ރައީސުލްޖުމްހޫރިއްޔާ ޑރ. މުހައްމަދު ވަހީދު ވަހީދު ހަސަން މަނިކުގެ ގައުމީ އިއްތިހާދު ޕާޓީގެ ނާއިބު ރައީސް ކަމަށް މެލޭޝިއާ އަށް ކަނޑައަޅުއްވާފައި ހުންނަވާ ހައި ކޮމިޝަނަރު ނަޒާކީ މުހައްމަދު ޒަކީ ހަމަޖައްސައިފި އެވެ.
ސަން އޮންލައިލަނަށް މިއަދު ދެއްވި އިންޓަވިއުއެއްގައި ދާތޯ ޒަކީ ވިދާޅުވީ ރޭ އޮތް ގައުމީ އިއްތިހާދު ޕާޓީގެ ކައުންސިލުން އޭނާ އެ މަގާމަށް އިންތިހާބުކޮށްފައިވާ ކަމަށާއި އެ މަގާމާ އެކު އެ ޕާޓީ ހިންގުމުގެ މަސްއޫލިއްޔަތާ ހަވާލުވެވަޑައިގެންފައިވާ ކަމަށެވެ.
ޒަކީ ވިދާޅުވީ ގައުމީ އިއްތިހާދު ޕާޓީއާ އޭނާ ގުޅިވަޑައިގަތީ މި އަހަރުގެ އެޕްރީލް މަހު އެމްޑީޕީ އިން ވަކިވެވަޑައިގަތުމަށް ފަހު މޭ މަހު ކަމަށެވެ. އަދި އެ ޕާޓީއާ ގުޅިވަޑައިގަތީ ޑރ. މުހައްމަދު ވަހީދު ހަސަންމަނިކާ އެކު މަސައްކަތް ކުރެއްވުމަކީ ފަސޭހަ ކަމަކަށް ވާތީ ކަމަށެވެ. އަދި ވިދާޅުވީ ކުރިއަށް އޮތްތަނުގައި ސަފީރުކަމުން ވަކިވެވަޑައިގެން ޕާޓީ ހިންގެވުމުގެ މަސްއޫލިއްޔަތާއިގެން ކުރިއަށް ވަޑައިގަތުމަކީ ވަރަށް ކައިރި ކަމެއް ކަމަށާއި އޭނާ ކުރައްވާ ކޮންމެ ކަމެއްގައި ވެސް ކާމިޔާބު ހާސިލުކުރެއްވުމަށް މަސައްކަތް ކުރައްވާނެ ކަމަށެވެ. އަދި ވިދާޅުވީ އެ ޕާޓީ އަށް ކުރިއެރުން ހޯއްދަވައި ދެއްވުމަށް ވެސް ހަމަ އެގޮތުގައި މަސައްކަތް ކުރައްވާނެ ކަމަށެވެ.
ގައުމީ އިއްތިހާދު ޕާޓީގެ ނާއިބުގެ މަގާމު ހުސްވީ، ކުރިން އެ މަގާމު ފުރުއްވި، އަދި އެ ޕާޓީ އުފެއްދެވުމުގައި އެންމެ އިސް ދައުރެއް އަދާކުރެއްވި، ގައުމީ ޔުނަވަސިޓީ ކުރީގެ ޗާންސެލާ ޑރ. މުސްތަފާ ލުތުފީ އެ ޕާޓީން ވަކިވެވަޑައިގަތުމުންނެވެ.