މައުލޫމާތު ހޯދާ ލިބިގަތުމުގެ ހައްޤު ނޫސްވެރިންނަށް ހަނިވެފައިވާކަމަށް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) އިން ބުނެފިއެވެ.
މިއަދު ފާހަގަކުރަމުންދާ ނޫސްވެރިކަމުގެ މިނިވަންކަމުގެ ދުވަހާއި ގުޅުވައިގެން އެޗްއާރްސީއެމް އިން ނެރެފައިވާ ބަޔާނެއްގައި ބުނެފައިވަނީ މިނިވަން ނޫސްވެރިކަމެއް ފެނިގެންދާނީ ނޫސްވެރިންނަށް ނުފޫޒުން އެއްކިބާވެ މަސައްކަތް ކުރެވޭނޭ މާހަޢުލެއް ޤާއިމްކޮށްދެވިގެން ކަމަށާއި، މިފަދަ މާހަޢުލެއް ޤާއިމުކުރުމަށްޓައި ދައުލަތުގެ ފަރާތުން ސިޔާސަތުތައް ކަނޑައަޅައި އުޞޫލުތައް ޤާއިމްކުރަންޖެހޭ ކަމަށެވެ.
މީގެ އިތުރުން ނޫސްވެރިންނަށް މަޢުލޫމާތު ހޯދައި ލިބިގަތުމުގެ ފުރުސަތު ހަމަހަމަކަމާއި ލިއްބައިދިނުމަކީ ޤާނޫއަސާސީގެ 29 ވަނަ މާއްދާއިން ކަށަވަރިކޮށްދީފައިވާ ޙައްޤެއްކަމަށާއި، މި ޙައްޤު ހަނިވަމުންދާތީ ކޮމިޝަނުން ކަންބޮޑުވާކަމަށް މި ބަޔާނުގައި ބުނެފައިވެއެވެ.
ޅަފަތުގެ ދިމިޤްރާތީ ވެރިކަމެއް އޮތް ދިވެހިރާއްޖެ ފަދަ ޤައުމެއްގައި، މިނިވަން ނޫސްވެރިކަމަކީ ޤައުމުގެ ތަރައްޤީއަށް ނުހަނު ބޭނުންވެފައިވާ އަސާސީ ޙައްޤުތަކުގެތެރޭގައި ހިމެނޭ މުހިއްމު ޙައްޤަކަށް ވާއިރު "އަދުގެ މުޖުތަމަޢުއަށް ނަޒަރު ހިންގާލާއިރު، ޚަބަރު ފަތުރާ ވަސީލަތްތަކަށް ހަމަލާ ދިނުމާއި، ނޫސްވެރިންނަށް ތަފާތު އިންޒާރުދީ ބިރުދެއްކުމާއި، ނޫސްވެރިއަކު ވީނުވީގޮތެއްނޭނގި ގެއްލިފައިވުމާ އަދި ނޫސްވެރިންގެ ފުރާނައަށް ގެއްލުންވާފަދަ ބޮޑެތި ލާއިންސާނީ ޢަމަލުތައް ހިންގަމުންދާތަން" ފެންނަ ކަމަށްވެސް މި ބަޔާނުގައި ބުނެފައިވެއެވެ.
މީގެ އިތުރުން ޒިންމާދާރު ނޫސްވެރިންތަކެއް އުފެއްދުމަށް ކަމާބެހޭ އިދާރާތަކުން މަސައްކަތް ކުރުމަށް މި ބަޔާނުގައި ގޮވާލާފައިވެއެވެ.
ނޫސްވެރިންނަށް އެކަށީގެންވާ ގޮތެއްގައި މަސައްކަތް ކުރެވޭނެ މާހަޢުލެއް ޤާއިމުކޮށްދިނުކަމީ ދަޢުލަތުގެ އެންމެހާ ފަރާތްތަކުގެ ޒިންމާއެއްކަމަށާއި، އެގޮތުގައި މަސައްކަތްކުރުމަށް ދައުލަތުގެ ހުރިހާ އިދާރާއަކަށް އެޗްއާރްސީއެމް އިން ވަނީ ގޮވާލައިފައެވެ.