މަސައްކަތްތެރިންގެ ދުވަހާ ގުޅުވައި ޖަމިއްޔާތަކާ ވަކިން ސަރުކާރުން އިސް ނަގައިގެން ވަކި ހިނގާލުމެއް ކުރިއަށް ގެންދިޔައީ މަސައްކަތްތެރިންގެ ހައްގުގައި ހަރަކާތްތެރިވާ ޖަމިއްޔާތަކާ "ޖައްސާލަން" ކަމަށް ބުނެ ކަންބޮޑުވުން ފާޅުކޮށްފި އެވެ. 
ވީ ކިހިނެއް؟ - އެކި ގައުމުތަކުގައި ކޮންމެ އަހަރެއްގެ މެއި މަހުގެ ފުރަަަތަމަ ދުވަހު ފާހަގަކުރާ މަސައްކަތްތެރިންގެ ދުވަސް ފާހަގަކުރުމަށް، އާންމުކޮށް ރާއްޖޭގައި ހިނގާލުންތައް ބާއްވަމުން އަންނަނީ މަސައްކަތްތެރިންގެ ޖަމިއްޔާތަކުން އިންތިޒާމްކޮށްގެނެވެ.
އެކަމަކު ހޯމްލޭންޑް މިިނިސްޓްރީގެ އިސް ނެގުމަކަށް، މާލޭގެ މަގުތަކުގައި މި ދުވަސް ފާހަގަކުރަން މިއަދު ޖަމިއްޔާތަކާ ވަކިން ހިނގާލުމެއް ވަނީ ބާއްވައިފަ އެވެ. މިފަހުން ކެބިނެޓަށް ގެނައި ބަދަލާ އެކު، ވަޒީފާއާ ބެހޭ މަސައްކަތްތައް މިހާރު އޮންނަނީ ހޯމްލޭންޑް މިނިސްޓްރީގެ ދަށުގަ އެވެ.
މި ދުވަހާ ގުޅުވައި މަގުމަތީ ހިނގާލުމެއް ސަރުކާރުން އިސް ނަގައިގެން ބޭއްވި މިއީ ފުރަތަމަ ފަހަރެވެ.
ތަފްސީލް - ސަރުކާރުގެ ފަރާތުން ބޭއްވި ހިނގާލުމުގައި ބައެއް ވަޒީރުންނާއި ސަރުކާރު މުވައްޒަފުން ބައިވެރިވި އެވެ. އާޓިފިޝަލް ބީޗުން ފެށި މި ހިނގާލުން ނިންމާލާފައިވަނީ ސޯޝަލް ސެންޓަރާ ހަމައިންނެވެ. ހިނގާލުން ފެށުމުގެ ގޮތުން ޒުމްބާގެ ހަރަަކާތްތަކެއް ވެސް ކުރިއަށްގެންދިޔަ އެވެ. 
މަސައްކަތްތެރިންގެ ހައްގުގައި ވަކާލާތުކުރާ ޖަމިއްޔާތަކުން އިންތިޒާމުކޮށްގެން ވެސް ހިނގާލުމެއް ވަނީ ބާއްވާފަ އެވެ.
މި ހިނގާލުމުގައި ހޯމް މިނިސްޓަރު އަލީ އިހުސާން ވިދާޅުވީ ސަރުކާރުގެ ފަރާތުން މި ދުވަސް ފާހަގަކުރުމުގެ ހިނގާލުމެއް ބޭއްވުމަށް ނިންމީ، މަސައްކަތްތެރިންގެ އަގުވަޒަންކުރުމާ އެކު، ޝަކުވާތަކާއި ކަންބޮޑުވުންތައް އަޑުއަހައި އެކަންކަން ހައްލުކުރުމުގެ ގޮތުން ކަމަށެވެ.
މަސައްކަތްތެރިންގެ ހައްގުގައި ވަކާލާތުކުރާ މޯލްޑިވްސް ޓްރޭޑް ޔޫނިއަން ކޮންގްރެސް (އެމްޓީޔޫސީ)ގެ ދަށުގައި ހިމެނޭ ޖަމިއްޔާތަކުން ބައިވެރިވެގެން ކޮންމެ އަހަރަކު ވެސް މަސައްކަތްތެރިންގެ ދުވަހު ހިނގާލުން ބާއްވަ އެވެ.
ސުލްހަވެރިކަމާ އެކު ޝުއޫރު ފާޅުކުރާ އެ ހިނގާލުމަށް މިދިޔަ އަހަރު ފުލުހުން ވަނީ ހުރަސްއަޅައިފަ އެވެ. އެކަމަކު މިއަދުގެ ހިނގާލުމަށް ހުރަހެއް ނާޅަ އެވެ. 
"މިދިޔަ އަހަރުގެ ރެލީ ނިމިގެންދިޔައީ ވަރަށް ބޮޑު އަނިޔާތަކެއް ލިބިގެން. އެކަމަކު މިފަހަރު ސަރުކާރުން އިސްނަގައިގެން ހަމަ ސީދާ މަސައްކަތްތެރިންގެ ޔޫނިއަންތަކާ ޖައްސާލުމަށްޓަކައި ނޫނީ ކޮންމެވެސް އެހެން މަންޒަރެއް ދެއްކުމަށްޓަކައި މިހާރު ރެލީ ބާއްވަމުން އެ ގެންދަވަނީ،" މަސައްކަތްތެރިންެގެ ޖަމިއއްޔާތަކުގެ ހިނގާލުމުގައި ފާޅުކުރި ޝުއޫރުތަކުގެ ތެރެއިން، އެމްޔޫޓީސީގެ ބޭފުޅަކު ވިދާޅުވި އެވެ.
"މީގެން ދޭހަވަނީ ހަމަ ހަގީގަތުގައި ވެސް އަޅުގަނޑުމެން މަސައްކަތްތެރިންގެ އަގު ވައްޓާލުމަށްޓަކައި މިއަދުގެ ސަރުކާރުން އަދި ކުރިން ވެސް ކޮށްފައި އޮތް ކަން." 
އެނގުން މުހިންމު - ބައިނަލްއަގުވާމީ މަސައްކަތްތެރިންގެ ދުވަސް ފާހަގަ ކުރަން ފަށައިފައިވަނީ 1886 ވަނަ އަހަރު އެވެ. 
އެގޮތުން:
އެ އަހަރުގެ 1 މޭގައި އެމެރިކާގެ ސިނާއީ މަސައްކަތްތެރިންގެ ގިނަ އަދަދެއްގެ ބަޔަކު މަގުމައްޗަށް ނުކުމެ މުޒާހަރާ ކުރި 
އެ މީހުން ގޮވައިލީ އެ ދުވަސްވަރު 10 ގަޑިއިރާއި 16 ގަޑިއިރާ ދެމެދުގެ ދިގުމިނަކަށް މަސައްކަތްކުރުވުމުގެ ސަގާފަތް ނައްތާލާ، ރެޔަކާއި ދުވާލެއްގެ ތެރޭގައި މަސައްކަތުގައި އުޅޭން ޖެހޭ ވަގުތު އަށް ގަޑި އިރަށް ބަދަލު ކުރަން 
ޝިކާގޯގެ 'ހޭމާކެޓް ސްކުއާ' ނަމަކަށް ކިޔާ މައިދާނެއްގައި ފެށި މި މުޒާހަރާ އެތައް ދުވަހަކަށް ދެމިގެން ދިޔަ އިރު ކުރިމަތިލުންތަކެއް ހިނގައި އެތައް ބަޔަކު މަރުވެ، ގިނަ ބަޔަކަށް އަނިޔާވި