މިދިޔަ އަހަރުގެ އޯ ލެވެލް އާއި އޭ ލެވެލް ނިންމި ދަރިވަރުންނަށް ޚާއްސަ ކޮށްގެން މޯލްޑިވްސް ނެޝަނަލް ޔުނިވަސިޓީ (އެމްއެންޔޫ)ގެ އޯޕަންޑޭއެއް މާދަމާ ހަވީރު ބާއްވަން ނިންމައިފި އެވެ.
އެ ޔުނިވަސިޓީން ބުނީ އޯޕަންޑޭ އޮންނާނީ މާދަމާ ހަވީރު 4:00-6:00 އަށް ކަމަށެވެ.
އެމްއެންޔޫގެ މައި މަރުކަޒުގެ ގޯތި ތެރޭގައި ބާއްވާ މި ހަރަކާތުގައި، އެ ދަރިވަރަކު ބޭނުންވާ ކޯހަކަށް ޝަރުތު ހަމަވާނަމަ ވަގުތުން ޖާގަ ދޭނެ ކަމަށާއި އެޕްލިކޭޝަން ފޯމުތައް އެޓެސްޓުކޮށްދިނުން ވެސް އޮންނާނެ ކަމަށް ބުންޏެވެ.
އެމްއެންޔޫގައި މި މަހު ފަށާ ކޯސްތަކަށް 4،479 ދަރިވަރުން ކުރިމަތިލާފައި ވެ އެެވެ. އޭގެ ތެރެއިން ޝަރުތު ފުރިހަމަވާ 2،853 ދަރިވަރުންނަށް ފުރުސަތު ދީފައިވާއިރު، މިހާރު ވެސް ކިޔަވަމުން އަންނަ 7،070 ދަރިވަރުންނާއެކު، މި ސެމިސްޓާގައި ގާތްގަނޑަކަށް 9،000 ދަރިވަރުން އެތަނުގައި ކިޔަވާނެ އެވެ.