ކ. ގުރައިދޫއަށް 100 ރުއް ގެނެސް، އިންދައިދޭނެ ބަޔަކު ހޯދަން އެ ރަށު ކައުންސިލުން މިއަދު އިއުލާނުކޮށްފިއެވެ. އެ ރަށު ކައުންސިލުން ކުރި އިއުލާނުގައި ވަނީ ބޭނުންވާ ރުކުގެ ތަފްސީލާއި، މި މަސައްކަތް ކުރަން ޝައުގުވެރިވާ ފަރާތްތަކުން ހުށަހަޅަންވީ މައުލޫމާތުތައް ހާމަކޮށްފައެވެ. އެގޮތުން ކައުންސިލުން ބުނި ގޮތުގައި، ހޯދަނީ 100 ރުކެވެ. ރުކުގެ ދިގުމިން ހުންނަންވާނީ، ކަދު ބުޑުން ފެށިގެން ރުކުގެ ފަންތަކުގެ ބުޑާ ހަމައަށް މައްޗަށް ހަތް ފޫޓާ، ދިހަ ފޫޓާ ދެމެދުގައެވެ. މި ކަމަށް ގެންނަ އެއްވެސް ރުކަކީ ބައްޔެއް ހުރެގެން ނުވާނެކަމަށް ކައުންސިލުން ބުންޏެވެ. މީގެ އިތުރުން ރުކުގެ ބުޑުތައް މޫތަކާއެކު ހުންނަންވާނީ ކާދުގަނޑުގައި ކަމަށް ކައުންސިލުން ބުންޏެވެ. ކައުންސިލުން ބުނީ ރުއްތައް ގެނައުމާއި، ކައުންސިލުން ދައްކާ ތަންތަނުގައި ރުއް އިންދުމަކީ މަސައްކަތާ ހަވާލުވާ ބައެއްގެ ޒިންމާއެއް ކަމަށެވެ. އެހެންކަމުން ރުއް އިންދުމުގެ ކުރިން ބިން ތައްޔާރުކޮށް، ކަޅު ފަސް އަދި ކާނާ އަޅައި ވަޅުގަނޑު ތައްޔާރުކުރަން ވާނެ ކަމަށް ވެސް ކައުންސިލުން ބުންޏެވެ. މި މަސައްކަތް ކުރުމަށް ޝައުގުވެރިވާ ފަރާތްތަކުން ބީލަން ހުށަހަޅަން މިހާރު ވަނީ ފުރުސަތު ހުޅުވައިލައިފައެވެ. ބީލަން ހުށަހެޅޭނީ ރަޖިސްޓްރީކުރެވިފައިވާ ކުންފުނިތަކަށާއި، ރަޖިސްޓްރީކޮށްގެން ހިންގާ ޕާޓްނާޝިޕްތަކަށާއި، ކޯޕަރޭޓިވް ސޮސައިޓީތަކާއި، އަމިއްލަ ފަރުދުންގެ ވިޔަފާރިތަކަށެވެ. ބީލަމުގައި ރަޖިސްޓްރީކުރަން 500 ރުފިޔާގެ ފީއެއް ދައްކަން ޖެހެއެވެ. ބީލަން ހުށަހަޅަން ޖެހޭނީ އަންނަ މަހުގެ ހެނދުނު 08:30ގެ ކުރިންނެވެ. މިފަހުން، ވެލާނާ އިންޓަނޭޝަނަލް އެއާޕޯޓްގައި ކަދުރު ރުއް އިންދައިގެން ފާޑުކިޔުން އަމާޒުވެ، ދިވެހި ރުކާއި، ކަދުރު ރުއް އިންދުމާ ބެހޭ ބަހުސެއް ކުރަމުން ދަނިކޮށް، ރާއްޖޭގެ ރަށްތަކުގައި ދިވެހި ރުއް ގިނައިން އިންދަން ދަނޑުވެރިކަމާ ބެހޭ ވަޒީރު, ޑރ. މަރިޔަމް މާރިޔާ ވަނީ އެދިވަޑައިގެންފައެވެ. އޭގެ ފަހުން މިނިސްޓްރީން މިދިޔަ އަންގާރަ ދުވަހު ބުނީ, މިނިސްޓަރުގެ އެ އިލްތިމާސްއާއެކު ރާއްޖޭގެ އެކި ރަށްތަކުގައި ރުއް އިންދަން ފަށައިފި ކަމަށެވެ. އެ ގޮތުން، ލ. ފޮނަދޫ، ގދ. މަޑެވެލި، ކ. ކާށިދޫގައި ޖުމްލަ 60 ރުއް އިންދާފައިވާ ކަމަށް މިނިސްޓްރީން ބުންޏެވެ.