ސިއްޙީ ހާލަތު ގޯސްވެ، މަޝްހޫރު ލަވަކިޔުންތެރިޔާ އިބްރާހިމް ރަޝީދު (ހާބުރި)އަށް އައިޖީއެމްއެޗް ހޮސްޕިޓަލުގައި ފަރިވާދޭން ފަށައިފިއެވެ. 'ހާބުރި'ގެ ނަމުން ދިވެހީންގެ ތެރޭގައި މަޝްހޫރުވެފައިވާ ރަޝީދަކީ ރީތި ލަވަތަކެއް ދިވެހީންނަށް ހަދިޔާ ކޮށްދީފައިވާ މިއުޒިކަށް ލޯބިކުރާ ފަންނާނެކެވެ. 'ސަން'އަށް މައުލޫމާތު ލިބިފައި ވާގޮތުގައި އުމުރުން 79 އަހަރުގެ ރަޝީދުގެ ސިއްޙީ ހާލަތު ގޯސްވެ، އޭނާއަށް އައިޖީއެމްއެޗްގައި ފަރުވާދޭން ފަށާފައިވަނީ ރޭގެ ވަގުތެއްގައެވެ. މައުލޫމާތު ލިބިފައި ވާގޮތުގައި އޭނާ ބަލިވެ އުޅޭތާ ވަނީ ދުވަސްތަކެއް ވެފައެވެ. އެގޮތުން، ހޮސްޕިޓަލުގައި އެޑްމިޓްކުރީ ފުއްޕާމޭގައި ފެންހެދުމުގެ ސަބަބުން ކަމަށް އެނގިފައިވެއެވެ. އޭނާ ވަނީ ދިވެހި މިއުޒިކް އިންޑަސްޓްރީއަށް 50 އަހަރު ޚިދުމަތްކޮށްފައެވެ. އޭނާ އަކީ އަމިއްލަ ސްޓައިލްގައި ލަވަ ހުށަހަޅައިދޭ މީހެކެވެ. އަދި ކިޔާފައިވާ ގިނަ ލަވަތައް ހަދައިފައިވަނީ އޭނާ އަމިއްލައަށެވެ. ރަޝީދުގެ އަލްބަމްތަކެއް ވެސް ނެރެފައިވާއިރު، އޭނާއަކީ ބޮޑުބެރު ޖެހުމުގައި ވެސް މަޝްހޫރު ލަވަކިޔުންތެރިއެކެވެ.