މައިލޯ އިންޓަ ސްކޫލް ފުޓްބޯޅަ މުބާރާތުގައި މިއަދު ހަވީރު ކުޅުނު 15 އަހަރުން ދަށުގެ މެޗް ފޭދޫ ސްކޫލުން ކާމިޔާބްކޮށްފިއެވެ.
އިރުޝާދިއްޔާ ސްކޫލާއި އެކު ކުޅުނު ވާދަވެރި މެޗް ފޭދޫ ސްކޫލުން ކާމިޔާބް ކުރީ 1-3 ލަނޑުންނެވެ.
މިއަދުގެ މެޗްގައި ފޭދޫ ސްކޫލުން ލަނޑު ޖަހާފައިވަނީ ހަސަން ޒިޔާހް ހާދީ އާއި މުހައްމަދު ހޫދު ހަނީފްއެވެ. ހޫދު ވަނީ 2 ގޯލް ޖަހާފައެވެ. އިރުޝާދިއްޔާ ސްކޫލުން ޖެހި ހަމައެކަނި ލަނޑު ޖެހީ މުޙައްމަދު އަރުހަމް ޝަހީމްއެވެ.
15 އަހަރުން ދަށުގެ އުމުރު ފުރާގެ 4 ސްކޫލެއް ބައިވެރިވެފައިވާ އިރު މި އުމުރުފުރައިން ފައިނަލަށް ދަތުރުކުރާނީ އެންމެ ގިނަ ޕޮއިންޓް ހޯދާ 2 ޓީމެވެ. މިހާތަނަށް ކުޅެ ނިމިފައިވާ މެޗްތަކަށް ބަލާއިރު އިރުޝާދިއްޔާ، ފޭދޫ ސްކޫލް އަދި ފޭދޫ ސްކޫލުން ވަނީ 3 ޕޮއިންޓް ހޯދާފައެވެ. ހިތަދޫ ސްކޫލަކަށް ޕޮއިންޓެއް ލިބިފައި ނުވެއެވެ.
މާދަމާ މުބާރާތުގައި ކުޅޭނީ 13 އަހަރުން ދަށުގެ ދެ މެޗެވެ. ފުރަތަމަ މެޗްގައި ޝަމްސުއްދީން ސްކޫލާއި މަރަދޫ ސްކޫލް ވާދަކުރާއިރު ދެވަނަ މެޗްގައި ކުޅޭނީ ހުޅުދޫ ސްކޫލާއި، ޝަރަފުއްދީން ސްކޫލެވެ.