މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމާބެހޭ ފަންނީ ކޮމިޓީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އަލުން އެކުލަވާލައްވައިފިއެވެ.
އެ ކޮމިޓީގެ ޗެއާމަނަކަށް ހަމަޖައްސަވާފައިވަނީ، މިނިސްޓަރ އޮފް ފޮރިން އެފެއާޒް ޑޮކްޓަރު މުޙައްމަދު ޢާޞިމެވެ.
ކޮމެޓީގެ މެމްބަރުންނަށް އައްޔަން ކުރެއްވީ ، މާފަންނު ދާޝިން ޑރ.އިބްރާހީމް ޒަކަރިއްޔާ މޫސާއާއި، މާފަންނު އެމޭޒަން ޑރ.މަރްޔަމް ސުޒީ އާދަމާއި، މައްޗަންގޮޅީ ވިލާރޮދި ޢާއިޝަތު ޝާހީނާއި، މާލެ ވިލިނގިލީ އަކީލާ ޑރ.ޢަބްދުލްޢަޒީޒް ޔޫސުފެވެ.
މަތީ ދަރަޖަ ހޯދާ ފަރާތްތަކަށް އިނާމުދެނީ ރާއްޖެއަށް ރީތި ނަން ހޯދައިދޭ ފަރާތްތަކަށް ހިތްވަރުދީ އަގު ވަޒަން ކުރުމުގެ ގޮތުންނެވެ.
މިއަހަރުގެ ޚާއްޞަ އިނާމު ދެއްވުމަށް ހަމަޖައްސަވާފައިވަނީ މިނިވަން ދުވަހުގެ މުނާސަބަތުގައި ބާއްވަވާ ރަސްމިއްޔާތުގައެވެ.