ކުރީގެ ނައިބުރައީސް އަހުމަދު އަދީބު އަބްދުލް ޣަފޫރުގެ މައްޗަށް އިއްޔެ އިއްވި ހުކުމަކީ ބޭއިންސާފުން އިއްވާފައިވާ ހުކުމެއް ކަމަށް މޯލްޑިވްސް ޔުނައިޓެޑް އޮޕޮސިޒަން އިން ބުނެފިއެވެ.
އެ ފަރާތުން ނެރުނު ބަޔާނެއްގައި ބުނެފައިވަނީ އަދީބުގެ އެޕާޓްމެންޓްގައި ފިސްތޯލައެއް ގެންގުޅުނުކަމަށް ބުނެ ޓެރަރިޒަމްގެ ދައުވާ ކޮށްފައިވަނީ އަދުލުވެރި އިންސާފުވެރި ޝަރީޢަތަކުން ނޫންކަމަށާއި، އަދީބުގެ މައްޗަށް 10 އަހަރުގެ ޖަލު ހުކުމެއް އިއްވާފައިވަނީ ބޭއިންސާފުން ކަމަށެވެ.
އަދީބުގެ މައްޗަށް ހިންގުނު ޝަރީޢަތުގައިވެސް ޝަރުޢީ ނިޒާމާ ގުޅިގެން އެކިއެކި ފަރާތްތަކުން ފާހަގަ ކުރަމުން އަންނަ ބޮޑެތި ކަންބޮޑުވުންތައް ތަކުރާރު ކޮށްފައިވާކަމަށާއި، ފޮރުވިފައި ނުވާ ތަހްޤީޤެއްގެ މައްޗަށް ޝަރީއަތް ބިނާވެފައި ނުވާކަމަށާއި، އަދީބުގެ މައްޗަށް ހިންގުނު ޝަރީޢަތަކީ އިންސާފުވެރި ޝަރުޢީ މިންގަނޑުން އެއްކިބާވެފައިވާ ޝަރީޢަތެއްކަމަށްވެސް އެބަޔާނުގައި ވެއެވެ.
މީގެ އިތުރުން މި ޝަރީޢަތް ހިންގާފައިވަނީ އިސްލާމީ ޝަރީޢަތާއި ޤާނޫނު އަސާސީ އާއިވެސް ޚިލާފަށް ކަމަށާއި ޝަރީޢަތް ބިނާކޮށްފައިވަނީ އަދީބުގެ އެޕާޓްމަންޓުން ފިސްތޯލަ ދުށް ކަމަށް ބުނާ ތިން ސިއްރު ހެކިންގެ ހެކިބަހުގެ މައްޗަށްކަން އެ ބަޔާނުގައި ފާހަގަކޮށްފައިވެއެވެ.
މީގެއިތުރުން އިދިކޮޅު އިއްތިހާދުގެ ބަޔާނުގައި ބުނެފައިވަނީ ޖިނާޢީ ކުށްތައް ހުއްޓުވޭނީ އަވަހަށް ޝަރީޢަތް ހިންގިގެން ކަމުގައި ރައީސް ޔާމީން ވިދާޅުވެފައިވާހިނދު ޝަރީޢަތް ހިންގުމުގެ އުސޫލުތަކާ ޚިލާފަށް މައްސަލަ ބައްލަވަމުން ގެންދެވި ބެންޗު ކުއްލި ގޮތަކަށް ބަދަލުކުރައްވައި ކްރިމިނަލް ކޯޓުގެ އިސް ޣާޒީ އެ މައްސަލަ ނަންގަވައި އަވަސް އަރުވާލައިގެން ޙުކުމް ކުރެއްވީ ސީދާ ރައީސް ޔާމީންގެ އެދިލެއްވުމަށްކަން ހާމަވާކަމަށެވެ.
އިދިކޮޅު އިއްތިހާދު ޔުނައިޓެޑް އޮޮޮޕޮސިޝަންގެ ލިޑަރ ކުރީގެ ނައިބު ރައީސް މުހައްމަދު ޖަމީލު އަހުމަދާއި ހަވާލާދީ އެބަޔާނުގައި ބުނެފައިވަނީ މިއީ ޖިނާޢީ ކުށެއް މީހެއްގެ މައްޗަށް ސާބިތުކުރުމަށް ބޭނުންވާ އެންމެ ކުޑަ މިންވަރަށްވެސް ހެކި ނެތި ހިންގާފައިވާ ބޭއިންސާނު ޝަރީޢަތެއްކަމަށެވެ.
"ރައީސް ޔާމީން ވަނީ ޝަރުޢީ ނިޒާމް ހިސާރު ކުރައްވައި ފަނޑިޔާރުގެ ގަޑުބަޑުކުރައްވާފަ. މިކަން ހުއްޓުވުމަކީ އަޅުގަނޑުމެންގެ ޒިންމާއެއް." ބަޔާނުގައި ވެއެވެ.