ދިވެހިރާއްޖޭގެ ފުޅާދާއިރާއެއްގައި ހަށިވިއްކުމުގެ ވިޔަފާރިކުރަމުންދިޔަ 9 މީހުންގެ ތެރެއިން 3 މީހަކު ޑީޕޯޓުކޮށްފިއެވެ.
އިމިގްރޭޝަނުން ބުނީ ހަށިވިއްކުމުގެ ވިޔަފާރިކުރަމުންދިއަ ބިދޭސީން ހޯދުމަށް އިމިގްރޭޝަނާއި ފުލުހުން ގުޅިގެން ހިންގި ހާއްސަ އިންސްޕެކްޝަން ތަކެއްގައި ބިދޭސީ 7 އަންހެނަކާއި އެޖެންޓުންގެ ގޮތުގައި މަސައްކަތް ކުރަމުންދިޔަ ބިދޭސީ 2 ފިރިހެނަކު އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށެވެ.
އިމިގްރޭޝަނުން ބުނީ މި މައްސަލަ ބެލުމަށްފަހު މީގެތެރެއިން 3 އަންހެނަކު މިހާރު ޑީޕޯޓުކޮށްފައި ވާކަމަށާއި، ބާކީ 6 ބިދޭސީން ޑީޕޯޓުކުރުމުގެ މަސައްކަތް މިހާރު ކުރަމުން ދާ ކަމަށެވެ.
މި މައްސަލަ އާއި ގުޅިގެން އިމިގްރޭޝަންގެ ބެލުމުގެ ދަށަށް ގެންގޮސްފައިވަނީ ވިއެޓްނަމްގެ 6 އަންހެނަކާއި، ޔުގަންޑާ ގެ އަންހެނެއްގެ އިތުރުން ބަންގްލަދޭޝްގެ 2 ފިރިހެނެކެވެ.
ފާހަގަކޮށްލެވޭ ގޮތުގައި މިހާތަނަށް 18،919 ބިދޭސީންގެ ބަޔޯމެޓްރިކް ޑޭޓާ އެއްކޮށްފައިވާ ކަމަށް ހޯމްލޭންޑް މިނިސްޓްރީ އިން ވަނީ ބުނެފައެވެ. ގަވައިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމަށް ކުރާ މަސައްކަތުގެ ފުރަތަމަ މަރުހަލާގެ ދަށުން "އޮޕަރޭޝަން ކުރަނގި" ފަށާފައިވަނީ މިއަހަރުގެ މެއި މަހުގެ 2 ވަނަ ދުވަހުއެވެ.
އޮޕަރޭޝަން ކުރަނގީގައި މިހާތަނަށް 18 ހާހަށްވުރެ ގިނަ ބިދޭސީންގެ ބަޔޯމެޓްރިކް ޑޭޓާ އެއްކޮށް، ރާއްޖޭގެ 194 ރަށެއްގައި މި މަސައްކަތް ފަށައި 50 ރަށެއްގައި މި މަސައްކަތް ނިންމާފައިވާ ކަމަށް ހޯމްލޭންޑް މިނިސްޓްރީގެ ސްޓޭޓް މިނިސްޓަރު އަބްދުލްމަޖީދު އިބްރާހީމް ވަނީ ވިދާޅުވެފައެވެ.