ވޯލްޑް ކަޕް ޓްރޮފީ މިއަދު ދުވަހު ހަވީރު ރާއްޖެ ގެންނަ ގޮތަށް ހަމަޖެހިއްޖެ އެވެ.
އެފްއޭއެމް އިން ބުނީ ޓްރޮފީ ގެނައުމަށް ހަމަޖެހިފައިވާ ހާއްސަ ޖެޓު ވެލާނާ އިންޓަނޭޝަނަލް އެއާޕޯޓަށް ޖައްސާނެ ކަމަށް ލަފާކުރެވެނީ މިއަދު ހަވީރު 5:00 ހާއިރު ކަމަށެވެ.
ޓްރޮފީ ރާއްޖެ ގެންނާތީ އެފްއޭއެމްއާއި ކޮކާކޯލާ ކުންފުނި ގުޅިގެން ގިނަ ހަރަކާތްތަކެއް ކުރިއަށް ގެންދިއުމަށް ވަނީ ނިންމާފަ އެވެ.
ވީނިއުސްއާ ވާހަކަ ދައްކަވަމުން ކޮކާކޯލާ ކުންފުނީގެ މާކެޓިން އޮފިސަރު އަހްމަދު ޝާފީ ވިދާޅުވީ ފީފާގެ ހުރިހާ ގައުމަކަށް ވޯލްޑް ކަޕް ތަށި ގެންދިއުމުގެ ދަތުރު ފެށިފަހުން މިއީ ރާއްޖެއަށް މި ތަށި ގެންނަ ފުރަތަމަ ފަހަރު ކަމަށްވާތީ މިރޭ ގަލޮޅު ރަސްމީ ދަނޑުގައި ކުލަގަދަ ހަރަކާތްތަކެއް ކުރިއަށް ގެންދާނެ ކަމަށެވެ.
ވީނިއުސްއަށް އެނގިފައިވާ ގޮތުގައި ވޯލްޑް ކަޕްގެ ތަށި ދައްކާލުމަށް ގަލޮޅު ދަނޑުގައި ބާއްވާ ހާއްސަ ރަސްމިއްޔާތުގައި ރައީސުލްޖުމުހޫރިއްޔާ އަބްދުﷲ ޔާމީން އަބުދުލްގައްޔޫމް ވެސް ބައިވެރިވެވަޑައިގަތުމަށް ވަނީ ހަމަޖެހިފަ އެވެ.
އެފްއޭއެމުން ބުނީ ވޯލްޑްކަޕް ތަށި ރާއްޖޭގައި ދައްކާލުމުގައި މުޅި ރާއްޖެ ޝާމިލް ކުރަން ނިންމާފައިވާ ކަމަށެވެ. އެގޮތުން ރާއްޖޭގެ ކޮންމެ އަތޮޅަކުން އަދި ކޮންމެ ރަށަކުން މީހަކު ހިމެނޭ ގޮތަށް ތައްޓާއެކު ހާއްސަ ގްރޫޕް ފޮޓޯއެއް ނަގަން ނިންމާފައިވާ ކަމަށްވެސް އެފްއޭއެމުން މައުލުމާތުދެ އެވެ.
ވޯލްޑް ކަޕުގެ ޗެމްޕިއަންނަށް މިހާރު ދޭ ޓްރޮފީ އަކީ 1974 ވަނަ އަހަރު ތައާރަފުކުރި ޓްރޮފީ އެކެވެ.