ލޭންޑް ޔޫސް ޕްލޭނަށް ބަދަލު ގެނެސްފައިވާތީ، ގިރާވަޅު ފަޅުން ގޯތި ލިބުނު މީހުންގެ ގުރު ނެގުން މިއަދު ފަށައިފިއެވެ. ކުރީ ސަރުކާރުން ފެށި ބިންވެރިޔާ ސްކީމުގެ ދަށުން ގިރާވަރުފަޅުން ފުރަތަމަ ނިންމީ 2،000 ގޯއްޗެވެ. އެކަމަކު، ގިރާވަރުފަޅުން ބިން ދޫކޮށްފައިވާ އަދަދަށް ގޯތި ނުނެގޭތީ، ބާކީ ގޯތި ގުޅިފަޅުން ދޭން ސަރުކާރުން ނިންމައި، ގޯތި ބަދަލުކުރުމަށް އެދި ހުށަހެޅުމަށް އޭޕްރީލް ހަތެއް، 2024 ގައި ހުޅުވާލިއެވެ. އެ ފުރުސަތުގައި ގުޅީފަޅަށް ގޯތި ބަދަލު ކުރުމަށް 2210 މީހުން އެދުނެވެ. އެ މީހުންގެ މެދުގައި ޖޫން މަހު ވަނީ ގުރު ނަގާފައެވެ. ގިރާވަރުފަޅުން ގޯތި ލިބުނު މީހުންގެ ގުރު ނެގުން ކުރިއަށް ސަރަހައްދުގައި ބަޔަކު މަޑުކޮށްލައިގެން --- ފޮޓޯ/ ހައުސިން މިނިސްޓްރީ އެކަމަކު، އާ ލޭންޑް ޔޫސް ޕްލޭނަށް ރިއާޔަތްކޮށް، އެ ސަރަހައްދުން ގޯތި ލިބުނު މީހުންގެ ޕްލޮޓު ބަދަލުވެފައިވާތީ މިއަދު އަންނަނީ ގިރާވަރުފަޅުން ގޯތި ލިބުނު މީހުންގެ ގުރު ނަގަމުންނެވެ. މިނިސްޓްރީން ބުނީ، މިއަދު ގުރު ނަގަނީ ގިރާވަރުފަޅުން ގޯތި ލިބުނު މީހުންނަށް އާ ޕްލޮޓު ކަނޑައެޅުމަށް ގުރު ނެގުމުގެ މަސައްކަތް ކަމަށެވެ. އެ މަސައްކަތް ކުރަމުން އަންނަނީ، ސޯޝަލް ސެންޓަރުގައި ހައުސިން މިނިސްޓްރީގެ މުވައްޒަފުންނެވެ. ގުރު ނަގާ ހޯލަށް ވަދެވޭނީ، ބިން ލިބިފައިވާ މީހުންގެ ތެރެއިން ކޮންމެ ޕްލޮޓަކަށް އެކަކަށް ކަމަށްވާއިރު، ޕްލޮޓް އެލޮކޭޓްކުރެވޭ ފަރާތްތަކަށް ވަގުތުން އެފަރާތަކަށް ލިބުނު ޕްލޮޓް ނަމްބަރު އެސްއެމްއެސް މެދުވެރިކޮށް ލިބޭނެއެވެ. މިނިސްޓްރީން ބުނީ، ގުރު ނެގުން ނިމުމުން، ގޯތިތަކުގެ ރަޖިސްޓްރީއާއި ބިން ލިބޭ ފަރާތްތަކާ ދެމެދުވާ އެއްބަސްވުންތަކާ ގުޅޭ މަޢުލޫމާތު ފަހުން ހާމަކުރާނެ ކަމަށެވެ. އަދި، އެ ސަރަހައްދުގެ ބިން ހިއްކާ ނިމުމުން، ގޯތި ހަވާލުކުރުމުގެ މަސައްކަތް ކުރިއަށް ގެންދާނެކަން މިނިސްޓްރީން ފާހަގަކުރިއެވެ. ގިރާވަރުފަޅުން ދޫކޮށްފައިވާ ގޯތިތަކަކީ: 1250 އަކަފޫޓުގެ 2605 ގޯތި 1650 އަކަފޫޓުގެ 1213 ގޯތި 2050 އަކަފޫޓުގެ 253 ގޯތި 2450 އަކަފޫޓުގެ 1 ގޯތި ގިރާވަރުން ގޯތި ލިބުނު މީހުންގެ ގުރު ނަގާއިރު، މިދިޔަ ސަރުކާރުގައި ގެދޮރުވެރިޔާ ސްކީމްގެ ދަށުން ގޯތި ދޫކޮށްފައިވާ ގިރާވަރުފަޅު ހިއްކުމުގެ މަސައްކަތް އިއްޔެ ހެނދުނު އަލުން ވަނީ ފަށާފައެވެ. ގިރާވަރުފަޅުން ގޯތި ލިބުނު މީހުންގެ ގުރު ނެގުން ކުރިއަށް ދަނީ ---- ފޮޓޯ/ ހައުސިން މިނިސްޓްރީ ސަރުކާރުން އެ މަސައްކަތް ހަވާލުކޮށްފައިވަނީ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީސީ)އާއެވެ. އެ ފަޅުން ހިއްކުމަށް ހަމަޖެހިފައިވަނީ 160 ހެކްޓަރުގެ ބިމެކެވެ. ސަރުކާރުން މީގެ ކުރިން ހާމަކޮށްފައިވާ ގޮތުގައި އެތަނުން 50 ނުވަތަ 54 ހެކްޓަރުގެ ބިން ވަނީ ހިއްކާ ނިންމާފައެވެ. އެކަމަކު، އެއަށް ފަހު އެ މަސައްކަތް އޮތީ މަޑުޖެހިފައެވެ. ކުރީގެ ރައީސް އިބްރާހީމް މުހައްމަދު ޞާލިޙްގެ ސަރުކާރުގައި ގޯތި ދޭން އިއުލާންކުރި ގިރާވަރުފަޅުން ގޯތި ދީފައިވަނީ ޚިދުމަތްތަކަށް ޖާގައެއް ކަނޑަނާޅައި ކަމަށް ބުނެ، ގިރާވަރަށް އާ ލޭންޑް ޔޫޒް ޕްލޭނެއް ހަދާނެ ކަމަށް މި ސަރުކާރުން އޮތީ މީގެ ކުރިން އިއުލާންކޮށްފައެވެ. އެ ލޭންޑް ޔޫޒް ޕްލޭން މި ހަފުތާގައި ވަނީ އާންމުކޮށްފައެވެ. https://sun.mv/217336 ކުރިއަށް އޮތް ތިން މަސް ތެރޭ ގިރާވަރު ފަޅާއި، ހުޅުމާލެ ތިންވަނަ ފިޔަވަހި ހިއްކައި ނިމޭނެ ކަމަށް ބެލެވޭ ކަމަށް ރައީސް ޑރ. މުޙައްމަދު މުއިއްޒު މިދިޔަ ނޮވެންބަރު 25 ގައި ވަނީ ވިދާޅުވެފައެވެ. މިތަން ވެސް ހިއްކާނީ ހުޅުމާލެ ތިން ވަނަ ފިޔަވަހި ހިއްކަން ބޭނުންކުރި ދެ ޑްރަޖަރުން ކަމަށް އޭރު އެ މަނިކުފާނު ވިދާޅުވިއެވެ.