ޕީޕީއެމްގެ ޕްރައިމަރީގައި ވާދަކުރައްވާ އުމަރު ނަސީރު ދައްކަވާފައިހުރި ވާހަކަތަކުންނާއި އޭނާ ސާބިތުކޮށްދެއްވި ހިތްވަރުން މިރާއްޖޭގެ ރައީސްއަކަށް އުމަރު ވަޑައިގަތުމުގެ ގާބިލުކަން އެބަހުރި ކަމަށް ކުރީގެ ރައީސް މައުމޫން ސަރުކާރުގެ އެތަކެއް ވުޒާރާއެއް ހިންގެވި އިލްޔާސް އިބްރާހިމް ރޭ ވިދާޅުވެއްޖެ އެވެ.
"ޓީމް އުމަރު" ގެ ފަރާތުން ރޭ އާޓިފިޝަލް ބީޗުގައި ބޭއްވި ޖަލްސާގައި ވާހަކަފުޅުދައްކަވަމުން ރައީސް މައުމޫންގެ އަނބިކަނބަލުން ނަސްރީނާ އިބްރާހިމްގެ ބޭބޭފުޅު އިލްޔާސް އިބްރާހިމް ވިދާޅުވީ 2008 ވަނަ އަހަރުގެ ރިޔާސީ އިންތިހާބަށްފަހު ސަރުކާރު ޒިންމާދާރުކުރުވާ ޕާޓީއަކަށް ޑީއާރުޕީއަށް ވެގެންދިޔަ ނަމަވެސް ކަންކަން އެންމެ ފުރިހަމައަށް ނުކުރެވުމުގެ ސަބަބުން ރައީސް މައުމޫން ޕީޕީއެމް އުފެއްދެވި ކަމަށެވެ.
އަދި ޕީޕީއެމް އުފެއްދުމަށްފަހު ކުރަމުން އައި މަސައްކަތްތަކަކީ ރާއްޖެއަށް ދިމާވެފައިވާ ކަންތައްތަކާއި އޭރު ދިމާވަމުން ދިޔަ ކަންތައްތަކުން ދިވެހި ގައުމާއި ރައްޔިތުން ސަލާމަތްކޮށްދިނުމަށް ކުރެވުނު މަސައްކަތްތަކެއް ކަމަށާއި އެމަސައްކަތްތަކުގައި އެންމެ ބޮޑު އެހީތެރިކަމެއް އަމަލީ ގޮތުން ސާބިތުކޮށްދެއްވި ބޭފުޅަކީ ވެސް އުމަރު ނަސީރު ކަމަށް އިލްޔާސް ވިދާޅުވި އެވެ.
"އުމަރު ނަސީރުގެ ރިޕޯޓު އަޅުގަނޑު ވަރަށް ރަނގަޅަށް ވިސްނާލައިފިން، އޭގައި ފެނިގެންދިޔަ ހުރިހާ ކަމަކީ އަޅުގަނޑަށް އެކަންކަން ފެނިގެންދިޔައިރު ލޮލުން ފެނިފައިވާ ކަންކަމެއް ނޫން، އެހެންނަމަވެސް އުމަރު އެދައްކަވާ ވާހަކަފުޅުތަކުންނާއި އެ ސާބިތުކޮށްދެއްވި ހިތްވަރުން އަޅުގަނޑު ދަންނަވާނީ މިރާއްޖޭގެ ރައީސްއަކަށް އުމަރު ވަޑައިގަތުމުގެ ހަމަ ހުރިހާ ވެސް ގާބިލުކަމެއް އެބަހުރި." އާޓިފިޝަލް ބީޗުގައި އުމަރާއި ބެހޭގޮތުން ދެއްކި ރިޕޯޓާއި ބެހޭގޮތުން އިލްޔާސް ވިދާޅުވި އެވެ.
އިލްޔާސް އިތުރަށް ވިދާޅުވީ އޭނާ ސިޔާސީ ކަންކަމުގެ ތެރެއަށް ވަޑައިގަންނަވަން އަދި ނުވިސްނަވާ ކަމަށާއި ނަމަވެސް މުލަކު ދާއިރާގެ މެންބަރު އަބްދުﷲ ޔާމީން އަބްދުލްގައްޔޫމްއަށާއި އުމަރު ނަސީރަށް ވެސް ތާއީދުކުރައްވާނެ ކަމަށެވެ. އަދި އުމަރާއެކު ހުންނެވި ނަމަވެސް ރިޔާސީ ޓިކެޓަށް ވާދަކުރައްވާ ޔާމީނާއި މެދު މައްސަލައެއް ނެތް ކަމަށާއި އެބޭފުޅާގެ ޖަލްސާތަކަށާއި ދަންނަވާލާ ކަންތައްތަކަށް ވަޑައިގަންނަވާނެ ކަމަށެވެ.
"ހުރިހާ ގޮތަކަށް ވިސްނިޔަސް، ސަރުކާރުގެ މަތީ މަގާމެއް އަދާކޮށްފައި ނެތް ކަމުގައިވިޔަސް އުމަރު ނަސީރަކީ އެކަމަށް އެންމެ ގާބިލް އެންމެ އެކަށީގެންވާ އެއް ބޭފުޅެކޭ، އެކަން އޭނާ ސާބިތުކޮށްދެއްވީ އޭނާގެ އަމަލުންނާއި ބަހުންނާއި، ހަގީގަތުގައި މުސްތަގުބަލަށް ވެސް އަޅުގަނޑު ދަންނަވާލަން އޮތީ އަމަލުން އެކަން ފުރިހަމަކޮށްދެއްވަމުން ގެންދަވާށޭ، ބަސް މާ ގިނަ ކުރައްވައިފިއްޔާ ގިނަ ފަހަރަށް ހުންނާނީ ކެއްސިވެފައި." އިލްޔާސް ވިދާޅުވި އެވެ.
އިލްޔާސް އިބްރާހިމް ވިދާޅުވީ އަޅުގަނޑުމެން ކުޑަ ކުޑަ މުޖުތަމައުއެއްގައި އެންމެ ބޮޑު އިސްކަމެއް ދޭންޖެހޭނީ ބައިބައިނުވެ އެކަތިގަނޑަކަށްވެގެން ގައުމަށާއި ރައްޔިތުންނަށް ފައިދާހުރި ގޮތްތަކެއް ހޯދޭތޯ ވިސްނުންކަމަށާއި ޕީޕީއެމްއިން މަސައްކަތްކުރަމުން އަންނަނީ ގައުމަށް ރަނގަޅު ފައިދާހުރި، އަދި ރައްޔިތުންނަށް ދުޅަހެޔޮ އުފާވެރި ދުވަސްތަކެއް ހޯދާދެވޭނެ ސަރުކާރެއް ގާއިމުކުރުމަށް ކަމަށެވެ.
އިލްޔާސް އިތުރަށް ވިދާޅުވީ ކޮންމެ ވިސްނުމެއްގައި ކޮންމެ މީހަކު ހުރި ނަމަވެސް ޕީޕީއެމްއަށް އަންނަ ރިޔާސީ އިންތިހާބު ކާމިޔާބުކުރެވޭތޯ މަސައްކަތްކުރަންޖެހޭ ކަމަށާއި ޕީޕީއެމް ތެރޭގައި ބައިބައިވުމެއް އުފެދިއްޖެ ކަމުގައިވަންޏާ އެއީ ވަރަށް ދެރަ ކަމަކަށްވެގެން ދާނެ ކަމަށެވެ. ނަމަވެސް އެހެން ނުވާނެ ކަމަށް ހީފުޅުކުރައްވާ ކަމަށް ވެސް އިލްޔާސް ރޭ ވިދާޅުވި އެވެ.