ޖަނާޒާތަކުގައި ބައިވެރިވުމަށް ގިނަ ޢަދަދެއްގެ އަންހެނުންވެސް ޞަޙަރާއަށް ދެއެވެ. ހިތާމައަކީ މީގެ ތެރެއިން ގިނަ މީހުންނަށް ޖަނާޒާގައި ބައިވެނުވެވޭ ކަމެވެ. އަދި ބައިވެރިޥާން ބޭނުންވާ ކަނބަލުންނަށް ހުރަސްވެސް އެޅޭކަމެވެ. މިގޮތަށް ކަންތައް ކުރެވެނީ ނުއެނގިތިބެ ކަމަށްވާނަމަ ދަސްކުރާށެވެ!  
ސަންދޯކާއިއެކު އަންހެނުން ޤަބުރުސްތާނަށް ނުވަނުމަކީ ސަންދޯއް ގެންދާ ހިސާބުން ޖަނާޒާއާއި ވަކިވެގަންނަން އޮތް ސަބަބެއް ނޫނެވެ. ޤަބުރުސްތާނަށް ނުވަދެ ހިނަވާގެ ސަރަޙައްދުގައި ތިބެގެންވެސް އޮތީ ޖަނާޒާގައި ބައިވެރިވުމެވެ. ބައިވެރިވާން ކުރަން އޮތް ކަމަކީ މައްޔޮތާއަށް ފާފަފުއްސަވައި ދެއްވެވުމަށާއި ކައްވަޅުގައި (މަލާއިކަތުން ސުވާލުކުރައްވަވާ ވަޤުތު) ޘާބިތުކަން ދެއްވެވުމަށާއި މައްޔިތާގެ ފުރާނައަށް ހެޔޮ ރަޙްމަތް ލައްވަވައި ސުވަރުގެ މިންވަރުކުރެއްވެވުން އެދިގެން ދުޢާކުރުމެވެ.  
ނަމަވެސް ގިނައިން ފެންނަނީ އެތަނުގައި ތިބެގެން އަމިއްލަ ޥާހަތައް ދައްކާތަނެވެ. މަދުން ނަމަވެސް ކޮންމެވެސް ވާހަކައެއް ދައްކާފައި ހީނއުފާކުރާތަންވެސް ފެނެއެވެ. އެކަމުން ނުކުންނަ ދެވަނަ މައްސަލައަކީ އެފަދަ ކަންކަން ނުކޮށް މަޑުން ތިބެން ނުވަތަ ދުޢާކުރަން ބޭނުންވެގެން ތިބޭ އަންހެނުންނަށް އުނދާގޫވާކަމެވެ. އުނދަގޫވިނަމަވެސް އެކަން ކުރަނީވެސް ޢާއިލާގެ މީހުން ނުވަތަ ގާތް މީހުން ކަމަށްވާތީ ބަހެއް ބުނަން އޮންނަނީ ނުކެރިފައެވެ.
ލޮބުވެތި ކަނބަލުންނޭވެ! ސަންދޯއް ޤަބުރުސްތާނަށް ގެންދެވެނީ ތިއަ ކަނބަލުންގެ ކުރިމަތިންނެވެ. އެހިސާބުން ފެށިގެންވެސް ކުރިން މޮބުނި މަގުން ދުޢާކުރުންމަތީގައި ތިބޭށެވެ. އެންމެ ކުޑަމިނުން ޖަނާޒާގައި ބައިވެރިވުމަށް ޤަބުރުސްތާނަށް ދިއަ މީހުން އެނބުރި އަންނަންދެން ނަމަވެސް ދުޢާކުރުންމަތީގައި ތިބޭށެވެ. އެކަން ނުކުރެވޭނެނަމަ ރަނގަޅީ އެތަނުގައި ނުތިބުމެވެ. ގޭގައި ތިބުމެވެ. ޖަނާޒާގައި ބައިވެރިވުމަށް ގޮސް ތިބެ، އެކަމުގައި ބައިވެރިނުވެ ޖަނާޒާގެ އަދަބުތަކާއި ޙަދީޘްފުޅާއި އެއްގޮތަށް ޢަމަލުނުކުރުން މާގޯހެވެ.  
ދަންނާށެވެ! މައްޔިތާއަށްޓަކައި ދުޢާކުރުމަކީ ހަމައެކަނި ޤަބުރުސްތާނަށް ދާ ފިރިހެނުން ކުރަން އޮތްކަމެއް ނޫނެވެ. ދުރުގައި ތިބެގެން އަންހެނުންނަށްވެސް އޮތީ ދުޢާކުރުމެވެ. އެންމެ ކުޑަމިނުން މިމިންވަރަށް ދުޢާކުރުންމަތީގައި ދެމިތިބޭށެވެ!  ތަކުރާރުކޮށްލާނަމެވެ! އެއީ އަޑުހަރުކޮށްވެސް މަޑުންވެސް ވާހަކަދައްކަން ތިބެން އޮތް ވަޤުތެއް ނޫނެވެ. މިދުޢާކުރަން އޮތް ވަޤުތެވެ.
اللَّهُمَّ اغْفِرْ لَهُ اللَّهُمَّ ثَبِّتْهُ 
(ޔާ ﷲ! މައްޔިތާއަށް ފާފަފުއްސަވާނދޭވެ! މައްޔިތާއަށް ޘާބިތުކަން ދެއްވަވާނދޭވެ!) 
Translation: O Allah, forgive him. O Allah, strengthen him. 
އަބޫދާވޫދު: 3:315
މަޢުލޫމާތު: ކުރިން ލިޔެފައިވާ ޢިލްމްވެރިންގެ ބަސްފުޅުތަކުން
 
- މިއަދުނޫސް