ޕީޕީއެމްގެ ރިޔާސީ ޕްރައިމަރީގައި ނެގޭ ވޯޓަކީ އަމާނާތްތެރިކަމާއި ކޮރަޕްޝަނާ ދެމެދު ނެގޭ ވޯޓެއް ކަމަށް އެ ޕްރައިމަރީގައި ވާދަކުރައްވާ އުމަރު ނަސީރު ރޭ ވިދާޅުވެއްޖެ އެވެ.
އުމަރު އެގޮތަށް ވިދާޅުވީ ރިޔާސީ ޕްރައިމަރީ ކާމިޔާބު ކުރެއްވުމަށް އޭނާ ކުރައްވަމުން ގެންދެވި ކެމްޕެއިން ނިންމާލުމަށް ވިލިމާލޭ މުހިއްޔުއްދީން ސްކޫލުގައި ބޭއްވި ޖަލްސާގައި ވާހަކަ ދައްކަވަމުންނެވެ. ޕީޕީއެމް ރިޔާސީ ޕްރައިމަރީގެ ވޯޓު ލުން މިއަދު ވަނީ ފަށައިފަ އެވެ.
އުމަރު ވިދާޅުވީ އެ ވާދަވެރިކަމަކީ އޭނާ އާއި އަނެއް ވާދަވެރިޔާ އަބްދުﷲ ޔާމީނާ އޮތް ވާދަވެރިކަމެއް ނޫން ކަމަށާއި އަދި އެ ވާދަވެރިކަމަކީ އަމާންކަމާއި އިގްތިސާދާއި ދެމެދު އޮތް ވާދަވެރިކަމެއް ވެސް ނޫން ކަމަށެވެ. އެއީ ކޮރަޕްޝަނާއި އަމާނާތްތެރިކަމާ ދެމެދު އޮތް ވާދަވެރިކަމެއް ކަމަށް އުމަރު ވިދާޅުވި އެވެ. އޭނާ ވިދާޅުވީ ކޮރަޕްޝަނާއި ދެކޮޅަށް އޭނާގޭ ޓީމުން ތެދުވުމާއެކު ކޮރަޕްޝަންގެ "ކިއްލާތަކަށް ބިންގަނޑު ގުޑާފައިވާ" ކަމަށެވެ. އެ ކެމްޕެއިން ފެށުނީ އަމާންކަމާއި އިގްތިސާދުން ކަމަށްވި ނަމަވެސް ކެމްޕެއިން ނިމިގެންދަނީ ކޮރަޕްޝަނާއި އަމާނާތްތެރިކަމުން ކަމަށް އޭނާ ވިދާޅުވި ކަމަށެވެ.
"އަޅުގަނޑުމެން ކޮރަޕްޝަން ފުނޑުފުނޑުކޮށްލުމަށްޓަކައި އަމާނާތްތެރިކަމުގެ ދަންމަރު ހިފައިގެން އަޅުގަނޑުމެން މި ކެމްޕެއިންގައި ހިނގައިގަތީމާ ކޮރަޕްޝަންގެ ކިއްލާތަކުގެ ބިންގަނޑާއެކު ގުޑައިފި، ކޮރަޕްޝަންގެ ކަނޑުތައް ކެކެން ފަށައިފި، އެތަން މިތަނުގަ ތިބި ބޮޑެތި ސިންގާ ކޮރަޕްޓް މީހުން، ރައްޔިތުންގެ މަޖިލީހުގެ އިނާޔަތުގެ ބިލްގެ ފަހަތަށް ވަދެ ފިލާ ތިބި މީހުންތައް އެންމެން އެއް ކުޑައެއްގެ ދަށަށް ޖަމާވެއްޖެ،" އުމަރު ވިދާޅުވި އެވެ.
ޔާމީނަށް ނިސްބަތް ކުރައްވައި އުމަރު ވިދާޅުވީ ޔާމީނަށް ރިޔާސީ ޓިކެޓް ލިބިއްޖެނަމަ ކުރިއަށް އޮތް ރިޔާސީ އިންތިހާބު ކާމިޔާބު ނުކުރެވިދާނެކަމުގެ ބިރު އެބައޮތް ކަމަށާއި ސަބަބަކީ ޔާމީނަކީ ކޯލިޝަން ހައްދަވަން ބޭނުންފުޅުނުވާ ބޭފުޅަކަށްވާތީ ކަމަށެވެ. ނަމަވެސް ކޯލިޝަން ނަހަދާ އިންތިހާބަށް ނިކުތުމުގެ ހިތި ނަތީޖާ 2008 ވަނަ އަހަރު އިންތިހާބުގައި ޑީއާރްޕީން ތަޖުރިބާކޮށްފައިވާ ކަމަށާއި އެހެންކަމުން އެކަން ދެން އިތުރަށް ތަކުރާރުވެގެން ނުވާނެ ކަމަށެވެ.
"މާދަމާގެ ވޯޓު އަޅުގަނޑުމެންގެ ވާދަވެރިޔާ އަށް ތިބޭފުޅުން ދެއްވައިފިއްޔާ 2013 އިންތިހާބު ޕީޕީއެމަށް ގެއްލޭނެ ކަމަށް އަޅުގަނޑު ވަރަށް ޔަގީންކަމާއެކު ދަންނަވަން. ސަބަބަކީ އަޅުގަނޑުގެ ވާދަވެރިޔާ ބޭނުމެއް ނުވޭ ކޯލިޝަން ހައްދަވާކަށް، އަޅުގަނޑުގެ ވާދަވެރިޔާ ބޭނުންފުޅުވަނީ އެކަނިމާއެކަނި ވަޑައިގަންނަވަން، އެކަނިމާއެކަނި ދަތުރުކުރުމުގެ ނަތީޖާ 2008 ވަނަ އަހަރު ޑީއާރްޕީ ވަނީ ދެކިފައި. މިއީ އަލުން ޓެސްޓްކުރަންޖެހޭ ފޯމިއުލާއެއް ނޫން. މިއީ ޓެސްޓް ކުރެވިފައި އޮތް ފޯމިއުލާއެއް،" އުމަރު ވިދާޅުވި އެވެ.
ރޭގެ ޖަލްސާގައި އުމަރަށް ތާއީދުކުރާ ބައެއް މަޖިލިސް މެމްބަރުންނާއި ކުރީގެ މިނިސްޓަރު އިލްޔާސް އިބްރާހިމް ވެސް ބައިވެރިވެ ވަޑައިގަތެވެ.