ސަރުކާރުން ހުޅުވާލި ބޯހިޔާވަހިކަމުގެ ފުރުސަތުތަކާ އެކު އައިސްފައި މި އޮތީ "ގެދޮރުވެރިވުމުގެ ޢީދެއް" ކަމަށާއި އޭނާ ވެސް އެ ސްކީމުގެ ތެރެއިން ގެދޮރުވެރިކަން ހޯދަން ކުރިމަތިލައްވާނެ ކަމަށް ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ މެންބަރު އިބްރާހިމް މުހައްމަދު (ޖަނާބު އިއްބެ) ރޭ ވިދާޅުވެއްޖެއެވެ. ސަރުކާރުން ވަނީ 7،900 ފުލެޓަށާއި 1،250 އަކަފޫޓުގެ 15،000 ގޯއްޗަށް އެދި ކުރިމަތިލާން އިއްޔެ ހުޅުވާލާފައެވެ. އޭގެ ތެރެއިން ގޯތި ދޫކުރަނީ ދެ ކެޓަގަރީން ކަމަށްވާއިރު މާލޭ ރަށްވެހިންނަށް އަދި ޚާއްޞަ އިސްކަންދެވޭ ކެޓަގަރީތަކަށް ގޯތި ދޫކުރުމަށް ހަމަޖެހިފައިވަނީ ގްރޭޓާ މާލޭ ސަރަހައްދުންނާއި ރަސްމާލެއިންނެވެ. އަދި، މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ގޯތި ދޫކުރަން ހަމަޖެހިފައިވަނީ ހަމައެކަނި ރަސްމާލެއިންނެވެ. އެސްއެސްޓީވީގެ ބާރު ހަތަރެއް ޕްރޮގްރާމްގައި ވާހަކަދައްކަވަމުން ރޭ ޖަނާބު ވިދާޅުވީ، ބިމުގެ ދަތިކަމާއި ބޯހިޔާވަހިކަމުގެ މައްސަލައަކީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުން ފެށިގެން މާލޭ ސަރަހައްދަށް ދިމާވެފައި އޮތް ބޮޑު ކާރިސާއެއް ކަމަށެވެ. އެކަމަކު، ކުރީ ސަރުކާރުތަކުން ކަން ކޮށްފައި އޮތްގޮތުގެ ވާހަކަދައްކަން ބޭނުންނުވާ ކަމަށް އޭނާ ވިދާޅުވިއެވެ. އޭގެ ބަދަލުގައި މި ސަރުކާރުން މިހާރު ހުޅުވާލާފައި އޮތް ގެދޮރުވެރިކަމުގެ ފުރުސަތުތަކަށް ކުރިމަތިލާން އޭނާ ވަނީ ވާދަވެރިންގެ ކިބައިން ވެސް އެދިވަޑައިގެންފައެވެ. "މި އޮތީ ގެދޮރުވެރިވުމުގެ އަނެއްހެން ބުނަންޏާ ޢީދެއް އައިސްފައި،" އޭނާ ވިދާޅުވިއެވެ. "ވާދަ ކިޔުމުގެ ބަދަލުގައި ކޮންމެ މީހަކު ވެސް ހިނގާށޭ، އެ މީހަކަށް ލިބެން އޮތް އެއްޗެއް ހޯދައިގަތުމަށްޓަކައި އަވަހަށް ޕޯޓަލްއަށް ލޮގިންވާން. ތިމާގެ މައުލޫމާތު ފުރަން،" ޖަނާބު އިއްބެ ވިދާޅުވީ، މި ސަރުކާރުން ރަސްމާލެ ވެސް މިހާރު ގާތްގަނޑަކަށް ހިއްކާ ނިމެމުން އަންނަ ކަމަށެވެ. އަދި، ޒަމާނީ ޓެކްނޮލޮޖީގެ އެހީގައި އެ ތަންތަނުގައި މީހުން އާބާދުވާން އެހާ ގިނަ ދުވަސް ނުނަގާނެ ކަމަށް އޭނާ ގަބޫލުކުރައްވައެވެ. އެހެންވެ، މި ސަރުކާރުން ހުޅުވާލާފައި އޮތް 15،000 ގޯއްޗަށް ކުރިމަތިލާން އޭނާ އެންމެންގެ ކިބައިން އެދިވަޑައިގަތެވެ. "އެހެންވީމާ އެ 15،000 ރައްޔިތުންގެ ތެރެއިން ވުމަށްޓަކައި އަޅުގަނޑު ވެސް ބޭނުން. މިހާތަނަށް ރާއްޖޭގެ ގޯތި އަދި ފުލެޓުގެ އެއްވެސް ސްކީމަކަށް އަޅުގަނޑު ހުށަހަޅާފައެއް ނޯންނާނެ. އަޅުގަނޑު ވެސް ހުށަހަޅާނަން،" އޭނާ ވެސް ގޯތި ހޯދަން ހުށަހަޅާނެކަން ހާމަކުރައްވަމުން ޖަނާބު ވިދާޅުވިއެވެ. https://sun.mv/216867 މި ސަރުކާރުން ހުޅުވާލި ބޯހިޔާވަހިކަމުގެ ސްކީމްގެ ތެރެއިން މިހާތަނަށް 518 މީހަކު ވަނީ ކުރިމަތިލާފައެވެ. މި ސަރުކާރުގެ ފަސް އަހަރުގެ ވެރިކަމުގެ ދައުރު ނިމުމުގެ ކުރިން މިހާރު ފަށާފައި ހުރި ބޯހިޔާވަހިކަމުގެ މަޝްރޫއުތައް ނިންމައި، އެ ތަންތަނަށް ރައްޔިތުންނަށް ވަދެވޭނެ ކަމަށް ހައުސިން މިނިސްޓަރު ޑރ. އަބްދުﷲ އިއްޔެ ވަނީ ވިދާޅުވެފައެވެ. ރައީސް ޑރ. މުހައްމަދު މުއިއްޒުގެ ވެރިކަމުގެ ދައުރުގައި 18 އަހަރުން މަތީގެ ކޮންމެ މީހަކަށް ބޯހިޔާވަހިކަން ކަށަވަރު ކޮށްދިނުމަށް ވައުދުވެވަޑައިގެންފައިވެއެވެ. އެ މަނިކުފާނު 2024 ވަނަ އަހަރު އިއުލާން ކުރެއްވި ގޮތުގައި މިދިޔަ 2025 ވަނަ އަހަރަކީ ބޯހިޔާވަހިކަމަށް ޚާއްސަ އަހަރެކެވެ. އެ އަހަރު ގިނަ މަޝްރޫއުތަކެއް ފައްޓަވާނެކަން އެތައް ފަހަރެއްގެ މަތިން އިއުލާނުކުރެއްވެވިއެވެ. ނަމަވެސް، އަހަރު ނިމިގެން ދިޔައީ އެކަމަށް ކަނޑައެޅި ބަޖެޓުން ވެސް ބޮޑު ބައެއް އަތްނުލައި އޮއްވައެވެ.