މާލޭގައި ހުންނަ ހިރިޔާ ސްކޫލުގައި ބެލިވެރިންގެ މެދުގައި ބޭއްވި ފުޓްސަލް މުބާރާތެއްގެ ތެރެއިން ރޭ ކުޅުނު މެޗަކަށް ފަހު، އެ ސްކޫލްގެ ބެލިނިވެރިޔަކު ކުއްލި ގޮތަކަށް މަރުވެއްޖެ އެވެ. 
ވީ ކިހިނެއް؟ - އެ ސްކޫލުގެ ގޯތިތެރޭ ކުޅުނު އެ މެޗަށް ފަހު މަރުވެފައި ވަނީ، އެ ސްކޫލުގެ ގްރޭޑް 10ގެ ބެލެނިވެރިއެއް ކަމަށްވާ، އުމުރުން 56 އަހަރުގެ އަހްމަދު ޝަރީފް، ދަފްތަރު ނަންބަރު 12602 އެވެ.
ތަފްސީލު- އެތަނުގައި އެވަގުތު ހުރި މީހަކު 'ދައުރު'އަށް ކިޔާދިން ގޮތުގައި އެ ސްކޫލްގެ ގްރޭޑް 2ގެ ބެލެނިވެރިންނާއި ގްރޭޑް 10ގެ ބެލެނިވެރިން މެދުގައި ކުޅުނު އެ މެޗްގައި ފުލްކޮށް ޝަރީފް ކުޅުނެވެ. މެޗް ނިމުނު ތަނުން ފެނުނީ، ޝަރީފް ދަނޑުގައި އޮށޯން ތަން ކަމަށް އޭނާ ބުންޏެވެ.
"އޭރު މެޗްގެ މެއިން އޮފްދަ މެޗް އިއުލާން ކުރަނީ. ފެނުނީ، އޭނަ އަމިއްލައަށް ދަނޑުގައި އޮށޯވެގެންތަން. ދެން 15 ވަރަކަށް މީހުން ވެގެން އުޅޭ ގޮތެއް ބަލަން ފުރަތަމަ އޭނަ ވަށާލި. ފަހުން މީހުން ދުރަށް ޖެއްސި، އޭރު އެއްވެސް ހަރަކާތެއް ކުރިތަން ނުފެނޭ،" އޭނާ ބުންޏެވެ. 
"ދަނޑުގައި އޮށޯވެގަތް ތަނާ ގާތްގަނޑަކަށް 15 މިނެޓް ފަހުން ސްޓެރެޗާގައި އައިޖީއެމްޗަށް ގެންދިޔައީ،" އޭނާ ބުންޏެވެ.
އެކަމާ ގުޅިގެން އެޑިއުކޭޝަން މިނިސްޓްރީން ރޭ ދަންވަރު މީޑިއާތަކަށް ފޮނުވި މެސެޖެއްގައި ބުނީ، "ދަނޑުމަތީ އޮށޯތް ބެލެނިވެރިޔަކަށް ސިއްހީ މައްސަލައެއް ދިމާވިކަން ފާހަގަކުރެވިގެން ވަގުތުން ކައިރީގައި ހުރި އައިޖީއެމްއެޗް ގެންދިޔަކަން" ސްކޫލުގެ ފަރާތުން މިނިސްޓްރީ އަށް ވަނީ އަންގައިފަ އެވެ. 
"ބެލެނިވެރިޔާ ނިޔާވެފައިވާކަން ހިތާމަތާއެކު ދަންނަވަމެވެ. މިކަމުގައި އާއިލާ އާއި ސްކޫލަށް ފޯރުކޮށްދޭންޖެހޭ އެހީތެރިކަން މި މިނިސްޓްރީގެ ފަރާތުން ފޯރުކޮށްދެމުން ގެންދާނެއެވެ،" އާއިލާއަށް ތައުޒިޔާ ދަންނަވައި، އެ މެސެޖުގައި ބުނެފައިވެ  އެވެ. 
"އަދި  މަރުހޫމުގެ ފާފަތައް ފުއްސަވައި ދެއްވައި ސުވަރުގޭގެ މަތިވެރި ނިއުމަތް ދެއްވަވައި، އާއިލާގެ އެންމެ ބޭފުޅުންނަށް ކެއްތެރިކަން ދެއްވުން އެދި  މާތްﷲ ގެ ހަޒުރަތުގައި ދުއާ ދަންނަވަން."
މިކަމާ ގުޅޭ އިތުރު ތަފްސީލެއް އަދި އެވެ. ރާއްޖޭގައި މިހާރު ކުއްލި މަރުތައް ގިނަ އެވެ. ހާއްސަކޮށް ޒުވާން އަދި މެދު އުމުރުގެ މީހުން އޭގެ ތެރޭގައި ގިނަ އެވެ.
ޝަރީފްގެ ކަށުނަމާދު އޮތީ، މިއަދު ހުކުރު ނަމާދަށްފަހު މާލޭ އާސަހަރާ މިސްކިތުގަ އެވެ.