އަޅުގަނޑަކީ ކައިވެނި ރޫޅުމުން ވަރަށް ނިކަމެތި ޙާލުގައި ދިރިއުޅެމުންދިއަ އަންހެނަކީމެވެ. 2 އަހަރުގެ ކުޑަކުޑަ ދަރިފުޅު ބަލަން ޖެހުންވީ އަތްމަތި ދަތިކަން އިތުރުވި ސަބަބަކަށެވެ. މައިންބަފައިންގެ ގެއިން ކޮޓަރިއެއް ލިބިފައި ހުރުމުން ކުލި ދައްކަން ނުޖެހި ދިރިއުޅެވޭކަން އެއީ ސަލާން ޖަހަން ނުޖެހުނު ސަބަބެވެ. 
އަޅުގަނޑު ދިރިއުޅެމުން އައީ ގޭގޭގައި ނޯކިރީކޮށްދީގެންނެވެ. އެގޮތުން މަސައްކަތްކުރަން ލިބުނު އެއްގެއިން އަޅުގަނޑާއިމެދު ކަންކަން ކުރީ ވަރަށް ނިކަމެތިކޮށެވެ. އަނބިމީހާގެ ކަމަކީ ފިރިމީހާ ގޭގައި ނުހުންނަ ވަޤުތުތަކުގައި އަޅުގަނޑަށް އެއްޗެތިގޮވުމެވެ. އޭނާބުނާގޮތުން އެއްވެސް ކަމެއް އަޅުގަނޑަށް ކުރެވެނީ ރަނގަޅަކަށް ނޫނެވެ. 
ނަމަވެސް ފިރިމީހާ ގޭގައި ހުންނައިރު ވާހަކަދައްކަނީ އަޅުގަނޑަށް ތަޢްރީފްކޮށްފައެވެ. ސަބަބަކީ ފިރިމީހާ އަޅުގަނޑު ކުރާ މަސައްކަތް ބަލައިގަނެ ތައްރީފްކުރާކަމެވެ. އަޅުގަނޑު ކައްކާ އެއްޗެތީގެ ރަހަ މީރުކަމަށްވެސް ބުނެއެވެ. އަދި ކުރާ އެހެން މަސައްކަތްތައް ކުރަނީ ރަނގަޅަށް ކަމަށްވެސް ބުނެއެވެ. 
ކޮންމެއަކަސް ފިރިމީހާ ރާއްޖެއިން ބޭރުގައި ހުއްޓައި އަޅުގަނޑު މަސައްކަތުން ދުރުކޮށް ފޮނުވައިލިއެވެ. އެދުވަހު ވަރަށް ދެރަވިއެވެ. ނަމަވެސް ﷲ އަށް ވަކީލްކޮށް ކެތްތެރިވީމެވެ. އެހެން ގެއަކުން މަސައްކަތް ލިބުމުން އެގޭގައި މަސައްކަތްކުރަން ފެށީމެވެ. 
އެއިގެ 3 އަހަރު ފަހެވެ. އެއީ ހުކުރު ދުވަހެކެވެ. ދަރިފުޅު ގޮވައިގެންގޮސް އަޅުގަނޑު އުޅުނީ އިސްލާމީ މަރުކަޒު ކުރިމަތީގައެވެ. މީހަކު އަޅުގަނޑަށް ގޮވާލުމުން ބަލައިލިއިރު ހުރީ ކުރިން މަސައްކަތްކުރި ގޭގެ ވެރިމީހާއެވެ. 
އޭނާ އަޅުގަނޑުގެ ޙާލުގެ ވާހަކަ އެހުމުންނާއި އެގެދޫކޮށްފައި ދިއަ ގޮތާއިމެދު ސުވާލުކުރުމުން ކަންކަން ހިނގި ގޮތް ކިޔައިދިނީމެވެ. އަޑުއަހާފައި ބުނީ ފަހުން އަޅުގަނޑާއި ބައްދަލުކުރާނެ ކަމަށެވެ. އޭނާ ދިއައީ އަޅުގަނޑުގެ ނަންބަރުވެސް ހިފައިގެންނެވެ. 
އެއިގެ 2،3 ދުވަސްފަހުން އޭނާ އަޅުގަނޑާއި ބައްދަލުކޮށްފައި ބުނީ އޭނާގެ އަނބިމީހާ ބޭވަފާތެރިވުމުން ވަރިކޮށްފިން ކަމަށާއި އަޅުގަނޑާއި ކައިވެނިކުރަން ބޭނުންވާ ކަމަށެވެ. 2 ދަރިން ބަލަނީވެސް އޭނާ ކަމަށާއި އަޅުގަނޑަކީ އެ 2 ދަރިން ރަނގަޅުގޮތުގައި ބަލަހައްޓަން އެންމެ ރަނގަޅު މީހަކު ކަމުގައި ޤަބޫލުކުރާ ކަމަށެވެ. އޭނާގެ މިޒާޖާއި ޢަމަލުތައް ހުންނަ ގޮތާއި އަޚްލާޤް އަޅުގަނޑަށް އެނގޭތީ ދެކޮޅެއް ނުހަދަމެވެ. އޭނާގެ ހުށަގހެޅުން ޤަބޫލުވެސްކުރީމެވެ. 
ހަފްތާއެއްހައި ދުވަހުގެ ތެރޭގައި އަޅުގަނޑު އޭނާގެ ގެއަށް ގެންދިއައީ ކައިވެނިކޮށްގެންނެވެ. އޭނާގެ 2 ކުދިންނަކީ ކުރިން އަޅުގަނޑު ބެލެހެއްޓި 2 ކުދިންކަމަށްވުމުން ދެކުދިންދެކެ އަޅުގަނޑުގެ ހިތުގައި ކުރިންވެސް ވަނީ ލޯބި އުފެދިފައިކަމުން ދެކުދިން ބަލަމުން އައީ އަމިއްލަ ދަރިން ފަދައިންނެވެ. 
މިއީ އެއިގެ 33 އަހަރުފަހެވެ.  ދެމަފިރިންގެ 2 ދަރިންނާއިއެކު 5 ދަރިން ބޮޑުވެ އެތިބީ ރަނގަޅު ވަޒިފާތަކުގައެވެ. 2 ދަރިން އަމިއްލަ މަސައްކަތްވެސް ކުރެއެވެ. އަޅުގަނޑު ގެއިން ބޭރުކޮށްލި ފިރިމީހާގެ ކުރީގެ އަނބިމީހާ ނުކުޅެދޭ ޙާލުގައި ބަލާނެ މީހަކު ނުވުމުން ފިރިމީހާ ވަނީ އޭނާވެސް ގެއަށް ގެނެސްފައެވެ. އެއީ 2 ދަރިންގެ މަންމަ ކަމަށްވުމުން އެހީތެރިވުމަށެވެ. 
އޭނާ އަޅުގަނޑާއިމެދު ކަންކަންކުރި ގޮތް ހަނދާނަކު ނުބަހައްޓަމެވެ. ބަލަނީ ވީހާވެސް ރަނގަޅަކަށް އޭނާއަށް ކަންކަން ކޮށްދެވޭތޯއެވެ. އޭނާގެ ކަންކަން ބަލަހައްޓަން މީހަކު ގެންގުޅެމެވެ. އޭނާއަށް އިތުބާރުކުރި ނަމަވެސް އޭނާގެ މަސައްކަތްތައްވެސް ބަލަމެވެ. އުޚުތަކު ފަދައިން ވާހަކަ ދައްކަމެވެ. ބައެއް ކަންކަންވެސް ކޮށްދެމެވެ. 
މިއަދުނޫހުގެ ކިޔުންތެރިންނަށް ބުނެލަން ބޭނުންވަނީ އެއްވެސް މީހަކު ދެރަކޮށް ހިތުގައި ނުޖައްސާށެވެ. ކިތަންމެ ދެރަ މީހާއަށްވެސް ހެޔޮކޮށް ކަންކަން ކުރާށެވެ. އެއްވެސް މީހަކާއިމެދު މާދަމާ ކަންކަންވާނެ ގޮތެއް ނުއެނގޭނެއެވެ. ތިބާއަށް ދެރައެއް ދެވޭ ނުވަތަ ހިތުގައި ޖައްސައި ނިކަމެތިކޮށްލެވޭ މީހާއަށް ތިބާ ބަލަހައްޓަން ނުވަތަ އެހީތެރިވާންވެސް ޖެހިދާނެއެވެ. އެހުންނަނީ އެކަކަށްވެސް އެނގޭނެ ކަންކަމެއް ނޫނެވެ.
 
- އިޙްޞާނާ / މިއަދުނޫހުގެ ކިޔުންތެރިއެއް