ނުކުޅެދުންތެރިކަން ހުންނަ ކުއްޖަކަށް އަނިޔާކުރި މައްސަލާގައި ހައްޔަރުކުރި ޓީޗަރަކު ކޯޓުން ދޫކޮށްލައިފި އެވެ.
މާލޭގެ ސްކޫލެއްގެ ޕްރައިމަރީ ގްރޭޑެއްގައި ހާއްސަ އެހީއަށް ބޭނުންވާ ކުދިންނަށް ކިޔަވައިދޭ ބިދޭސީ އަންހެން ޓީޗަރަކު ދަރިވަރަކަށް އަނިޔާ ކުރިކަން އެޑިއުކޭޝަން މިނިސްޓްރީއަށް ސްކޫލުން ހުށަހެޅީ މިދިޔަ ބުރާސްފަތި ދުވަހު އެވެ.
މިކަމާ ގުޅިގެން ފުލުހުން ބުނީ، މިދިޔަ ހުކުރު ދުވަހު ތުހުމަތުކުރެވޭ ޓީޗަރު ކޯޓު އަމުރެއްގެ ދަށުން ފުލުުންގެ ބެލުމުގެ ދަށަށް ގެންގޮސްފައި ވާކަމަށެވެ. އަދި އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ޝަރުތުކޮށް ދޫކޮށްލާފައި ވާކަމަށް ފުލުހުން ބުނެފައި ވެއެވެ.
މި މައްސަލައާ ގުޅިގެން މިދިޔަ ބުރާސްފަތި ދުވަހު މިނިސްޓްރީން ބުނީ، މާލެ ސަރަހައްދުގެ ސްކޫލެއްގެ ޕްރައިމަރީ ގްރޭޑްގައި ތައުލީމު ހާސިލްކުރާ ހާއްސަ އެހީއަށް ބޭނުންވާ ކުއްޖަކަށް ޖިސްމާނީ އަނިޔާ ކުރިކަމަށް ސްކޫލްގެ ފަރާތުން އެ މިނިސްޓްރީގެ ސަމާލު ކަމަށް ގެނެސްފައި ވާކަމަށެވެ. އެއާއެކު އެ މައްސަލަ ފުލުހަށް ހުށަހަޅާފައި ވާކަމަށް އެޑިއުކޭޝަން މިނިސްޓްރީން ވަނީ ބުނެފައެވެ.
ނަމަވެސް ކަމާ ގުޅުންހުރި އިދާރާތަކާ ގުޅިގެން މައްސަލަ ތަހުގީގު ކުރަމުންދާ ކަމަށް ފުލުހުން ބުންޏެވެ.