މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ހާއްސަ އިނާމާ ބެހޭ ފަންނީ ކޮމިޓީ އަލުން އެކުލަވާލައްވައިފި އެވެ.
ރައީސް އޮފީހުން ބުނީ މި ކޮމިޓީ ރައީސުލްޖުމްހޫރިއްޔާ އަލުން އެކުލަވާލެއްވީ ކޮމިޓީގެ މުއްދަތު މިދިޔަ އަހަރުގެ ނިޔަލަށް ހަމަވުމުން ކަމަށެވެ.
ކޮމިޓީގެ ޗެއާމަނަކަށް ހަމަޖެއްސެވީ މިނިސްޓަ އޮފް ފޮރިން އެފެއާޒް ޑރ. މުހައްމަދު އާސިމެވެ.
ކޮމިޓީގައި ހިމެނިވަޑައިގަންނަވާ އެހެން ބޭފުޅުންނަކީ، މ. ދާޝިން ޑރ. އިބްރާހީމް ޒަކަރިއްޔާ މޫސާއާއި، މ. އެމޭޒަން ޑރ. މަރިޔަމް ސުޒީ އާދަމާއި، މއ. ވިލާރޮދި އައިޝަތު ޝާހީނާއި، ވިލިމާލެ، އަކީލާ ޑރ. އަބްދުލްއަޒީޒް ޔޫސުފެވެ.
މަތީ ދަރަޖަ ހޯދާ ފަރާތްތަކަށް ހާއްސަ އިނާމު ދެއްވުމުގެ މަގުސަދަކީ، ރާއްޖެއަށް ރީތި ނަން ހޯދައިދޭ ފަރާތްތަކުގެ ކާމިޔާބީއާއި، ހިތްވަރާއި ހުނަރުން މަތީ ވަނަތައް ހޯދާ ފަރާތްތަކުގެ ކާމިޔާބީ އިހްތިފާލު ކުރުމާއި، މިފަދަ ކާމިޔާބީތައް ހޯދުމަށް ހިތްވަރު ދިނުމާއި، ރާއްޖެއަށް ބޭނުންވާ ދާއިރާތަކަށް ދިވެހިންގެ އުފެއްދުންތެރިކަމާއި މަސައްކަތްތެރިކަން މިސްރާބު ކުރުމެވެ.
ހާއްސަ އިނާމު ދެއްވުމަށް ހަމަޖައްސަވާފައިވަނީވެސް މިއަހަރުގެ މިނިވަން ދުވަހުގެ މުނާސަބަތުގައި ބާއްވަވާ ރަސްމިއްޔާތުގައި ކަމަށްވެސް ރައީސް އޮފީހުން ވަނީ ބުނެފަ އެވެ.