ދުނިޔޭގެ ކޮންމެ ގައުމެއްގައިވެސް, އެގައުމެއްގެ ހަގީގީ މޫނުމަތި ރަމްޒު ކޮށްދެނީ އެ ސަރުކާރެއްގެ އިސް ތަރުޖަމާންއެވެ. އެ ސަބަބާހެދި ކޮންމެ ސަރުކާރަކުންވެސް އިސް ތަރުޖަމާންގެ މަގާމަަށް ބޭފުޅަކު އައްޔަން ކުރާއިރު ޚާއްސަ ސަމާލު ކަމެއް ދެއެވެ.
ހައިބަތު ހުރި, ފަސްބައި ސާފު, ކޮރަޕްޝަނާއި ފަސާދައިގެ ކިލަނބުކަމެއް ފަސްބައިގައި ނެތް ފަރާތެއް އެމަގާމަށް އައްޔަން ކުރުމަށް ސަރުކާރުތަކުން އިސްކަންދެނީވެސް އެ ސަބަބާހުރެއެވެ. އިސްތަރުޖަމާނަކީ ކޮރަޕްޝަންގެ ތުހުމަތު ކުރެވޭ, ފަސްބައި ކިލަނބު ބޭފުޅެއް ނަމަ, އެމީހެއްގެ މާޒީންނާއި އަދި ދައްކާ ކޮންމެ ވާހައަކުން ގައުމުގެ މޫނުމަތި ހުތުރުވެ, އިތުބާރު ގެއްލިގެން ދާނެތީއެވެ.
އެގޮތުން މި ސަރުކާރުގެ އިސް ތަރުޖަމާންގެ މަގާމަށް ހީނާ ވަލީދު އައްޔަން ކުރުމަށްފަހު, އޭނާ ގެންދަވަނީ މުއިއްޒު ކުރަމުންދާ ވައްކަމާއި ފަސާދަ ދިފާއުކޮށް, އަދި މުއިއްޒު ހިންގަމުންދާ ކޮރަޕްޝަންގެ އަމަލުތަކުގައި މަތިޖެހުމަށް ބުހުތާން ދޮގުތައް ހަދާ ކަންކަމުގެ ހަގީގަތްވެސް އޮޅުވާލަމުންނެވެ.
އަދި އެންމެ ފަހުން ޚުދު ހީނާ ވަލީދުވެސް ވަނީ, މުއިއްޒުގެ އެންގުމަށް, ދައުލަތުގެ މާލިއްޔަތުން ވައްކަންކޮށް, ކޮރަޕްޝަން ހުތުރު އަމަލު އޭނާގެ ހަތަރެސްފައިން ހިންގާ އަމިއްލަ ފަސްބައި ކިލަނބު ކޮށްފައެވެ.
ރައީސް ޑރ. މުހައްމަދު މުއިއްޒުގެ މަސްލަހަތު އޮތް އެމްއެމްޓީވީ ހިންގާ ކުންފުނި ”މޯލްޑިވްސް މީޑިއާ ހައުސް“އަށް އެންސްޕާއިން ފަންޑު ކުރުމުގެ ބޭނުމުގައި, އެންސްޕާގެ ހިންގުމަށް އިމާރާތެއް ހިފާ, އެންސްޕާގެ ސީއީއޯގެ މަގާމްގައި ހުރެ, ހީނާ ވަލީދު ހިންގި 35 މިލިއަން ރުފިޔާގެ ޚިޔާނާތް ފަޅާއަރާ, އެ ޚިޔާނާތުގެ ވާހަކަތައް މީޑިއާތަކުްނ ރިޕޯޓުކޮށް, އަދި އޭސީސީން އެންސްޕާއަށް ވަދެ ޚިޔާނާތުގެ ތަހުގީގުވެސް ވަނީ ހިންގާފައެވެ.
އެހެންނަމަވެސް, އެ ޚިޔާނާތުގެ އެއްވެސް މައުލޫމާތެއް މިހާތަނަށްވެސް އެނގިވަޑައިގެންފައި ނުވާކަމަށް މުއިއްޒު މިއަދު ވަނީ ވިދާޅުވެފައެވެ.
އަދި އެ މުއާމަލާތާ ގުޅިގެން އެންސްޕާއިން މުއިއްޒު ޓީވީއާއެކު ހެދި އެއްބަސްވުން ރޫޅާލިކަމަށް ބަޔާން ނެރެ, އެ މުއާމަލާތާ ގުޅުންހި ހުރިހާ މައުލޫމާތެއް މީޑިއާތަކުން ރިޕޯޓު ކުރިއިރުވެސް, އެ ކޮރަޕްޝަނާ ގުޅޭ އެއްވެސް ވާހަކައެއް އަޑު އިވިފައި ނުވާކަމަށް މުއިއްޒު މިއަދު ވިދާޅުވުމުން, ކޮރަޕްޝަނާ ގުޅޭ ކަންކަމުގައި މުއިއްޒު ވާހަކަ ދައްކަވަމުން ގެންދަވަނީ ދެ އަނގައިން އެއީ ސާފުކޮށް ފެންނާން އޮތް ހަގީގަތެއްކަންވެސް ވަނީ ހާމަވެގެން ގޮސްފައެވެ.
މުއިއްޒު ޓީވީ ހިންގުމަށް އެންސްޕާ މެދުވެރިކޮށް ފަންޑުކުރުމަށް ހިންގި މިވައްކަމުގެ ޚިޔާނާތުގެ އަގު 35 މިލިއަން ރުފިޔާއަށް އަރައެވެ.
އެންސްޕާއާއި މޯލްޑިވްސް މީޑިއާ ހައުސްއާއި ދެމެދު އެއްބަސްވުމެއް ހެދުމާއި ގުޅިގެން މީޑިއާތަކުން ވަނީ އެތަނަކީ އެއީ މުއިއްޒުގެ ”އެމްއެމް ޓީވީ“ ހިންގަން ކުއްޔަށް ދީފައިވާ ތަނެއް ކަމަށާއި އެތަނަށް ކުލި ދައްކަމުން އަންނަނީ އެންސްޕާއިން ކަމަށް ބުނެ ތުހުމަތުތައް އަމާޒު ކޮށްފައެވެ.
އެއަށްފަހު ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) ހިންގަން އިމާރާތެއް ކުއްޔަށް ހިފީ އުސޫލުގެ ތެރެއިންތޯ ބެލުމަށް އެންޓި ކޮރަޕްޝަން ކޮމިޝަން (އޭސީސީ) އިން ކުރާ ތަހުގީގުގެ ބޭނުމަށް އެ މުއައްސަސާގެ ޓީމުތަކުން އެންސްޕާ އަށާއި ފިނޭންސް މިނިސްޓްރީއަށް ވެސް ވަދެ ތަހުގީގު ހިންގާފައި ވެއެވެ. އެހެންނަމަވެސް އެ މުއްސަސާއިން ހިންގަމުންދާ މި ތަހުގީގުގެ އެއްވެސް މައުލޫމާތެއް ހިމާތަނަށް ހާމަކޮށްފައެއް ނުވެއެވެ.
އެއަށްފަހު، އެކަމާ ގުޅިގެން އެތައް ބަޔަކު ފާޑުކިޔަމުން ދިޔުމުގެ ސަބަބުން އެންސްޕާއަށް ފޫނުބެއްދޭ ގެއްލުން ކުރިމަތިވަމުންދާ ކަމަށް ބުނެ އެއްބަސްވުން ބާތިލުކޮށްދޭން އެ ކުންފުނިން އެދިފައިވާ ކަމަށް އެންސްޕާއިން ނެރުނު ބަޔާނެއްގައި ބުނެފައިވެ އެވެ.
ފިނޭންސް މިނިސްޓްރީގެ ވެބްސައިޓުގައި ހުރި މައުލޫމާތުން އެނގޭ ގޮތުގައި އެންސްޕާގެ އޮފީސް އިމާރާތް ބަދަލުކުރަން، 12،000 އަކަފޫޓުގެ ތަނެއް، ހޯދަން ކުރި އިއުލާނުކުރީ ޓެންޑަ ބޯޑު މެދުވެރިކޮށެވެ. އެ އިއުލާނާ ގުޅިގެން އިމާރާތް ކުއްޔަށް ދޭން ހުށަހެޅީ ވެސް ހަމައެކަނި މޯލްޑިވްސް މީޑިއާ ހައުސިންނެވެ.
ފަނަރަ ބުރިއަށް ހަދާފައިވާ މއ. ސީރާޒީގެއިން ހަތަރު ފަންގިފިލާއެއް އެމްއެމްޓީވީ އަށް ކުއްޔަށް ނަގާ, އޭގެތެރެއިން އެންސްޕާއަށް ކުއްޔަށް ދިނީ ދެ ފަންގިފިލާއެވެ. ސީރާޒީގޭގެ ޖުމުލަ ބޮޑުމިނަކީ 4365 އަކަފޫޓެވެ.
އެންސްޕާއިން ބޭނުންވާ 12،000 އަކަފޫޓުގެ ޖާގަ ލިބޭނީ ސީރާޒީގޭގެ ތިން ފަންގިފިލާއިންނެވެ. ދެ ފަންގިފިލާ ކުއްޔަށް ނަގާފައި ވާނަމަ އެއީ 8730 އަކަފޫޓެވެ.
އެންސްޕާގެ އޮފީސް ހިންގަން، ރައީސް މުއިއްޒުގެ މަސްލަހަތު އޮތް މޯލްޑިވްސް މީޑިއާ ހައުސިން އޮފީސް އިމާރާތެއް ކުއްޔަށް ދީނީ މަހަކަށް 580،000ރ. އަށެވެ. އެއީ ފަސް އަހަރަށް 34.8 މިލިއަން ރުފިޔާ އެވެ.
އެނގިފައިވާ ގޮތުގައި 35 މިލިއަން ރުފިޔާގެ ކޮރަޕްޝަންގެ މި މުއަމާލާތަކީ ސައްހަ މުއާމަލާތެއްކަމަށް ދެއްކުމަށް މުއިއްޒު ގެންދިޔައީ އޭސީސީއަށްވެސް ނުފޫޒު ފޯރުވަމުންނެވެ. އަދި މިމައްސަލަ އޭސީސީން ނިންމުން, އެ މުވައްސަސާއަށް މުއިއްޒު އައްޔަންކުރާ މެމްބަރުން އައްޔަން ކުރެވެންދެން މައްސަލައިގެ ތަހުގީގު ލަސްކުރުމަށްވެސް މުއިއްޒުވަނީ އަންގާފައެވެ.
ހީނާ ވަލީދުގެ މި ކޮރަޕްޝަންގެ ސާފު ހެކި މީޑިއާތަކަށް ލީކުވެފައިވާއިރުވެސް, މިއަދު މުއިއްޒު ވިދާޅުވެފައިވަނީ އެ ކޮރަޕްޝަނާއި ގުޅުންހުރި އެއްވެސް މައުލޫމާތެއްގެ އަޑުވެސް އިވިފައި ނުވާކަމުގައެވެ. އަދި ކޮރަޕްޝަން ހިންގަން އެއްވެސް ފަރާތަކަށް ފުރުސަތު ނުދެއްވާނެކަމަށް ވިދާޅުވެ, މުއިއްޒު މިއަދުވެސް ވަނީ ދެއަނގައިން ވާހަކަ ދައްކަވާ ބުހުތާނު ދޮގު ހައްދަވާފައެވެ.
އަދި ދައުލަތުގެ ތަރުޖަމާނެއްގެ ގޮތުގައި, 35 މިލިއަން ރުފިޔާގެ ކޮރަޕްޝަންގެ ތުހުމަތު ބޮލުގައި އެޅިފައިވާ ފަރާތެއް ހުރުމުން, މުއިއްޒު ބިނާ ކުރަމުންދާ “ދިވެހީންގެ ރާއްޖެ” އަސްލު ހަގީގަތްވެސް މިއަދު މިއޮތީ ހާމަވެ ފެންނާށެވެ. އަދި ކޮރަޕްޝަނާއި ފަސާދައިގެ ތުހުމަތު ކުރެވި ހުރެމެ, ތަރުޖަމާނެއްގެ މަގާމުން އިސްތިއުފާ ނުދީ, އެމަގާމުގައި ހުރެ, ހީނާ ވަލީދު ގައުމު ތަމްސީލުކުރަމުން ދިއުމުން, އިންޓަގްރިޓީއާއި އިޚްލާސްތެރިކަން ހީނާ ވަލީދުގައި ކިބައިގައި ހުރި މިންވަރުވެސް ވަރަށްވެސް ފުރިހަމައަށް މިއަދު ތަމްސީލުވެގެން ހިގައްޖެއެވެ.
މިއީ މުއިއްޒު ބިނާ ކުރަމުންދާ ދިވެހީންގެ ރާއްޖެއެވެ. އެރާއްޖޭގެ އަސްލު ސިފައެވެ. ހާލަތެވެ. މިހާލަތުގައި އޮތް ގައުމެއް ދިވެހިރާއްޖެ މެނުވީ ދުނިޔެއިން ފެންނާކަށް ނެތެވެ.