ރާއްޖެ ފަދަ ގައުމަކުން ވޯލްޑް ކަޕް ކުޅެ އެ ޓްރޮފީ ހޯދާ ދުވަހަކުން ކޮކާކޯލާ ފަޚުރުވެރިވާނެ ކަމަށް ކޮކާކޯލާ ސައުތު ވެސްޓް ރީޖަން އޮޕަރޭޝަންސްގެ ނައިބު ރައީސް ޑެބަބްރާތާ މުކަރްޖީ ވިދާޅުވެއްޖެއެވެ.
ކޮކާކޯލާ ވޯލްޑް ކަޕް ޓްރޮފީ ޓުއާގައި ރާއްޖެއަށް ޓްރޮފީ ގެނައުމަށްފަހު ނޫސްވެރިންނަށް މައުލޫމާތު ދެއްވަމުން ވޯލްޑް ކަޕް ޓްރޮފީ ޓުއާގައި ކޮކާކޯލާގެ އެންމެ އިސް ފަރާތެއްގެ ގޮތުގައި ބައިވެރިވި ޑެބަބްރާތާ މުކަރެޖީ ވިދާޅުވީ، ރާއްޖެއިން ވޯލްޑް ކަޕް ޓްރޮފީއަށްކީ ހޫނު މަރުހަބާއެއް ކަމަށާއި ރާއްޖެއަކީ ފުޓުބޯޅައިގެ ޖޯޝުން ފުރިފައިވާ ތަނެއްކަން އެނގިއްޖެ ކަމަށެވެ.
ޓްރޮފީގެ ބޭނުމަކީ ކުދިންގެ ހިތްތަކުގައި ވޯލްޑް ކަޕް ހޯދުމަށް އަޒުމް ކަނޑައެޅުން ކަމަށާއި، އަދި ރާއްޖެ ފަދަ ގައުމަކުން ވޯލްޑް ކަޕް ކުޅެ އެޓްރޮފީ ހޯދާ ދުވަހަކުން ކޮކާކޯލާ ފަޚުރުވެރިވާނެ ކަމަށްވެސް އޭނާ ވިދާޅުވިއެވެ. ޑެބަބްރާޓާ މުކަރެޖީ ވިދާޅުވީ އޭޝިއާގައި ފުޓުބޯޅައިގެ ލޯބި އިތުރުވަމުންދާ ކަމަށާއި، އޭނާގެ އުންމީދަކީ ރާއްޖެއަކީ އެކަމަށް މުހިއްމު ރޯލެއް ކުޅޭ ގައުމަކަށް ހެދުން ކަމަށެވެ.
ކޮކާކޯލާ ކުންފުނީގެ ސައުތު ވެސްޓް އޭޝިއާ ރީޖަންގެ ޕަބްލިކް އެފެއާޒް އެންޑް ކޮމިއުނިކޭޝަންސް ވިޝްޔަކް އަމްޖަދު ވިދާޅުވީ ފުޓުބޯޅަ ކުރިއަރުވަން ބޭނުންވަނީ އަދަދު ގިނަވުމެއް ނޫން ކަމަށާއި ފުޓުބޯޅައަށް ބޭނުންވާނީ ފުޓުބޯޅައަށް ޝައުގުހުރެ، ފުޓުބޯޅައަށް ލޯބިކުރިން ކަމަށެވެ. އަދި މި ކުޑަ ރާއްޖެއިންވެސް ދުނިޔޭގެ އެންމެ މަތީ ފަންތީގެ ކުޅުންތެރިން އުފެއްދިދާނެ ކަމަށާއި، 2008 ވަނަ އަހަރު ސާފް ޗެމްޕިއަންޝިޕްގައި ރާއްޖެއިން އެކަން ސާބިތުކޮށްދީފި ކަމަށެވެ. އަދި މި ދަތުރުގެ ބައިވެރިއަކަށްވުމަށް ކޮކާކޯލާ ތައްޔާރަށް އޮތް ކަމަށްވެސް އޭނާ ވިދާޅުވިއެވެ.
ކޮކާކޯލާ ވޯލްޑް ކަޕް ޓްރޮފީ ޓުއާގައި ފީފާ ވޯލްޑް ކަޕްގެ ޓްރޮފީ ރާއްޖެ ގެނައިރު، ކޮކާކޯލާގެ ގިނަ އޮފިޝަލުންތަކެއްވަނީ ރާއްޖެ ވަޑައިގެންފައެވެ.