުގެ ދަލީލުތަކަކަށް ވުމުގެ އިތުރުން އެއީ އަހަރުތަކާއި ދުވަސްތަކުގެ ހިސާބު ބެލުމަށް އިންސާނުންނަށްޓަކައި މާތް ﷲ ލައްވާފައިވާ ދެ ވަސީލަތްކަމުގަ އެވެ.
ރޯދަ މަހުގެ ރޭތައް އިޙްޔާކުރުމުގެ ގޮތުން ރޭ މައުމޫން ފައުންޑޭޝަންގެ ފަރާތުން ބޭއްވި ޖަލްސާގައި އުސްތާޛުއްޝައިޚް މުހައްމަދު ރަޝީދު އިބްރާހީމް ވެސް ވާހަކަފުޅު ދެއްކެވި އެވެ. ސައިޚް ރަޝީދު ވާހަކަ ދެއްކެވީ "ދުއާކުރުމުގެ މާތްކަން" މި މައުޟޫއުގެ މައްޗަށެވެ. ކީރިތި ޤުރްއާނާއި ކީރިތި ރަސޫލާގެ ސުންނަތުން ދަލީލު ދައްކަވަމުން، ސައިޚުގެ ވާހަކައިގައި ދުއާ ކުރުމުގެ މާތްކަމާއި، ދުއާ ކުރުމުގެ އަދަބުތަކާއި، ދުއާ އިޖާބަކުރެއްވުމަށް މަގުފަހިކޮށްދޭ ކަންތައްތަކާއި ދުއާ ކުރުމަށް އެންމެ މޮޅު ވަގުތުތައް ތަފްސީލުކޮށް ބަޔާންކޮށްދެއްވި އެވެ.