ރާއްޖޭގައި ފާލުބެލުމުގެ ކަންކަން ކުރަމުންދިޔަ އިންޑިއާއަށް ނިސްބަތްވާ ގުރޫޕެއް އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.
އެނގުން މުހިންމު - ރާއްޖޭގައި 'ރޫހާނީ ފަރުވާ' ކުލާސްތަކެއް ނަގައިދޭ ހިންދޫ މީހެއްގެ މައްސަލައެއް 'ދައުރު'އިން އިއްޔެ ވާނީ ފެންމަތިކޮށްފަ އެވެ.
ބުނީ ކީކޭ؟ - ފުލުހުންގެ މީޑިއާ އޮފިޝަލަކު 'ދައުރު'އަށް ވިދާޅުވި ގޮތުގައި އިއްޔެ ހައްޔަރުކުރި ތިން މީހުންނަކީ ވެސް އެ މައްސަލައާ ގުޅުންހުރި ތިން މީހުން ކަމަށެވެ.
އިމިގްރޭޝަނުން ބުނީ ފުލުހުންނާ ގުޅިގެން ހިންގި އޮޕަރޭޝަނެއްގައި ފާލުބެލުމުގެ ކަންކަން ކުރަމުންދިޔަ އިންޑިއާއަށް ނިސްބަތްވާ ތިން ފިރިހެނުން އިއްޔެ ހައްޔަރުކޮށްފައިވާ ކަމަށެވެ. އެ ތިން މީހުންނަކީ:
ދަނަންޖޭ ބައިލަޕަތީ - 18 އަހަރު
ނަގަރާޖާ ބައިލްޕަތީ - 39 އަހަރު
ސުރީހަރީ ވަނަމް - 25 އަހަރު
އެ ތިން މީހުން ޑީޕޯޓު ކުރުމުގެ މަސައްކަތް އިމިގްރޭޝަނުން މިހާރު އަންނަނީ ކުރަމުންނެވެ.
ތަފްސީލު - މާސްޓާ ދުރްގާ ރާއޯ ގުރޫޖީގެ ނަމުގައި ފޭސްބުކް ޕޭޖެއް މެދުވެރިކޮށް އެ މީހުން ދައުވާ ކުރަނީ އަތާއި މޫނު ބަލައިގެން އަދި ހޮރޮސްކޯޕް މެދުވެރިކޮށް ދިމާވެފައިވާ ހުރިހާ މައްސަލައަކަށް ހައްލު ހޯދައިދޭނެ ކަމަށެވެ.
އެ މީހުންގެ ސެޝަނަކަށް 300ރ. ނަގާއިރު، 'ފަރުވާ' ދެމުންދިޔައީ ހުޅުމާލޭގަ އެވެ.
"ވަރަށް ގިނަ މީހުން މިހާރު ވެސް އެބަ ފަރުވާ ހޯދަން އާދޭ،" ފޭސްބުކް ޕޭޖުގައިވާ ނަންބަރަށް ގުޅުމުން ބުންޏެވެ.