މި ދިވެހި ގައުމު ކުރިއަށް ގެންދިއުމުގަ ކަންތައްތަކެއް ކުރަންޖެހޭކަން އެންމެނަށްވެސް އެނގޭ ކަމަށާއި، ކޮންމެ ބަޔަކުވެސް ބުނަނީ ސަރުކާރުން އެވެނިކަމެއް މިވެނިކަމެއް ކޮށެއް ނުދޭ ކަމަށާއި، އެހެންނަމަވެސް ފައިސާނެތި ސަރުކާރުން ކަންތައްތައް ކޮށްދޭނީ ކިހިނެއްތޯ، ޖުމްހޫރީ ޕާޓީގެ ލީޑަރ ގާސިމް އިބްރާހިމް ސުވާލު ކުރައްވައިފިއެވެ.
ގާސިމް އިބްރާހިމް މި ސުވާލު ކުރެއްވީ "ގައުމީ ވިންދު – ޖުމްހޫރީ ވިންދު" މި ނަމުގައި ޖުމްހޫރީ ޕާޓީއަށް މެމްބަރުން އިތުރުކުރުމަށް ހިންގާ ހަރަކާތުގެ ތެރެއިން ޕާޓީއަށް އަލަށް ގުޅުނު މެމްބަރުން ސޮއިކުރުމަށް ޖޭޕީގެ މައި މަރުކަޒު، މ. ކުނޫޒްގައި ރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.
މި ޖަލްސާގައި، އާމްދަނީން ޓެކްސް ނެގުމުގެ މައްސަލައާ ގުޅޭގޮތުން ވާހަކަފުޅު ދައްކަވަމުން ގާސިމް ވިދާޅުވީ، މިގައުމުގެ ރައްޔިތުންނަށް ސަރުކާރަކަށް ކަންތައްތައް ކޮށްދެވޭނީ، ޓެކްސް ނެގުމުގެ ނިޒާމުގަ ގިނަމީހުން ބައިވެރިވެގެން ގިނަ ފައިސާ ލިބިގެން ކަމަށެވެ.
ރައީސް އިބްރާހިމް މުހަންމަދު ސާލިހް ބަދުނާމުކޮށް ބަޔަކު ކިތަންމެ ވާހަކައެއް ދެއްކިޔަސް، ނުލިބޭ ފައިސާއަކަށް އެމަނިކުފާނަށް މަސައްކަތް ކޮށްދެވޭނީ ކިހިނެއްތޯ ގާސިމް ސުވާލު ކުރެއްވިއެވެ. އެކަން އެގޮތަށް ނުވާނެކަމަށް ވިދާޅުވިއެވެ.
ސަރުކާރު ސްލޯއޭ ލަހޭ ކިޔައިގެން މިދޭތެރެއަކުން ރައްޔިތުންގެ މަޖިލީހުގަ އެންމެބާރަށް އެވާހަކަ ދެއްކި އެއްބަޔަކީ ރައީސްގެ ޕާޓީގެ މެމްބަރުން ކަމަށާއި، ބަޔަކަށް އަޑުއިއްވަން ނަމަވެސް، ކަމެއް ދައްކަން ނަމަވެސް، ހަގީގަތް އެނގިތިބެ އެއީ ކުރާވަރުގެ ކަންތައްތަކެއް ނޫންކަމަށް ގާސިމް ވިދާޅުވިއެވެ.
ގާސިމް އިބްރާހިމް ވިދާޅުވީ، އާމްދަނީން ޓެކްސް ނަގަންވާނީ، ގާނޫނުތައް ހަދައި، ހަމަޖެހޭ އުސޫލެއްގެމަތިން، އަދުލުވެރިކަމާއި ވަކި ބަޔަކު މާޖިނަލައިޒް ނުވާނެގޮތަށް އިންސާފުވެރި އުސޫލަކުން ކަންތައްތައް ރާވައިގެން ކަމަށެވެ. އެހެންނޫނީ، އެކަމުގައި އިޖުތިމާއީ އަދާލަތެއް، އިންސާފެއްވެސް ނޯންނާނެ ކަމަށް ވިދާޅުވިއެވެ.
ގާސިމް އިބްރާހިމް ވިދާޅުވީ، ގާނޫނުއަސާސީގެ ކުރިމަތީގަ އެންމެހާ ދިވެހި ރާއްޔިތުންނަކީ ހަމަހަމަ ބައެއް ކަމަށާއި، އެންމެނަށްވެސް އޮތީ އެއް ހައްގުތަކެއް ކަމަށެވެ. އެހެންކަމަށް ވަންޏާ، ގައުމު ކުރިއަށް ގެންދިއުމަށްޓަކައި އެންމެނަށް ހަމަހަމަ ބައިވެރިވުންވެސް އޮންނަންޖެހޭނެ ކަމަށެވެ.
ގާސިމް އިބްރާހިމްގެ ވާހަކަފުޅުގައި ވަނީ، އައިއެމްއެފާއި ވޯރލްޑް ބޭންކުން ކޮށްފައިވާ ރެކޮމެންޑްތައް ދޫކޮށްލާފަ އިތުރު ޓެކްސްގެ ނިޒާމެއް ގާއިމްކުރަން ދާއިރު ހެދޭނެ ވަކި މޮޅު އެއްޗެއް އޮންނާނެ ކަމަށް ގަބޫލުފުޅު ކުރައްވަންތޯ ސުވާލު ކުރައްވާފައެވެ.
ގާސިމް ވިދާޅުވީ، އާދައިގެ މީހާގެ އަތުން ޓެކްސް ނަގާށޭ ވިދާޅުވާން އެމަނިކުފާނު ބޭނުންފުޅު ނުވާކަމަށާއި، އެހެންނަމަވެސް ރައްޔިތުމީހާގެ މުޅި އާއިލާގެ މުހުތާދުތައް ފިލައިދާން އެބަޖެހޭ ކަމަށާއި، އެކަން ކުރުމަށްޓަކައި ހޯދަންޖެހޭ އާމްދަނީ ހޯދަން ކިހާ މަސައްކަތެއް ކިހާ އިރަކު ކުރަންޖެހޭނެކަން ކިހާ ފައިސާއެއް ބޭނުންވާނެކަން އަޅުގަނޑުމެންގެ ހިތަށް ގެންނަންޖެހޭ ކަމަށެވެ.