ޣައްޒާގައި ނިރުބަވެރި އިސްރާއީލުން ހިންގަމުން އަންނަ ގަތުލުއާއްމު ހުއްޓުވުމަށްޓަކައި މެދުވެރިއެއްގެ ދައުރު ކުޅުން ހުއްޓާލުމަށް ޤަތަރުން ނިންމައިފިއެވެ.
ޤަތަރުން އެގައުމުގެ ނިންމުން ހަމާސް އާއި އިސްރާއީލަށް އަންގާފައިވާއިރު، އެގައުމުން ބުނީ، ގަތުލުއާއްމު ހުއްޓާލުމާއި ބެހޭ ވާހަކަތަކަށް ދެ ފަރާތުންވެސް ސީރިއަސްކަމާއިއެކު މަޝްވަރާކުރަން ބޭނުންކަމަށްވާނަމަ އަލުން މެދުވެރިއަކަށް ވާނެކަމަށެވެ.
އެމެރިކާގެ އޮފިޝަލަކާ ހަވާލާދީ ރޮއިޓާސް އިން ރިޕޯޓްކުރާ ގޮތުގައި ޔަހޫދީންގެ މަދަދުވެރި އެމެރިކާއިން ވަނީ ޤަތަރުން ހަމާސް ޖަމާއަތުގެ ބޭފުޅުން ބޭރުކުރުމަށްޓަކައި އެދިފައިވާކަމަށާއި، މި މެސެޖް ޤަތަރުން ހަމާސް އަށް ފޯރުކޮށްދީފައިވާކަމަށެވެ.
Advertisement
މިކަމާ ގުޅޭ ގޮތުން މައުލޫމާތު ދިން އެހެން އޮފިޝަލަކު ވެސް ވިދާޅުވިގޮތުގައި، ގަތުލުއާއްމުގެ މަޝްވަރާތައް މަޑުޖައްސާލާފައިވުމާއިއެކު، އެތަނުގައި ހުންނަ ހަމާސްގެ ސިޔާސީ އޮފީހުގެ ބޭނުމެއްނެތް ކަމަށް ޤަތަރުންވެސް ވަނީ ނިންމާފައެވެ.
މިކަމާއި ގުޅޭގޮތުން ހަމާސް އިން ބުނީ، ހަމާސްގެ ތިން އޮފިޝަލަކު ވިދާޅުވީ އެ ޖަމާއަތުގެ ލީޑަރުންނަށް ޤަތަރުން މަރުހަބާ ނުކިޔާކަމަށް އެގައުމުން އެ ޖަމާއަތަށް އަންގާފައިނުވާ ކަމަށެވެ.
އެމެރިކާއާއެކު ވެފައިވާ އެއްބަސްވުމެއްގެ ތެރެއިން 2012 ވަނަ އަހަރުން ފެށިގެން ގަތަރުން ހަމާސްގެ ސިޔާސީ ލީޑަރުންނަށް ހޯސްޓްކޮށްފައިވާއިރު، އެ ޖަމާއަތް ޤަތަރުގައި ތިބުމުގެ ސަބަބުން ޣައްޒާގެ ގަތުލުއާއްމާއި މަޝްވަރާތައް ކުރިއަށް ގެންދިއުމަށް ފަސޭހައިން މަގުފަހިވެފައިވާކަން ފާހަގަކޮށްލަން ޖެހެއެވެ.