ސަރުކާރުން މަސައްކަތް ކުރާނީ މާލެ އާއި އަތޮޅުތެރޭގައި އެއް ފެންވަރަކަށް ތައުލީމީ ނިޒާމު ބައްޓަން ކުރުމަށް ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.
ވީ ކިހިނެއް؟ - ހުޅުމާލެ ފޭސް 2ގައި އަލަށް އިމާރާތްކުރި ޝަހީދު އަލީ ސްކޫލު ރަސްމީކޮށް ހުޅުވުމަށް މިއަދު އެ ސްކޫލުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން ރައީސް ވިދާޅުވީ މަސައްކަތް ކުރާނީ އެންމެ މަތީ ފެންވަރުގައި ތައުލީމީ ކަންތައްތައް ތަރުތީބު ކުރުމަށް ކަމަށެެވެ.
ތަފްސީލް - އެކި ސަބަބުތަކަށްޓަކާ އަތޮޅުތެރެއިން މާލެއަށް އަންނަންޖެހޭ ކަމަށާއި މި އަހަރު ވެސް 1،500އަށް ވުރެ ގިނަ ދަރިވަރުން ރަށްރަށުން މާލެ ބަދަލުވިކަން ފާހަގަކުރައްވައި ރައީސް ވިދާޅުވީ އޭގެ މާނައަކީ ރަށްރަށުގައި މާލެއާ އެއްފެންވަރަށް ތައުލީމީ ފެންވަރު ނެތުން ކަމަށެވެ.
"1،500އަށް ވުރެ ގިނަ ކުދިން، އޭގެ މާނައަކީ 5،000އަށް ވުރެ ގިނަ ފަރާތްތައް މިވަނީ ރަށްރަށުން މާލެ ބަދަލުވެފައި ސްކޫލުތަކަށް ކުދިން ވައްދަން. އެގެ މާނައަކީ ރަށްރަށުގައި ނެތިއްޔޭ އަދިވެސް މާލޭގައި މި ހުންނަ ފެންވަރަށް ތައުލީމީ ފެންވަރު ގާއިމް ކުރެވިފައި،" ރައީސް ވިދާޅުވި އެވެ.
"އޭގެ އިތުރަށް އެހެން ކަންތައް ވެސް ހުންނާނެ. ވަޒީފާގެ ފުރުސަތުތަކާއި ބޯހިޔާވަހިކަމާ މިހެން ހުރި ކަންތައް ވެސް އެބަހުރި. އެހެންވީމާ ވަށާޖެހޭ ގޮތެއްގައި ތަރައްގީ އެއްވަރަކަށް ބަހާލުމަށް އަޅުގަނޑުމެންގެ މަސައްކަތް ތަރުތީބު ކުރެވިގެން ހިނގަން ފަށާފައި މި އޮތީ."
ރައީސް ވަނީ ތައުލީމު ދިނުމަށް ސަރުކާރުން ފޯރުކޮށްދޭ ފުރުސަތަކީ ރަނުގެ ފުރުސަތެއްގެ ގޮތުގައި ބެލުމަށް ހުރިހާ ދަރިވަރުންނަށް އިލްތިމާސްކުރައްވައިފަ އެވެ.
"ދީނީ ގޮތުން ވަރުގަދަ ބިންގަލެއްގެ މަތީ ބިނާކުރާ އެ ފުރުސަތުގެ ބޭނުން ހިފާ ފުރުސަތަކަށް ހަދަންވާނެ. ދީނުގައި އޮންނަ ގޮތަށް ކަންކަން ކުރުމަކީ ފަރުވާކުޑަ ކުރާ ކަމަކަށް ނުހަދާ، އަހުލާގީ ގޮތުން ރިވެތި އަހުލާގެއް ލިބިގެންވާ ކުއްޖަކަށް ވުމަށް ކޮންމެ ކުއްޖަކު ވެސް އަޒުމް ކަނޑައަޅާ، ޓީޗަރުންނާއި ސްކޫލުގެ ޕްރިންސިޕަލާ ހުރިހާ ބޭފުޅުން ދަންނަވާ ގޮތަށް ސްކޫލުތަކުގައި ހުރިހާ ކުދިން ވެސް ކިޔެވުމުގެ ކަންތައް ގެންދިޔުމަށް [އިލްތިމާސްކުރަން]،" ރައީސް ވިދާޅުވި އެވެ.
ގުޅުން ހުރި - ގާތްގަނޑަކަށް މަސް ދުވަހުގެ ޗުއްޓީއަކަށް ފަހު މިއަދު ދިރާސީ އާ އަހަރުގެ ކިޔެވުން ފެށި އިރު ސަރުކާރުގެ 219 ސްކޫލެއްގައި ކިޔަވައިދޭނެ އެވެ.
ޕްރީ ސްކޫލުން ފެށިގެން ގްރޭޑް 12އާ ހަމައަށް ސަރުކާރުގެ ސްކޫލުތަކުގައި 80،000އަށް ވުރެ ގިނަ ދަރިވަރުން ތައުލީމި ހާސިލްކުރާނެ އެވެ.