ބާރު ސްޕީޑްގައި ދުއްވާފައި ދިޔަ ސައިކަލެއް ކޮންޓްރޯލް ކުރުމަށް ފުލުހަކު މުގުރު ބޭނުން ކުރުމުން ސައިކަލް ކޮންޓްރޯލުން ނެއްޓި ހިނގި އެކްސިޑެންޓްގައި މީހަކު މަރުވި މައްސަލާގައި ފުލުހުންގެ އިހުމާލެއްވާ ކަމަށް ގަބޫލުފުޅު ނުކުރައްވާ ކަމަށް ކޮމިޝަނާ އޮފް ޕޮލިސް އަބްދުﷲ ރިޔާޒް މިއަދު ވިދާޅުވެއްޖެ އެވެ.
އޮގަސްޓް 17، 2012 ގައި މާލޭގައި ހިނގި ފޭރުމުގެ މައްސަލައެއްގައި ބާރު ސްޕީޑުގައި ދުއްވާފައި ދިޔަ ސައިކަލެއް ފުލުހަކު ކޮންޓްރޯލް ކުރަން އުޅުމުގެ ތެރޭގައި ސައިކަލެއްގައި މަޑުކޮށްގެން މަގުގެ އެއްފަރާތެއްގައި އިން ސ. ހިތަދޫ ރަތްފުސްގޭ އަބްދުﷲ ގާސިމް، 43، ގައިގައި ސަކަލުން ޖެހި މަރުވި ހާދިސާއާ ގުޅިގެން، މިހާތަނަށް މީޑިއާއަށް ހާމަނުކުރާ މައުލޫމާތުތަކެއް ޕޮލިސް ކޮމިޝަނަރު މިއަދު ވަނީ ކޮމެޓީގައި ހިއްސާ ކުރައްވާފަ އެވެ.
ރިޔާޒް ވިދާޅުވީ ގާސިމްގެ ގައިގައި ޖެހުނު ސައިކަލު ދުއްވަން އިނީ ޖިނާއީ ބޮޑު މައްސަލައެއްގެ ތުހުމަތުގައި ގޭބަންދުކޮށްފައިވާ މީހެއް ކަމަށާއި އޭނާ އެ ދުވަހު ދުއްވި ސައިކަލަކީ ވަގަށް ނަގައިގެން ދުއްވި ސައިކަލެއް ކަމަށެވެ. އަދި ބިދޭސީއެއްގެ އަތުން ފޯނެއް ފޭރިގެން މައްސަލަ އެއްގައި ފުލުހުން އައީ ސައިކަލު ދުއްވަން އިން މީހާ ހޯދަމުން ކަމަށްވެސް ރިޔާޒް ވިދާޅުވި އެވެ. އޭނާ ހޯދަމުންދަނިކޮށް، ފުލުހުންނަށް ފެނުނީ އެދުވަހު މެންދުރު 11:30 އެހާކަންހާއިރު އޯކިޑުމަގުން ޖަސްޓިސް ބިލްޑިން ކުރިމަތިން ބާރު ސްޕީޑުގައި އޭނާ ސައިކަލް ދުއްވާފައި ދަނިކޮށް ކަމަށާއި އޭނާ ހުއްޓުވަން މަގުގެ ދެ ހިސާބެއްގައި މަޑުކޮށްގެން ތިބި ފުލުހުން މަސައްކަތް ކުރި ކަމަށެވެ. ސައިކަލް މަޑުކުރުމަށް ފުލުހުން އެންގުމުންވެސް އެ މީހުން މަޑުނުކޮށް ދާން ފެށުމުން މަގުމަތީގައި ހުރި އެއް ފުލުހަކު އެ ސައިކަލް ހުއްޓުވަން މަސައްކަތް ކުރި ކަމަށާއި ނަމަވެސް އޭނާގެ ފައިގައި ސައިކަލުން ޖައްސާ އެމީހުން ފިލަން މަސައްކަތް ކުރި ކަމަށެވެ. އަދި ޖަސްޓިސް ބިލްޑިން ކުރިމަތީގައި ހުރި ފުލުހަކު އޭނާގެ ގައިގައި މުގުރުން ޖެހީ އެހެންވެ ކަމަށް ރިޔާޒް ވިދާޅުވި އެވެ.
އޭނާ ވިދާޅުވީ ބާރު ސްޕީޑުގައި ދުއްވާފައި ދިޔަ ސައިކަލް ކޮންޓްރޯލް ކުރަން މަސައްކަތް ކުރީ ޕޮލިސް ކޮންސްޓަބަލް މޫސާ ޝާމިދު ނަމަކަށް ކިޔާ ފުލުހެއް ކަމަށެވެ. އަދި އެ ސައިކަލް ހުއްޓުވަށް ޝާމިދު މަސައްކަތް ކުރި އިރު އޭނާގެ ފަހަތުގައި މީހަކު ސައިކަލެއްގައި މަޑުކޮށްގެން ހުރި ކަމެއް އޭނާއަށް ނޭނގޭނެ ކަމަށް ވެސް ރިޔާޒު ވިދާޅުވި އެވެ.
ބާރު ސްޕީޑުގައި ދުއްވާފައި ދިޔަ ސައިކަލް ހުއްޓުވުމަށް މުގުރު ބޭނުން ކުރުމުގެ އިހުތިޔާރާއި ތަމްރީނު ޝާމިދަށް ލިބިގެންވޭތޯ އެމްޑީޕީގެ ޕާލަމެންޓްރީ ގްރޫޕްގެ ލީޑަރު އިބްރާހިމް މުހައްމަދު ސޯލިހު ސުވާލު ކުރެއްވުމުން ރިޔާޒް ވިދާޅުވީ މުގުރުން ޖެހި ފުލުސް މީހާއަކީ މުގުރު ބޭނުން ކުރުމުގެ ތަމްރީނާއި ތަޖުރިބާ ހޯދާފައިވާ ފުލުހެއް ކަމަށެވެ. އަދި ފުލުހުންގެ ގާނޫނުގެ 17 ވަނަ މާއްދާގެ (ނ) ދަށުން ހަދާފައިވާ މުގުރު ގެންގުޅުމާއި ބޭނުން ކުރުމުގެ ގަވާއިދުގެ (6)ވަނަ މާއްދާގެ (ހ)ގެ ދަށުން މުގުރުން ބާރުގެ ބޭނުން ކުރުމުގެ އިހްތިޔާރު ޝާމިދު އަށް ލިބިދޭ ކަމަށް ރިޔާޒް ވިދާޅުވި އެވެ.
"އެހާދިސާ ހިނގި ހިސާބުން ފެށިގެން ގާސިމް އެރުވި ވެހިކަލަށް އެންމެ ފުރަތަމަ އަރަނީ އޭނަ (ޝާމިދު). ދެން އަލްމަރުހޫމް ގާސިމް އޭނާގެ އުނގުގައި ބާއްވަނީ ވެހިކަލްގައި ހޮސްޕިޓަލަށް ގެންދިޔައީ. އެހެންވީމަ ފުލުހުންގެ އޯގާތެރިކަން މިއޮތީ ފެންނަން. ހާގީގަތަކީ އެކަންކަމުގައި ފުލުހުން ވަރަށް ރަނގަޅަށް ކަންތައް އޮތީ. އެހެންނަމަވެސް އެއްވެސް ކަމަކާ ގުޅިގެން މީހެއްގެ ފުރާނަ ގޮސްގެން ނުވާނެ،" ރިޔާޒް ވިދާޅުވި އެވެ.http://www.youtube.com/watch?v=bPDRam-6Luk