ކޮންމެ މީހަކަށް ވެސް ދުވެވިދާނެ އެވެ. ރޭހެއްގައި އިތުރު ކުރިއެރުމެއް ބޭނުން ނަމަ ތަޖުރިބާކާރުންނާ އެކު ތަމްރީން ހެދުމަކީ ހަށިގަނޑު ރަނގަޅަށް ހާނުވާލުން އެކަންޏެއް ނޫނެވެ؛ ދުވުމާ ބެހޭ އެތައް ފިލާވަޅުތަކެއް ވެސް ލިބުމެވެ.
ޖުލައި މަހު އޮންނަ ހުޅުމާލެ ރަން އިންތިޒާމްކުރާ އެލީޓް ރަނާސް މޯލްޑިވްސްއިން އެ ފުރުސަތު މި އޮތީ ހުޅުވާލައިފަ އެވެ. މި ރޭހުގައި ބައިވެރިވާން ރަޖިސްޓްރީކުރުމަށް ފަހު ހިލޭ ތަމްރީން ހޯދޭނެ އެވެ.
އެލީޓް ރަނާސްގެ އެއް ބާނީ އަދި ދިގު ދުވުންތެރިޔާ/ކޯޗު އަހުމަދު ޝަރަފް ބުނީ ރޭހަށް ރަޖިސްޓްރީވާ ދުވުންތެރިންނަށް އެލީޓް ރަނާސްގެ އެހެން ދުވުންތެރިންނާ އެކު ހިލޭ ތަމްރީން ހެދުމުގެ ފުރުސަތު އޮންނާނެ ކަމަށެވެ.
"އަސްލު ކޮންމެ ރޭހަކަށް ވެސް ނުކުންނަންވާނީ ތަމްރީން ހަދައިގެން. އޭރުން ތިމާގެ ފެންވަރު ވެސް ބޮޑަށް ވަޒަންކޮށްލެވޭނީ،" ޝަރަފް ބުންޏެވެ.
އެލީޓް ރަނާސްގައި ދިގު ދުވުމުގައި ރާއްޖެއިން ފާހަގަކޮށްލެވޭ އެތައް ދުވުންތެެރިންނެއް ހިމެނެ އެވެ. އެކަމަކު އެ ދުވުންތެރިންނާ އެކު ތަމްރީން ހަދަން ޖެހިލުންވާން ޖެހޭ ސަބަބެއް ނެތް ކަމަށް ޝަރަފް ބުންޏެވެ. އެއީ ތަމްރީނުތައް ބަހާލާނީ އެ މީހެއްގެ ދުވުމުގެ ފެންވަރަށް ބަލައިގެން ކަމަށް ވާތީ އެވެ.
"އެމީހެއްގެ ލެވެލްގައި ތަމްރީނުތައް ދޭނީ. މުޅިން އަލަށް ދުވާ ނަމަ އެ މީހަކަށް އެ ބޭނުންވާނެ ގޮތަކަށް ޕްރޮގްރާމް ރާވާނީ،" ޝަރަފް ބުންޏެވެ.
ހުޅުމާލެ ރަންގައި ހިމެނެނީ 10 ކިލޯމީޓަރާއި 5 ކިލޯމީޓަރުގެ އިތުރުން ކުޑަކުދިންނަށް 1 މޭލުގެ ރޭހެވެ. މި ރޭސް އޮންނާނީ 4 ޖުލައިގައި ހުޅުމާލެ ސެންޓްރަލް ޕާކްގަ އެވެ. މީގެ ތެރެއިން 10 ކިލޯމީޓަރާއި 5 ކިލޯމީޓަރުގެ ރޭސް ފަށާނީ ހެނދުނު 6:00ގަ އެވެ. އުމުރުން 12 އަހަރުން ދަށުގެ ކުދިންނަށް ހާއްސަކޮށް ބާއްވާ 1 މޭލުގެ ރޭސް ފަށާނީ 7:00ގަ އެވެ.
މި ރޭސްތަކުގައި ބައިވެރިވާން 2 ޖެނުއަރީން 30 މޭ 2025އަށް ކަނޑައަޅާފައިވާ އަގުތަކަކީ:
10 ކިލޯމީޓަރުގެ ރޭސް: 600ރ
5 ކިލޯމީޓަރުގެ ރޭސް: 500ރ
1 މޭލު ރޭސް (12 އަހަރުން ދަށް): 200ރ
އެލީޓް ރަނާސްގެ ތަމްރީންތައް އޮންނާނީ އާންމުކޮށް މާލޭ ދުވާ ޓްރެކްގައި ފަތިހު 5:30 އިން ފެށިގެންނެވެ. ހުޅުމާލެ ރަންގައި ރަޖިސްޓްރީވުމަށް ފަހު އެ ގަޑީގައި އެލީޓް ރަނާސްގެ ދުވުންތެރިންނާ ބައިވެރިވެ، ތަމްރީންތައް ހޯދޭނެ އެވެ.
"ތަމްރީން ނުހަދާ ނަމަ ބައެއް މީހުންނަށް މައްސަލަތައް ދިމާވާނެ،" ޝަރަފް ބުންޏެވެ.
"މިސާލަކަށް ކުއްލިއަކަށް މާ ބާރަށް ދުވެގަނެގެން އަނިޔާވުން ކަހަލަ ކަންކަން ދިމާވެދާނެ ތަމްރީން ނުހަދާ ނަމަ."
މަދުވެގެން ތިން މަހެއްހާ ދުވަހުގެ ތަމްރީން ގަވާއިދުން ހަދައިފި ނަމަ ރޭސްތަކުގައި ވަގުތު އަވަސްވުމުގެ ފުރުސަތު ވެސް ބޮޑެވެ. ރާއްޖޭގައި ދުވާ މީހުންގެ އަދަދު ގިނަވެ ރޭސްތަކުން ވެސް އެކަން ފެނެ އެވެ. އެހެންކަމުން އެއް ރޭހަށް ވުރެ އަނެއް ރޭހުގައި ތިމާގެ ވަގުތު އަވަސްކުރުމުގެ އަޒުމް، ގިނަ މީހުންގެ އޮވެ އެވެ.
ޝަރަފް ބުނީ ރަނގަޅަށް ތަމްރީން ހެދިއްޖެ ނަމަ ވަގުތު އަވަސްކުރެވޭނެ ކަމަށެވެ.
"އަޅުގަނޑުމެން މި ދެނީ އަސްލު ވަރަށް ރަނގަޅު ފުރުސަތެއް. އެއްވެސް މީހަކު ޖެހިލުންވާނެ ކަމެއް ނެތް އަޅުގަނޑުމެން ކައިރިއަށް އަންނާކަށް. އަޅުގަނޑުމެން ތަމްރީން ދޭނީ އެ މީހެއްގެ ފެންވަރަށް ބަލާފައި،" ޝަރަފް ބުންޏެވެ.
"އެ މީހަކު ބޭނުންވާ ޓާގެޓަކަށް ޓްރޭނިން ދެވޭނެ. އެ ވަރިހަމަ 10ކޭ ވިޔަސް، 5 ކޭ ވިޔަސް."