ދެ ކިލޯގެ ޑްރަގާ އެކު އަތުލައިގަތް މީހެއްގެ 50 އަހަރުގެ ޖަލު އަދަބު 25 އަހަރުގެ ޖަލު އަދަބަކަށް ކުޑަވާ ގޮތަށް ކްރިމިނަލް ކޯޓުން ހުކުމްކޮށްފި އެވެ.
މިދިޔަ މެއި މަހު ފުލުހުން ހިންގި އޮޕަރޭޝަނެއްގައި މާލޭގެ ގެއަކުން 2.7 ކިލޯގެ ޑްރަގާއެކު އަތުލައިގަތީ މއ. ސޭބޫގޭ މުހައްމަދު ހަސަނެވެ. އޭނާ ދިރިއުޅޭ ކޮޓަރިން 1.7 ކިލޯގެ ކެނަބިސް އާއި ކިލޯއަކަށް ވުރެ ގިނަ ޑައިމޯފިން އަދި 9،000 އަށް ވުރެ ގިނަ ރުފިޔާ ވެސް ފެނުނެވެ.
އެ މައްސަލާގައި އެ މީހާގެ މައްޗަށް ކެނަބިސް ޓްރެފިކް ކުރުމުގެ ދައުވާ އާއި ޑައިމޯފިން ޓްރެފިކް ކުރުމުގެ ދައުވާ އުފުލި އެވެ. އެއިން ކޮންމެ ކުށެއްގެ އަސްލު އަދަބަކީ 25 އަހަރަށް ޖަލަށްލުމާ އެކު 100،000ރ. ޖޫރިމަނާ ކުރުމެވެ.
ނަމަވެސް ދައުލަތުން އެ މީހާއާ އިއުތިރާފްގެ އެއްބަސްވުމެއް ހެދީ  25 އަހަރުގެ ޖަލު ހުކުމް 12 އަހަރާއި ހަ މަހުގެ ޖަލު ހުކުމަކަށް އަދަބު ލުއިކޮށްދީ އަދި ޖޫރިމަނާގެ އަދަބު 50،000ރ. އަށް ކުޑަ ކުރުމަށެވެ.
އެ އެއްބަސްވުމާ އެއްގޮތަށް އެ މީހާ ކޯޓުގައި ކުށަށް އެއްބަސްވުމުން ކްރިމިނަލް ކޯޓުން މިދިޔަ ބުރާސްފަތި ދުވަހު ވަނީ އިއުތިރާފްގެ އެއްބަސްވުމާ އެއްގޮތަށް ކޮންމެ ކުށެއްގައި 12 އަހަރާއި ހަ މަހުގެ ޖަލު ހުކުމަކާއެކު 50،000ރ. ގެ ޖޫރިމަނާގެ އަދަބެއް އިއްވައިފަ އެވެ. އެހެންވެ، އެ މީހާ އަށް ކޯޓުން އިއްވި ޖުމްލަ އަދަބަކީ 25 އަހަރުގެ ޖަލު ހުކުމަކާއެކު، 100،000ރ. ގެ ޖޫރިމަނާ އެކެވެ.
އެ މައްސަލާގައި ފުލުހުން އަތުލައިގަތް 9،000ރ. އަށް ވުރެ ގިނަ ރުފިޔާ ދައުލަތަށް ނުނަގާ ދޫކޮށްލަން ވެސް ވެސް ދައުލަތުން ވަނީ އެއްބަސްވެފަ އެވެ.
Thiladhun © 2019 – 2023| Made with ❤️ in #Thiladhunmathi
Thiladhun © 2019 – 2022
Made with ❤️ in #Thiladhunmathi