ސިނގިރޭޓު ވިއްކުމުގެ ވިޔަފާރީގައި އުޅެނީ ސަރުކާރާ އިދިކޮޅު މީހުން ކަމަށް ރައީސް މުހައްމަދު މުއިއްޒު މިއަދު ތުހުމަތުކުރައްވައިފި އެވެ.
ވީ ކިހިނެއް؟- ކޮންމެ ހަފުތާއަކު ބާއްވަން ފަށާފައިވާ، 'ރައްޔިތުންނާ އެކު'ގައި ޕޮޑްކާސްޓްގައި ވާހަކަފުޅު ދައްކަވަމުން ރައީސް ވަނީ ދުންފަތް މަނާކުރަން އެމަނިކުފާނު ނިންމެވި 'އުނދަގޫ' ނިންމެވުމާއި ކުރިމަތިވި ގޮންޖެހުންތަކާ ގުޅޭ ގޮތުން ވާހަކަފުޅު ދައްކަވައިފަ އެވެ. 
ރައީސް ވިދާޅުވި ގޮތުގައި:
ސިނގިރޭޓު ވިއްކުމުގެ ވިޔަފާރީގައި އުޅެނީ ސަރުކާރާ ދެކޮޅު ވިސްނުމުގެ މީހުން
އެ މީހުންގެ މަގްސަދަކީ، އެކަން މަނާކޮށްފައި އޮތް އޮތުން ނިމުމަކަށް ގެނައުން
[ސަރުކާރާ ދެކޮޅު] މުޒާހަރާތަކަށް ވެސް އެ މީހުން އެހީތެރިވެދޭ
"އަޅުގަނޑު އެ މީހުންނަށް ނަސޭހަތްތެރިވަން އެކަން ހުއްޓާލާފައި އެހެން ކަމަކާ އުޅުމަށް. އެ ވިޔަފާރި ދޫކޮށްލުމަށް،" ރައްޔިތުންގެ ސިއްހަތާ ގުޅުން ހުރި ކަމަކަށް ވުމުން، އެކަން ސިޔާސީ ނުކުރުމަށް އެދިވަޑައިގެން ރައީސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި ގޮންޖެހުންތަކާ ކުރިމަތިވެވަޑައިގެން ނަމަވެސް، ދުންފަތާ ގުޅޭ އަމަލުތައް ހަރުކަށިކުރުމަށް އެޅި ފިޔަވަޅުތައްމަތީ ދެމިހުންނަވާނެ އެވެ. އަދި އެއީ ރައްޔިތުންނަށްޓަކައި ކުރައްވާ ކަމެއް ކަމަށް ވެސް ތަކުރާރުކޮށް ވިދާޅުވި އެވެ.
އެނގުން މުހިއްމު- ދުންފަތް އިސްތިއުމާލުކުރުމުގެ ތެރެއަށް މީހުން ވަނުން ހުއްޓުވަން، ވަކި އަހަރެއްގެ ފަހުން އުފަންވާ ކުދިންނަށް ދުންފަތް މަނާވާ ގޮތަށް 'ޖެނެރޭޝަނަލް ބޭން'ގެ ފިޔަވަޅުތައް އަޅަން ވެސް ރައީސް ވަނީ ނިންމަވާފަ އެވެ.
ރައީސް ވިދާޅުވި ގޮތުގައި މިކަމުގައި އެމަނިކުފާނު ތިން ގޮތަކަށް ވިސްނުންފުޅު ގެންގުޅުއްވަ އެވެ. އެއީ:
1 ޖެނުއަރީ 2000އިން ފެށިގެން އުފަންވި ކުދިންނަށް ދުންފަތުގެ އިސްތިއުމާލު ނުކުރެވޭ ގޮތް ހެދުން
 1 ޖެނުއަރީ 2004 އިން ފެށިގެން އުފަންވި ކުދިންނަށް ދުންފަތުގެ އިސްތިއުމާލު ނުކުރެވޭ ގޮތް ހެދުން
1 ޖެނުއަރީ 2007 އިން ފެށިގެން އުފަންވި ކުދިންނަށް ދުންފަތުގެ އިސްތިއުމާލު ނުކުރެވޭ ގޮތް ހެދުން
މިއީ މިހާރު 18 އަހަރާއި 25 އަހަރުގެ ޒުވާނުންނެވެ.
އެމަނިކުފާނު ވިދާޅުވީ މި ތިން ގޮތް ވެސް ފަންނީ ލެވެލްގައި މަޝްވަރާ ކުރުމަށް ފަހު، ކޮންމެވެސް އެއްގޮތެއް ނިންމަވާނެ ކަމަށެވެ. އޭރުން އުމުރުން 25 އަހަރުން ދަށް، 21 އަހަރުން ދަށް ނުވަތަ 18 އަހަރުން ދަށުގެ ޒުވާނުންނާއި އެއަށް ވުރެ ހަގު ކުދިން ދުންފަތުގެ އިސްތިއުމާލު ކުރުން ގާނޫނަކުން މަނާވާނެ ކަމަށް ވިދާޅުވި އެވެ.