އީލޮން މަސްކުގެ އާޓިފިޝަލް އިންޓެލިޖެންސް ކުންފުނި، އެކްސްއޭއައިއިން އުފައްދާފައިވާ "ގްރޮކިޕީޑިއާ"ގެ މައުލޫމާތުތައް އޯޕަން އޭއައިގެ ޗެޓްޖީޕީޓީން ބޭނުންކުރަން ފަށައިފި ކަމަށް ރިޕޯޓުތައް ބުނެފިއެވެ. ގްރޮކިޕީޑިއާއަކީ ވިކިޕީޑިއާގައި ކޮންޒަވޭޓިވް ނުވަތަ ކަނާތު ފިޔައިގެ ފިކުރުތަކާ ދެކޮޅަށް ތައައްސަބު އޮންނަ ކަމަށް ބުނެ، އެ ކަމަށް ހައްލެއް ހޯދުމަށް މަސްކު މިދިޔަ އޮކްޓޯބަރު މަހު ތައާރަފުކުރި އެންސައިކްލޮޕީޑިއާއެކެވެ. ނަމަވެސް، މި ވެބްސައިޓުގައި ހުރި ބައެއް މައުލޫމާތުތަކަކީ ހަގީގަތާ ޚިލާފު އަދި ބައެއް ފަރާތްތަކުގެ ހައްގުތަކަށް އުނިކަން އަންނަ ފަދަ މައުލޫމާތުތަކެއް ކަމަށް ބުނެ ގިނަ ބައެއްގެ ފާޑުކިޔުން ވަނީ އަމާޒުވެފައެވެ. "ދަ ގާޑިއަން" ނޫހުން ރިޕޯޓުކޮށްފައިވާ ގޮތުގައި، ޗެޓްޖީޕީޓީގެ އެންމެ ފަހުގެ ވާޝަން ކަމަށްވާ ޖީޕީޓީ-5.2އިން ވަނީ ތަފާތު ސުވާލުތަކަށް ޖަވާބު ދިނުމުގައި ނުވަ ފަހަރަކު ގްރޮކިޕީޑިއާއަށް ހަވާލާދީފައެވެ. މީގެ އިތުރުން، އެންތްރޮޕިކް ކުންފުނީގެ "ކްލޯޑް" އޭއައިއިން ވެސް ގްރޮކިޕީޑިއާގެ މައުލޫމާތު ބޭނުންކުރާކަން ވަނީ ފާހަގަކުރެވިފައެވެ. ގާޑިއަންއިން ބުނާ ގޮތުގައި، ޗެޓްޖީޕީޓީން ގްރޮކިޕީޑިއާގެ އެހީ ހޯދަނީ މާ ބޮޑަށް މަޝްހޫރު ނޫން ނުވަތަ އާންމުކޮށް ބަހުސް ނުކުރެވޭ މައުލޫމާތުތަކާ ގުޅޭގޮތުންނެވެ. ނަމަވެސް، އެމެރިކާގެ ކެޕިޓަލް ހިލްގައި ހިނގި ހަމަނުޖެހުންތަކާއި އެއިޑްސް ބަލި ފަދަ، ގްރޮކިޕީޑިއާގެ ސައްހަކަމާމެދު ސުވާލު އުފެދިފައިވާ މައުލޫމާތުތަކުގައި ޗެޓްޖީޕީޓީން އެ ސައިޓަށް ހަވާލާދީފައެއް ނުވެއެވެ. https://sun.mv/216742 މި ކަމާ ގުޅޭގޮތުން އޯޕަން އޭއައިގެ ތަރުޖަމާނަކު ބުނީ، އެ ކުންފުނީގެ އަމާޒަކީ އާންމުކޮށް ލިބެން ހުންނަ އެކި މަސްދަރުތަކާއި ތަފާތު ފިކުރުތަކުގެ މައުލޫމާތުތައް ބޭނުންކޮށްގެން ޖަވާބުތައް ފުރިހަމަކުރުން ކަމަށެވެ. މަސްކުގެ އެކްސްއޭއައިއިން އުފެއްދި "ގްރޮކް" ޗެޓްބޮޓަކީ މީގެ ކުރިން ވެސް އޭގެ "ނުރައްކާތެރި" އަދި "ޒާތީ" ޖަވާބުތަކުގެ ސަބަބުން ބޮޑެތި ފާޑުކިޔުންތަކެއް އަމާޒުވެފައިވާ އެއްޗެކެވެ. އެ ގޮތުން, އެ ބޮޓް އަމިއްލައަށް "މެކާ ހިޓްލަރު"ގެ ގޮތުގައި ސިފަކޮށްފައިވާކަން ވެސް ފާހަގަކޮށްލެވެއެވެ. އީލޮން މަސްކުގެ އެކްސްއޭއައި ކުންފުނިން "ގްރޮކިޕީޑިއާ" ތައާރަފުކުރީ 2024 ވަނަ އަހަރުގެ އޮކްޓޯބަރު މަހުގައެވެ. މުޅިން ވެސް އާޓިފިޝަލް އިންޓެލިޖެންސް (އޭއައި) ބޭނުންކޮށްގެން މައުލޫމާތު އެއްކުރާ މި ޕްލެޓްފޯމަކީ، އޭގައި ހުންނަ ބައެއް ހަރުކަށި އަދި ބަހުސް ބޮޑު މައުލޫމާތުތަކުގެ ސަބަބުން ފެށުނީއްސުރެ ފާޑުކިޔުން އަމާޒުވެފައިވާ އެއްޗެކެވެ. މީގެ ކުރިން ޗެޓްޖީޕީޓީ ފަދަ އޭއައި މޮޑެލްތަކުން މައުލޫމާތު ނެގުމުގައި ބޮޑަށް ބުރަވެފައިވަނީ ވިކިޕީޑިއާ ފަދަ، އެތައް ބަޔަކު މޮޑަރޭޓްކުރާ އިތުބާރު ހުރި މަސްދަރުތަކަށެވެ. ނަމަވެސް، މިހާރު މި މޮޑެލްތަކުން ގްރޮކިޕީޑިއާގެ މައުލޫމާތު ބޭނުންކުރަން ފެށުމަކީ، އޭއައިއިން ފޯރުކޮށްދޭ މައުލޫމާތުގެ ސައްހަކަމާއި އިންސާފުވެރިކަމާ މެދު އައު ކަންބޮޑުވުންތަކެއް އުފެދިފައިވާ ކަމެކެވެ.