ޣައްޒާ، ލުބުނާން، އަދި މިހާރު ހިނގަމުންދާ އީރާން ހަނގުރާމަ ހިމެނޭ ގޮތަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއަށް ހަނގުރާމައިގެ އެއްވެސް މައިދާނެއްގައި މޮޅުވާން ނޭނގޭ ކަމަށް އިސްރާއީލުގެ ކުރީގެ ބޮޑުވަޒީރު ނަފްތާ ބެނެޓް ވިދާޅުވެއްޖެއެވެ. އިސްރާއީލުގެ މީޑިއާތަކުން ރިޕޯޓުކޮށްފައިވާ ގޮތުގައި ބެނެޓް ވަނީ ނަތަންޔާހޫގެ އިތުރުން އިސްރާއީލުގެ ސަރުކާރަށް ވެސް ވަރަށް ބޮޑަށް ފާޑުވިދާޅުވެފައެވެ. "މިހާރު ސަރުކާރުގެ ސިޔާސީ ލީޑަޝިޕުން ސިފައިންނަށް ކާމިޔާބީއެއް ހޯދުމަށް ހުރަސް އަޅަނީ," ސަލާމަތީ ބޭނުންތަކަށް ވުރެ ސިޔާސީ ވިސްނުންތަކަށް އިސްކަންދޭ ކަމަށް ތުހުމަތުކުރައްވައި ޗެނަލް 12 އަށް ދެއްވި އިންޓަވިއުއެއްގައި ބެނެޓް ވިދާޅުވިއެވެ. އޭނާ ވިދާޅުވީ އަސްކަރިއްޔާއަށް ގާތްގަނޑަކަށް 20،000 ސިފައިންގެ ދަތިކަން ކުރިމަތިވެފައިވާ ކަމަށާއި އަލްޓްރާ އޮތޮޑޮކްސް ޔަހޫދީން ޑްރާފްޓް ކުރުމަކީ އެ ހުސްކަން ފުރިހަމަ ކުރުމަށް އެހީތެރިވެދޭނެ ކަމެއް ކަމަށެވެ. ނަމަވެސް ސަރުކާރުން އެކަން ނުކުރަނީ ސިޔާސީ ސަބަބުތަކާ ހުރެ ކަމަށް ބެނެޓް ވިދާޅުވިއެވެ. "އިސްރާއީލުގައި މިހާރު އޮތް ލީޑަޝިޕަށް އެއްވެސް މައިދާނެއްގައި މޮޅުވާން ނޭނގެ،" ބެނެޓް އިތުރަށް ވިދާޅުވިއެވެ. ހާރެޓްޒް ޑެއިލީ އިން އިސްރާއީލުގެ އަސްކަރީ ތަރުޖަމާނު އެފީ ޑެފްރިންއާ ހަވާލާދީ ބުނެފައިވާ ގޮތުގައި ގާތްގަނޑަކަށް 15،000 ސިފައިންގެ ދަތިކަން ކުރިމަތިވެފައިވަނީ އެތައް ހަނގުރާމައެއްގައި ހަމަލާތައް ފުޅާވުމާއި އަލްޓްރާ އޯތޮޑޮކްސް އެންލިސްޓްމަންޓް ލާޒިމުކުރާ ގާނޫނުތަކެއް ނެތުމުން ކަމަށެވެ. ލުބުނާނާއި ޣައްޒާއާއި ހިފާފައިވާ ހުޅަނގު އައްސޭރި އަދި ސީރިއާގައި ސިފައިން ވަރުގަދަ ކުރަން ޖެހޭ ކަމަށާއި އަދި އަލްޓްރާ އޯތޮޑޮކްސް ޔަހޫދީން ސިފައިންގެ ތެރެއަށް ވަނުމަށް ލާޒިމުކުރާ ގާނޫނެއް ފާސްކުރަން ޖެހޭ ކަމަށްވެސް ޑެފްރިން ވިދާޅުވިއެވެ. ހުށަހަޅާފައިވާ އަލްޓްރާ އޮތޮޑޮކްސް ގާނޫނުގެ މަގުސަދަކީ ހަނގުރާމައިގެ ދުވަސްވަރު އިންސާނުންގެ ދަތިކަން ހައްލުކުރުމަށް އަލްޓްރާ އޮތޮޑޮކްސް ކޮމިއުނިޓީތަކަށް މަޑުމަޑުން އެންލިސްޓްމަންޓް ކޯޓާ ކަނޑައެޅުމާއި، އެކަމަށް ދެކޮޅު ހަދާ މީހުންނަށް މާލީ އަދި ޖިނާއީ އަދަބު ދިނުމެވެ. އިސްރާއީލު ސަރުކާރަށް ފާޑުކިޔުން އަމާޒުވެފައި ވަނީ މިހެން ފެބްރުއަރީ 28 ވަނަ ދުވަހުން ފެށިގެން އެމެރިކާ އާއި އިސްރާއީލުން އީރާނަށް ހަމަލާތައް ދެމުން އަންނައިރު، ފުޅާ ދާއިރާއެއްގައި އީރާނަށް ހަމަލާތައް ދިނުމާއި އެއްގަމު މަގުން އީރާނަށް ހަމަލާދޭން ފަށާފާނެ ކަމުގެ ކަންބޮޑުވުންތައް އުފެދިފައިވާ ދަނޑިވަޅެއްގައެވެ. އިސްރާއީލުން ވަނީ މާޗް މަހުގެ ދެވަނަ ދުވަހު ލުބުނާނުގައިވެސް އަސްކަރީ ހަމަލާތައް ފުޅާކޮށް، ބެއިރޫތުގެ ދެކުނުގެ ސަރަހައްދުތަކާއި ދެކުނާއި އިރުމަތީ ސަރަހައްދުތަކަށް ވައިގެ ހަމަލާތަކެއް ދީފައެވެ. ޣައްޒާގައި އިސްރާއީލުގެ ސިފައިން 2025 ވަނަ އަހަރުގެ އޮކްޓޯބަރު މަހުގެ 10 ވަނަ ދުވަހުން ފެށިގެން ކުރިއަށް ގެންދިޔަ ހަނގުރާމަ ހުއްޓާލުމުގެ އެއްބަސްވުމާ ހިލާފުވަމުންދާއިރު، އެއްބަސްވުން އެކުލަވާލި ފަހުންވެސް ފަލަސްތީނުގެ 689 މީހުން ޝަހީދުކޮށްލައި 1،860 މީހުން ޒަޚަމްކޮށްލާފައިވާ ކަމަށް ފަލަސްތީނުގެ ސިއްޙަތާބެހޭ ވުޒާރާގެ ތަފާސް ހިސާބުތަކުން ދައްކައެވެ.