މާލެއާ އެއްފެންވަރަށް ތައުލީމީ ފެންވަރު އަތޮޅުތެރޭގައި ނެތް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.ހުޅުމާލެ ފޭސް 2ގައި އަލަށް އިމާރާތްކުރި ޝަހީދު އަލީ ސްކޫލު ރަސްމީކޮށް ހުޅުވުމަށް މިއަދު އެ ސްކޫލުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން ރައީސް ވިދާޅުވީ މަސައްކަތް ކުރާނީ އެންމެ މަތީ ފެންވަރުގައި ތައުލީމީ ކަންތައްތައް ތަރުތީބު ކުރުމަށް ކަމަށެެވެ. އެކި ސަބަބުތަކަށްޓަކާ އަތޮޅުތެރެއިން މާލެއަށް އަންނަންޖެހޭ ކަމަށާއި މި އަހަރު ވެސް 1،500އަށް ވުރެ ގިނަ ދަރިވަރުން ރަށްރަށުން މާލެ ބަދަލުވިކަން ފާހަގަކުރައްވައި ރައީސް ވިދާޅުވީ އޭގެ މާނައަކީ ރަށްރަށުގައި މާލެއާ އެއްފެންވަރަށް ތައުލީމީ ފެންވަރު ނެތުން ކަމަށެވެ."1،500އަށް ވުރެ ގިނަ ކުދިން، އޭގެ މާނައަކީ 5،000އަށް ވުރެ ގިނަ ފަރާތްތައް މިވަނީ ރަށްރަށުން މާލެ ބަދަލުވެފައި ސްކޫލުތަކަށް ކުދިން ވައްދަން. އެގެ މާނައަކީ ރަށްރަށުގައި ނެތިއްޔޭ އަދިވެސް މާލޭގައި މި ހުންނަ ފެންވަރަށް ތައުލީމީ ފެންވަރު ގާއިމް ކުރެވިފައި،" ރައީސް ވިދާޅުވި އެވެ.މި އަހަރުގެ ދިރާސީ އަހަރުގެ ކިޔެވުން 219 ސްކޫލެއްގައި ފެށީ 77،000 އަށްވުރެ ގިނަ ދަރިވަރުންނާއި 9،000 އަށްވުރެ ގިނަ ޓީޗަރުންނާއެކުގަ އެވެ.މި އަހަރު ސަރުކާރު ސްކޫލްތަކުގައި ގްރޭޑް އެކެއްގައި ކިޔަވަން 4،000 އަށްވުރެ ގިނަ ދަރިވަރުން ބަދަލުވިއިރު، އޭގެ ތެރޭގައި މާލެ ސަރަހައްދުން ގްރޭޑް އެކެއްގައި ކިޔަވާނެ 1،700 އަށް ގިނަ ދަރިވަރުން ހިމެނެ އެވެ.މީގެއިތުރުން އަތޮޅުތެރެއިން މާލެއަށް 1،500 އަށްވުރެ ގިނަ ދަރިވަރުން ބަދަލުވިއިރު، އޭގެ ތެރެއިން އެންމެ ގިނަ ދަރިވަރުން ބަދަލުވީ ހުޅުމާލެއަށެވެ. އެއީ 800 އަށްވުރެ ގިނަ ދަރިވަރުންނެވެ.