ދެކުނުއިރުމަތީ އޭޝިޔާގެ ބައެއް ޤައުމުތަކަށް އައި ބާރުގަދަ ބިންހެލުމާ ގުޅިގެން މިހާތަނަށް މަރުވި މީހުންގެ ޖުމުލަ އަދަދު 2719 އަށް އަރައިފިއެވެ.
މާރިޗު 28ވަނަ ދުވަހު އައި ބިންހެލުމުގައި އެ ޤައުމުގެ މެދުތެރޭގައި އޮތް މަންދަލީއާއި ނީޕީޓޯއަށް ބޮޑެތި ގެއްލުންތަކެއް ލިބުނު ބިންހެލުމުގެ އަސަރު ތައިލެންޑުގެ ވެރިރަށް ބެންގކޮކާއި ޗައިނާގެ ޔުންނާން ޕުރޮވިންސަށް ވެސް ފޯރިއެވެ.
ރިކްޓަރ މިންގަނޑުން 7.7ގައި ރެކޯޑު ކުރެވިފައިވާ ބިންހެލުން އައިސްފައި ވަނީ ހުކުރު ދުވަހުގެ ހުކުރު ނަމާދަށް ތައްޔާރުވަމުން ދިޔަ ވަގުތުގައެވެ. ބިންހެލުމުގެ ލޮޅުންތަކާ ގުޅިގެން ވެއްޓުނު އިމާރާތްތަކުގެ އަދަދު ސާފުވެފައި ނެތް ނަމަވެސް، ޢާންމުންގެ ގެދޮރާއި، ހަސްފަތާލުތަކާއި، މަދަރުސާތަކާއި، މިސްކިތްތަކުގެ އިތުރު ގިނަ އަދަދެއްގެ ފައްޅިތައް ވެސް ބިންހެލުމާ ގުޅިގެން ވެއްޓުނެވެ. އަދި، މަގުތަކާއި ބުރިތަކުގެ އިތުރުން އެހެނިހެން ޢުމްރާނީ ވަސީލަތްތަކަށް ވެސް ވަނީ ބޮޑެތި ގެއްލުންތަކެއް ލިބިފައެވެ.
މި ބިންހެލުމުގެ އަސަރު އެންމެ ބޮޑަށް ކުރި ދެ ގައުމު ކަމަށްވާ މިޔަންމާއާއި ތައިލެންޑްގެ ރަސްމީ ފަރާތްތަކާ ހަވާލާދީ ޗައިނާގެ ރަސްމީ ޓީވީ ބުނާގޮތުން ބިންހެލުމުގެ ސަބަބުން ތައިލެންޑުން މަރުވިކަން މިހާތަނަށް އެނގިފައިވަނީ ގާތްގަނޑަކަށް 100 މީހުންނެވެ. އެ ނޫން މީހުން މަރުވެފައިވަނީ ބިންހެލުން އައި ގައުމު ކަމަށްވާ މިޔަންމާއިންނެވެ.
ތައިލެންޑުގެ ސަރުކާރު ބުނާގޮތުން ބިންހެލުމުގެ ސަބަބުން އެ ގައުމުންވަނީ ހަދަމުން ދިޔަ 30 ބުރީގެ އިމާރާތެއް ވެއްޓި ބިމާ ހަމަވެފައެވެ. އެ އިމާރާތުގެ ބައިތަކުގެ ދަށުން މިހާތަނަށްވަނީ މަރުވެފައިވާ 19 މީހެއްގެ ހަށިތައް ނަގާފައެވެ. ނަމަވެސް، އަދި އިތުރު 75 މީހަކު އެ އިމާރާތުގެ ބައިތަކުގެ ދަށުގައިވާ ކަމަށް ވަނީ ބެލެވިފައެވެ.
މި ބިންހެލުމުގައި މިޔަންމާއިން މިހާތަނަށް 2600 އަށް ވުރެގިނަ މީހުން މަރުވެ 3900 އަށް ވުރެ ގިނަ މީހުން ޒަޚަމުވިކަންވަނީ ކަށަވަރުވެފައެވެ. މިޔަންމާއިން އިއްޔެ ބުނެފައިވަނީ ބިންހެލުމުގައި މަރުވިމީހުންގެ އަދަދު 2000 އަށް ވުރެ މައްޗަށް ގޮސްފައިވާ ކަމަށާއި މި އަދަދު 10،000 އަށް އެރުން އެކަށީގެންވާ ކަމުގައެވެ.
ރެކްޓަރު މިންގަނޑުން 7.7 ގެ ބާރުމިނުގައި އައި ބިންހެލުމަށް ފަހު ވެސް މިޔަންމާއަށް އިތުރު ހައެއްކަ ބިންހެލުން އައިސްފައިވެއެވެ. މިއީ ބިންހެލުންކަމަށް ބެލެވުނު ނަމަވެސް މިއީ ބޮޑު ބިންހެލުމަށް ފަހު ބިންގަނޑު އަލުން ހަމަޖެހުމަށްޓަކައި އައި ބޮޑެތި ލޮޅުންތަކެއް ކަމަށް އެމެރިކާގެ ޖިއޮލޮޖިކަލް ސާވޭއާ ބެހޭ ދިރާސާ މަރުކަޒުން ބުނެފައިވެއެވެ.
މި ލޮޅުންތަކުގެ ބާރުމިން އުޅެނީ ރެކްޓަރު މިންގަނޑުން ފަހަކަށް ވުރެ ދަށުގައެވެ. އެހެންކަމުން މި ލޮޅުންތަކުގެ އަސަރު އަވައްޓެރި ތައިލެންޑަށް ކޮށްފައިނުވާ ކަމަށް އެ ގައުމުން ބުނެފައިވެއެވެ.