ނ. މާފަރުގެ ބައެއްގެ ގޮތުގައި މިދިޔަ އަހަރު ރައީސުލްޖުމްހޫރިއްޔާ މުހައްމަދު މުއިއްޒު ކަނޑައެޅުއްވި ފަރުމުއްޔަކީ އެ ރަށުގެ ބައެއް ނޫން ކަމަށް މިއަދު ކަނޑައަޅުއްވައިފި އެވެ.
މާފަރުގެ އިހުތިސާސްއިން ފަރުމުލި ވަކިކޮށް ޓޫރިޒަމްގެ ބޭނުމަށް ތަރައްގީ ކުރެވޭ ރަށެއްގެ ގޮތުގައި އެ ރަށް ހަމަޖެއްސެވީ ރައީސް މުއިއްޒު މިއަދު ނެރުއްވި ގަރާރަކުންނެވެ.
ފަރުމުއްޔާއި ކަނޑިންމާހުރާ އަކީ މީގެ ކުރިން ވެސް މާފަރުގެ ބައެއްގެ ގޮތުގައި އޮތް ދެރަށެވެ. އެ ދެ ރަށާއި މާފަރު ފަޅުގެ 80 ހެކްޓަރު އެ ރަށުގެ އިހުތިސާސްއިން އުނިކުރީ 2020 ވަނަ އަހަރު އެވެ. ކަނޑިންމާހުރާ އާއި ފަރުމުލި އަލުން މާފަރުގެ އިހުތިސާސްގައި ހިމެނުމަކީ ރައީސް މުއިއްޒުގެ ރިޔާސީ ވައުދެކެވެ.
އެ ވައުދު ފުއްދަވައި މިދިޔަ އަހަރުގެ އޭޕްރިލް 15 ގައި ރައީސް މުއިއްޒު ވަނީ ކަނޑިންމާހުރާ އާއި ފަރުމުއްޔަކީ މާފަރުގެ ބައެއްގެ ގޮތުގައި ކަނޑައަޅުއްވައިފަ އެވެ. ނަމަވެސް މިއަދު އެ ނިންމެވުން ބަދަލު ކުރައްވައި މާފަރުގެ އިހުތިސާސްއިން ފަރުމުލި ވަކިކުރީ ކޮން ސަބަބަކާ ހުރެ ކަމެއް ސަރުކާރުން ހާމައެއް ނުކުރެ އެވެ.
ރައީސް މިއަދު ގެންނެވި ބަދަލާއެކު ރާއްޖޭގައި މީހުން ދިރިއުޅޭ ރަށްތައް ކަނޑައެޅުމަށް އެކަށައަޅާފައި އޮންނަ މީހުން ދިރިއުޅޭ ރަށްތަކުގެ ލިސްޓު ވަނީ އަދާހަމަކޮށް ގެޒެޓުކޮށްފަ އެވެ.