ސައުދީ އަރަބިއްޔާގެ ވެރިރަށް ރިޔާޒުގައި ހުންނަ އެމެރިކާގެ އެމްބަސީއަށް އީރާނުން އިއްޔެ ހަވީރު ދިން ދެ ޑްރޯން ހަމަލާއެއް އަމާޒުވެފައިވާ ކަމަށާއި، މީގެ ސަބަބުން އަލިފާނުގެ ހާދިސާއެއް ހިނގައި އިމާރާތަށް ކޮންމެވެސް ވަރެއްގެ ގެއްލުންތަކެއް ލިބިފައިވާ ކަމަށް ސައުދީ ކަމާބެހޭ ފަރާތްތަކުން ބުނެފި އެވެ.
މި ހަމަލާއަކީ ގަލްފުގެ ސަރަހައްދުގައި އީރާނުން ދެމުންދާ ބަދަލުހިފުމުގެ ހަމަލާތައް ވަރުގަދަވެފައިވާ ދަނޑިވަޅެއްގައި ދީފައިވާ ހަމަލާއެކެވެ.
ސައުދީ ޑިފެންސް މިނިސްޓްރީން ބުނި ގޮތުގައި، ރިޔާޒުގެ ޑިޕްލޮމެޓިކް ކުއާޓަރުގައި ހުންނަ މި ކޮމްޕައުންޑުގައި ރޯވި އަލިފާނަކީ ކުޑަ ހާދިސާއެކެވެ. އަދި މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެ އެވެ.
ރޮއިޓާސްއަށް މައުލޫމާތު ދިން ބައެއް މަސްދަރުތަކުން ބުނި ގޮތުގައި، ހަމަލާ ދިން ވަގުތު އެމްބަސީ އިމާރާތް ހުރީ ހުސްކޮށެވެ. ސައުދީ އަސްކަރިއްޔާގެ އޮފިޝަލުން ވިދާޅުވި ގޮތުގައި، އެ ސަރަހައްދަށް އަމާޒުކުރި ހަތަރު ޑްރޯނެއް ދިފާއީ ބާރުތަކުން ވަނީ ވައްޓާލާފަ އެވެ.
ހަމަލާއާ ގުޅިގެން ރިޔާޒުގެ މަތިން ކަޅު ދުން އަރަމުންދިޔަ މަންޒަރު ފެނިފައިވާއިރު، ބާރުގަދަ ގޮވުމެއްގެ އަޑާއި އަލިފާނުގެ އަސަރު ފެނުނު ކަމަށް، މަންޒަރު ދުށް ފަރާތްތަކުން ރިޕޯޓުކޮށްފައިވެ އެވެ. އެމްބަސީން ވަނީ ރިޔާޒާއި ޖިއްދާ އަދި ދަހްރާންގައި ތިބި އެމެރިކާގެ ރައްޔިތުންނަށް ރައްކާތެރިކަމުގެ ފިޔަވަޅެއްގެ ގޮތުން ތިބި ތަނަކުން ބޭރަށް ނުނިކުމެ މަޑުކުރުމަށް އަންގާފަ އެވެ. އަދި އެމްބަސީއަށް ހަމަލާއެއް ދީފައިވާތީ، އެ ސަރަހައްދަށް ނުދިއުމަށް ވެސް ވަނީ އިރުޝާދު ދީފަ އެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، އެމްބަސީއަށް ދިން ހަމަލާ އާއި އެމެރިކާގެ ހަތަރު ސިފައިން މަރާލި ހާދިސާއާ ގުޅިގެން ވޮޝިންޓަނުން ދޭނެ ރައްދު ވަރަށް އަވަހަށް ފެންނާނެ ކަމަށެވެ. ނިއުސްނޭޝަންއަށް ދެއްވި އިންޓަވިއުއެއްގައި އޭނާ ވިދާޅުވީ "އެކަން ވަރަށް އަވަހަށް އެނގިގެންދާނެ" ކަމަށެވެ.
މި ހަމަލާ ދީފައިވަނީ އީރާނަށް އަމާޒުކޮށް އެމެރިކާ އާއި އިޒްރޭލުން ދެމުންދާ ހަމަލާތަކާ ގުޅިގެން، މުޅި ގަލްފު ސަރަހައްދުގައި ޑްރޯން އަދި މިސައިލް ހަމަލާތައް އިތުރުވެ، ނުތަނަވަސްކަން އިންތިހާއަށް ބޮޑުވެފައިވާ ދަނޑިވަޅެއްގަ އެވެ.