ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ އައު ޓާމިނަލް ހެދުމުގެ މަސައްކަތް ކުރަމުންދިޔަ ބިދޭސީންތަކެއްގެ މެދުގައި މިއަދު މާރާމާރީއެއް ހިނގައި ބަޔަކަށް އަނިޔާވެއްޖެއެވެ. ފުލުހުން މީޑިއާތަކާ ހިއްސާކުރި މެސެޖެއްގައި ބުނީ އެ މާރާމާރީއާ ގުޅިގެން ފުލުހުން ހަރަކާތްތެރިވަމުންދާ ކަމަށެވެ. އަދި މާރާމާރީގައި އަނިޔާވި ބަޔަކަށް ހުޅުމާލޭ ހޮސްޕިޓަލާއި ޓްރީ ޓޮޕް ހޮސްޕިޓަލުގައި ފަރުވާ ދެމުން އަންނަ ކަމަށް ވެސް ފުލުހުން ބުންޏެވެ. މާރާމާރީ ހިނގި ސަބަބާއި އަނިޔާވި މީހުންނާ ގުޅޭ ގޮތުން ފުލުހުން އިތުރު ތަފުސީލެއް ހާމައެއް ނުކުރެއެވެ. ހުޅުމާލޭ ހޮސްޕިޓަލުގައި ފަރުވާ ދެމުންދާ މީހުންނާ ގުޅޭ ގޮތުން އެ ހޮސްޕިޓަލުގައި ބަހެއް ވެސް މިހާތަނަށް ލިބިފައިނުވެއެވެ. ރާއްޖޭގައި ދިރިއުޅޭ ބިދޭސީންގެ މެދުގައި މީގެ ކުރިން ވެސް ނުރައްކާތެރި މާރާމާރީތައް ހިނގައި، ބައެއް މީހުންގެ ފުރާނަ ގެއްލިފައިވެސްވެއެވެ.