ނޫސްވެރިން އުލުބައިންދަން ޖެހޭ ކަމަށް ވިދާޅުވީ އެހެން މާނައެއްގައި ކަމަށް ވިދާޅުވެ، ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އިބްރާހިމް ފަލާހު، އޭނާ ދެއްކެވި ވާހަކަ ދިފާއުކުރައްވައިފި އެވެ.
ވީ ކިހިނެއް؟ - ރައްޔިތުންގެ މަޖިލީހުގެ ތަޅުމުގައި ވާހަކަ ދައްކަވަމުން، ނޫސްވެރިން އުލުބައިންދަން ޖެހޭ ކަމަށް ފަލާހު ވިދާޅުވީ، މިދިޔަ ބުދަ ދުވަހު ބޭއްވި މަޖިލީހުގެ ޖަލްސާގައި، ސަރުކާރުގެ ބާރު ފޯރުވޭ ކޮމިޝަނަކުން މީޑިއާތަކާއި ނޫސްވެރިން ރެގިއުލޭޓްކުރުމުގެ ނަމުގައި ބޮޑެތި އަދަދުތަކުން ޖޫރިމަނާކޮށް ހަރުކަށި ފިޔަވަޅުތަކެއް އެޅޭ ގޮތަށް މަޖިލީހަށް ހުށަހަޅާފައިވާ ބިލަށް ބަހުސް ކުރައްވަމުންނެވެ.
އެއާއެކު އެ މައްސަލަ ބެލުމަށް ނޫސްވެރިންގެ ޖަމިއްޔާއިން ގޮވާލައި، މައްސަލަ ފުލުހަށް ވަނީ ހުށަހަޅާފަ އެވެ. އަދި ފުލުހުން މިރޭ ވަނީ، އެ މައްސަލަ ތަހުގީގު ކުރުމާ މެދު ޕްރޮސެކިއުޓާ ޖެނެރަލް (ޕީޖީ)ގެ ލަފަޔަކަށް އެދިފައިވާ ކަމަށް ބުނެފަ އެވެ.
ފުލުހުން އެހެން ބުނުމާ ގުޅިގެން އެކްސްގައި ކުރެއްވި ޕޯސްޓެއްގައި ފަލާހު ވިދާޅުވީ އޭނާ "މީހަކު މަރަން ބުނެފައެއް" ނޯންނާނެ ކަމަށެވެ.
"އުލުބޭންދުން އަޅުގަނޑުމެން ހިސާބުގައި ބޭނުންކުރަނީ ބަސްނާހާމީހުން ބިމަށްވުރެ މަތީތާކަށް އެރުވުމަށް،" ރ. އިންނަމާދުއަށް ނިސްބަތްވެ ވަޑައިގަންނަވާ ފަލާހު ވިދާޅުވި އެވެ.
ފުލުހުން އޭނާގެ ވާހަކަ ތަހުގީގު ކުރުމާ މެދު ގާނޫނީ ލަފައަކަށް އެދުން ފަލާހު ސިފަ ކުރެއްވީ "ވަރަށް ރަނގަޅު ނިންމެވުމެއް"ގެ ގޮތުގަ އެވެ. ދެން ވިދާޅުވީ ޖަލަށް ލައިފި ނަމަ، އެތަނުން އޭނާއާ ރަހުމަތްތެރިވާނެ މީހުންގެ ވާހަކަ އެވެ.
"[އެއީ] އެމްޑީޕީގެ ވެރިކަން ކުރި ރައީސުންނާއި އެމްޑީޕީގެ ގިނަ އަދަދެއްގެ މަޖިލިސް މެމްބަރުން. އަދި އެންމެ ގިނަ ވާނީ ނޫސްވެރިން،" ފަލާހު ވިދާޅުވި އެވެ.
އޭގެ ސަބަބެއް ކަމަށް އޭނާ ވިދާޅުވީ މި ގައުމުގައި އެންމެ ގިނައިން، އިސްލާމް ދީނުގެ އަސްލުތަކާ ހިލާފުވެ، އެ ފަދަ ވާހަކަތައް ދައްކާ އުޅެނީ އެ މީހުން ކަމަށް ވާތީ ކަމަށެވެ. އަދި އިސްލާމް ދީން ނޫން ދީންތައް ގެނައުމަށް ވަކާލާތު ކުރި ދެވަނަ ބައެއް އެ ނޫނީ ނޫޅޭނެ ކަމަށް ވެސް ވިދާޅުވި އެވެ.
"ކުރިއަށް އޮތް މަދު ދުވަސްކޮޅުތެރޭ މަތީގައި ވާރައްޓެހިންނާ ބައްދަލުވާނެކަމަށް އުއްމީދުކުރަން،" ފަލާހު ވިދާޅުވި އެވެ.