ދެކުނު އިންޑިއާގެ އެންމެ ނުފޫޒުގަދަ އެކްޓަރުންގެ ތެރޭ ހިމެނޭ ޖޫނިއާ އެންޓީއާރްގެ ހުއްދަނެތި ވިޔަފާރީގެ އުސޫލުން އެކްޓަރުގެ ފޮޓޯއާއި ވީޑިއޯ ބޭނުންކުރުން މަނާކޮށް، ދިއްލީ ހައި ކޯޓުން އަމުރެއް ނެރެފިއެވެ. ދިއްލީ ހައިކޯޓުން ޖޫނިއާ އެންޓީއާރުގެ ހައްގުތައް ރައްކާތެރިކޮށްދިނުމުގެ ގޮތުން އަމުރު ނެރެފައިވަނީ އެކްޓަރުގެ ޓީމުން އެކަމާ ގުޅޭގޮތުން ހުށަހެޅި މައްސަލައަކާ ގުޅިގެންނެވެ. އެންޓީއާރުގެ ޓީމުން ކޯޓު އަމުރެއް ނެރެން އެދުނީ އެކްޓަރުގެ ހުއްދަނެތި އޭއައި-ޖެނެރޭޓެޑް ގިނަ ކޮންޓެންޓްތަކެއް ބަޔަކު މީހުން އުފެއްދުމާ ގުޅިގެންނެވެ. އެންޓީއާރުގެ ފޮޓޯއާއި ވީޑިއޯ އަދި އަޑު ބޭނުންކޮށްގެން ތަފާތު އެކި ޕްލެޓްފޯމްތަކުގައި ވިޔަފާރި އުސޫލުން ކޮންޓެންޓްތައް އުފައްދާ ދައުރު ކުރަމުން އަންނަކަމުގެ ޝަކުވާ ވެސް އެކްޓަރުގެ ޓީމުން ވަނީ ކޯޓަށް ހުށަހަޅާފައެވެ. ޖޫނިއަ އެންޓީއާރް ބޮލީވުޑް އެކްޓަރު ރިތިކް ރޯޝަންއާ އެކު--ފޮޓޯ/ބޮލީވުޑްހަންގާމާ އެންޓީއާރްއަކީ އިންޑިއާގެ ސިނަމާގައި ވަރަށް ގިނަ އަހަރުތަކެއް ވަންދެން މަސައްކަތްކޮށްފައިވާ އެކްޓަރަކަށްވެފައި އެއީ ގިނަ ބައެއްގެ ލޯތްބާއި އިހުތިރާމު ހޯދާފައިވާ އެކްޓަރެއް ކަމަށް ދިއްލީ ހައިކޯޓުން ނެރުނު ކޯޓު އަމުރުގައި ވަނީ ފާހަގަކޮށްފައެވެ. އެހެންކަމުން އެފަދަ އެކްޓަރެއްގެ އަބުރަށް ގެއްލުންވާ ފަދަ އަމަލުތައް އޭއައި މެދުވެރިކޮށް ހިންގާ ހުރިހާ މީހުންނަށް ވެސް އެފަދަ ކޮންޓެންޓްތައް ނައްތާލުމަށް ހައިކޯޓުގެ އަމުރުގައި ވަނީ އަންގާފައެވެ. ހަމައެއާއެކު އެންޓީއާރް ފަދަ ގައުމަށް ރީތި ނަން ހޯދައިދީފައިވާ އެކްޓަރުންގެ އަބުރު ރައްކާތެރިކޮށް ހިމާޔަތްކުރުމަކީ ގާނޫނީގޮތުން އެކަމާ ގުޅޭ އިދާރާތަކަށް ވެސް ލާޒިމު ކަމެއް ކަމަށް ވަނީ ބުނެފައެވެ. ތެލުގޫ ގިނަ ފިލްމުތަކެއްގައި މަސައްކަތްކޮށް މި ފަހުން ބޮލީވުޑަށް ވެސް ތައާރަފުވެފައިވާ ޖޫނިއާ އެންޓީއާރްގެ އެންމެފަހު ފިލްމަކީ މިދިޔަ އަހަރު ރިލީޒްކުރި ޔަޝް ރާޖް ފިލްމްސްގެ "ވޯ 2"އެވެ.