ގަވާއިދާ ހިލާފަށް ވިޔަފާރިކޮށް، ސައްހަ ވިސާއެއް ނެތި އުޅެމުންދާ ބިދޭސީން ބަލައި ފާސްކުރުމަށް އިމިގްރޭޝަނުން ހިންގާ އޮޕަރޭޝަން އަތޮޅުތެރޭގެ ރަށްރަށަށް ފުޅާ ކުރުމަށް ނިންމައިފިއެވެ.
ކޮންޓްރޯލާ ޖެނެރަލް އޮފް އިމިގްރޭޝަން، މުހައްމަދު ޝަމްއާން ވަހީދު ވިދާޅުވީ ގަވާއިދާ ހިލާފަށް މާލެ ސަރަހައްދުގައި ދިރިއުޅެމުންދާ ބިދޭސީން ފިލުމުގެ މަސައްކަތް ކުރަމުންދާ ކަމަށެވެ. އެގޮތުން ބައެއް ބިދޭސީން ކުޅުދުއްފުށްޓަށް ދާކަމުގެ މައުލޫމާތު ކައުންސިލުން ދީފައިވާކަން ފާހަގަކޮށް ޝަމްއާން ވިދާޅުވީ މިފަދައިން ފިލާ ބިދޭސީން އަތުލައިގަތުމަށް މި އޮޕަރޭޝަންތައް އަތޮޅު ތެރެއަށް ފުޅާކުރާނެ ކަމަށެވެ.
މީގެ އިތުރުން ޝަމްއާން ވަނީ ގަވާއިދާ ހިލާފަށް އުޅޭ ބިދޭސީން ފިލުވުމަށް ބައެއް ދިވެހިން މަސައްކަތް ކުރާކަމަށް ފާހަގަވެފައިވާކަމަށެވެ. އަދި ގަވާއިދާ ހިލާފަށް އުޅޭ މީހުން ފޮރުވައިގެން ގެންގުޅުމަކީ ކުށެއް ކަން ފާހަގަކޮށް ޝަމްއާން ވަނީ އެފަދަ ފަރާތްތަކާމެދު ފިޔަވަޅު އަޅާނެ ކަމަށް ވިދާޅުވެފައެވެ.
ގަވައިދާ ހިލާފަށް އުޅެމުން ދާ ބިދޭސީން ހޯދުމަށް ކުރިއަށް ގެންދާ އޮޕަރޭޝަނުގައި މި މަހުގެ 25 ވަނަ ދުވަހުގެ ނިޔަލަށް ޖުމްލަ 257 ތަނެއް ރެއިޑުކޮށް 3،322 ބިދޭސީން ވަނީ އަނބުރާ ގައުމަށް ފޮނުވާލާފައެވެ.