ހޯމް މިނިސްޓަރު އުމަރު ނަސީރުގެ މައްޗަށް ކުރާ އަމުރަށް ނުކިޔަމަންތެރި ވުމުގެ ކުށުގެ ދައުވާގެ ޝަރީއަތަށް، އޭނާ ބަންދުގައި ބަހައްޓައިގެން ކޯޓަށް ހާޒިރު ކުރުމަށް ނެރެފައިވާ އަމުރާ އެއްގޮތަށް އަމަލުކުރާނެ ކަމަށް ޕޮލިސް ކޮމިޝަނަރު ހުސެން ވަހީދު މިއަދު ވިދާޅުވެއްޖެ އެވެ. "ފުލުހުންގެ މައްޗަށް ކޯޓުން ކޮށްފައިވާ އަމުރާ އެއްގޮތަށް، އިރާދަކުރެއްވިއްޔާ އުމަރު ކޯޓަށް ހާޒިރުކޮށްދޭނަން،" ޕޮލިސް ކޮމިޝަނަރު "ހަވީރަށް" ވިދާޅުވި އެވެ. ފުލުހުންގެ މައްޗަށް ކްރިމިނަލް ކޯޓުން އަމުރު ކޮށްފައި ވަނީ މާދަމާ 11:00 އަށް އުމަރު ކޯޓަށް ހާޒިރުކޮށްދިނުމަށެވެ. އުމަރު ބަންދުކުރަން އަމުރު ނެރުނީ އެ މައްސަލައިގެ ޝަރީއަތުގެ ދެ އަޑުއެހުމަކަށް އުމަރު ހާޒިރުވެ ވަޑައިނުގެން ވަނިކޮށް ތިން ވަނަ އަޑުއެހުމަށް ހާޒިރު ނުވެއްޖެ ނަމަ އުމަރާ މެދު ފިޔަވަޅު އަޅުއްވާނެކަމުގެ އިންޒާރު ގާޒީ އަބްދުﷲ ދީދީ ދެއްވުމަށްފަހު އެވެ. ގާޒީ އަބްދުﷲ ދީދީ ވިދާޅުވެފައިވާ ގޮތުގައި ދަތުރަށް ފުރައި ވަޑައިގަންނަވަންޖެހޭނީ ކޯޓަށް ހާޒިރުވުމުގެ އަމުރާ ހަވާލުވުމަށް ފަހު ކަމަށް ގަބޫލު ނުކުރައްވާ ކަމަށެވެ. އެންމެ ފަހުން ޝަރީއަތް ތާވަލްކުރި ދުވަހު އުމަރު ހުންނެވީ ރަސްމީ ދަތުރުފުޅެއްގައި ނެދަލެންޑްސްގަ އެވެ. އެ ދަތުރުފުޅަށް ފަހު އުމަރު މިއަދު ވަނީ މާލެ ވަޑައިގެންފަ އެވެ. އުމަރުގެ މައްޗަށް ދައުލަތުން ދައުވާކުރަނީ ކުރީގެ ރައީސް މުހައްމަދު ނަޝީދުގެ ސަރުކާރުގެ ދުވަސްވަރު އޭރުގެ އިދިކޮޅު ފަރާތްތަކުން ކުރި މުޒާހަރާއެއްގައި ރާއްޖޭގެ އަމަން ކަމަށް ގެއްލުމެއް ލިބިދާނެ ފަދަ ވާހަކަ އުމަރު ދެއްކެވި ކަމަށް ބުނެއެވެ. ނަމަވެސް އެ ދައުވާއަށް އުމަރު އިންކާރު ކުރައްވަ އެވެ.