ރާއްޖޭގައި ބާއްވާ އެންމެ ބޮޑު އެއް މަސްރޭސް، 'ފަރިއުތުރު ކޮރަލްސް' މަސްރޭހުގެ ޗެމްޕިއަންކަން 'ވަރަށް ތާޒާ' ހޯދައިފި އެވެ.
ކުޅުދުއްފުށީގެ އޮފީސް/ކުލަބު ޖަމިއްޔާތަކަށް ހުޅުވާލައިގެން، ކުލަބް ކޮރަލްސްއިން ކޮންމެ އަހަރެއްގެ ވެސް ފިތުރު ޢީދާ ދިމާކޮށް ބާއްވަމުން އަންނަ ކޮރަލްސް މަސްރޭހުގައި މި އަހަރު ޖުމްލަ 23 ޓީމަކުން 500 އެއްހާ ބައިވެރިން ވާދަކުރި އެވެ.
ބޮޑުބެރުގެ ހަރަކާތާއެކު ވަރަށް ފޯރިގަދަކޮށް ކުރިއަށްދިޔަ މި މުބާރާތުގެ ނިންމުމުގެ ރަސްމިއްޔާތު ޝަރަފުވެރިކޮށްދެއްވީ، ކުޅުދުއްފުށީ އުތުރު ދާއިރާގެ މެންބަރު މުހައްމަދު ދާއޫދެވެ.
މި މުބާރާތުން ' ވަރަށް ތާޒާ' އެއްވަނަ ހޯދީ 158.5 ކިލޯގެ މަސް ބާނައިގެންނެވެ. 135.05 ކިލޯގެ މަސްބާނައިގެން މުބާރާތުގެ ދެވަނަ ސިފައިން ހޯދިއިރު 85.2 ކިލޯގެ މަސްބާނައިގެން ތިންވަނަ ކާމިޔާބުކުރީ ޕޮލިސް ޓީމެވެ.
މުބާރާތުގެ މޮޅު އަންހެން ކެޔޮޅުގެ މަގާމު ހޯދޯ 10 މަސްބޭނި، އޭޑީކޭގެ ޝަހުދާ އަލީ އެވެ. މޮޅު ފިރިހެން ކެޔޮޅުގެ މަގާމު ކާމިޔާބުކުރީ 79 މަސް ބޭނި، އެމްއެސްއެލްޕީގެ އަސްރަފް އަބުދުﷲ އެވެ. އެންމެ ބަރުމަސް ބޭނި މަގާމު ހޯދީ، އެމްއެންޑީއެފްގެ އަދުނާނު އަލީ އެވެ. އޭނާ ބޭނި މަހުގައި 7.5 ކިލޯ ހުރި އެވެ.
މި މުބާރާތުގެ ނިންމުމުގެ ރަސްމިއްޔާތުގައި ދެކުނު ދާއިރާގެ މެންބަރު ފަރުހަތު މުހައްމަދު އާއި ކުޅުދުއްފުށީ މޭޔަރު މުހައްމަދު އާތިފް އާއި ސަރުކާރުގެ މުއައްސަސާތަކުގެ އިސްވެރިން އަދި ގިނަ އަދަދެއްގެ އާންމުން ބައިވެރިވި އެވެ.
މި އަހަރު މި މުބާރާތުގެ އޮފިޝަލް ޓައިޓަލް ސްޕޮންސަރއަކީ ފަރިއުތުރު އެވެ.
މި އަހަރުގެ މުބާރާތުގައި ކުލަބް ކޮރަލްސްއިން ވަނީ މުޖުތަމަޢުއަށް ފައިދާހުރި ޝިޔާރެއް ޕްރޮމޯޓްކުރުމަށް ނިންމާފައެވެ. އެގޮތުން މި އަހަރު މި މުބާރާތަށް ކަނޑައަޅާފައިވާ ޝިޔާރަކީ "ހެލްތީ އޯޝަންސް، ހެލްތީ ކޮމިއުނިޓީސް" އެވެ.
މި ޝިޔާރަކީ އަޅުގަނޑުމެންގެ ވަށައިގެންވާ ކަނޑަކީ އަޅުގަނޑުމެންނަށް ނުހަނު ބޭނުންތެރި ޤުދުރަތީ ވަސީލަތަކަށްވާއިރު، އެ ކަނޑު ހިމާޔަތްކޮށް، ދެމެހެއްޓިނިވި ގޮތެއްގައި ބޭނުންކުރެވޭނެ ފަދަ ވެއްޓަކަށް ހެދުމަކީ އެންމެންގެ ޒިންމާއެއް ކަމަށް ހަދައި، އެކަމުގެ ސަބަބުން އެ ކަނޑު ބޭނުންކުރާ އެންމެހާ ފަރާތްތަކަށް ރައްކާތެރިކަން ލިބޭނޭކަން އަންގައިދިނުމުގެ ގޮތުން ކަނޑައެޅިފައިވާ ޝިޔާރެކެވެ. އަދި މިކަމާ ގުޅިގެން މީހުން ހޭލުންތެރިކަން އިތުރުކުރުމަށްޓަކައި ކަނޑައަޅާފައިވާ ޝިޔާރެކެވެ.