އަހުމަދު އަރުޝަދު
2013 ވަނަ އަހަރު ރިޔާސީ އިންތިޙާބު ކާމިޔާބުކުރައްވާނީ ޕްރޮގްރެސިވް ޕާޓީ އޮފް މޯލްޑިވްސް އިން ކަމަށާއި އެ އިންތިޙާބުގައި ވާދާކުރެއްވުމަށްޓަކައި ޕީޕީއެމްގެ މެނިފަސްޓޯ ވަރަށް އަވަހަށް އެކުލަވާލައި ހާމަކުރާނެކަމަށް ޕީޕީއެމުގެ އިންތިގާލީ ރައީސް އަލްޢުސްތާޒް މައުމޫން އަބްދުލް ޤައްޔޫމް ވިދާޅުވެއްޖެއެވެ.
އާޓިފިޝަލް ބީޗުގައި ރޭ ބޭއްވި ޖަލްސާގައި މައުމޫން އިތުރަށް ވިދާޅުވީ އެ ޕާޓީން 2013 ގެ އިންތިޙާބު ކާމިޔާބުކުރައްވާނީ ވެރިކަމުގެ ދަހިވެތިކަމުގަ ނުވަތަ ނާޖާއިޒު ފައިދާ ހޯދުމުގެ ނިޔަތެއްގައި ނޫން ކަމަށެވެ. އަދި ވިދާޅުވީ އެ ޕާޓީން މަސައްކަތް ކުރާނީ ޤައުމުގެ މުސްތަޤްބަލަށް ކަމަށެވެ.
ޕީޕީއެމުން ނެރޭ މެނިފެސްޓޯގައި ރައްޔިތުންގެ ބައިވެރިވުމާއި ޙިޔާލު ހިމަނާނެކަމަށް ތިރީސް އަހަރު ރައީސްކަން ކުރައްވާފައިވާ މައުމޫނު ވިދާޅުވި އެވެ.
ޕީޕީއެމްގެ ވިސްނުމެއްގެ ގޮތުގައި އަބަދުވެސް ގެންގުޅެނީ މުސްތަޤްބަލުގައި ކަންކަން ރާވައި ރައްޔިތުންނަށް އުފާ ފާގަތި ތަނަވަސްކަން ގެނެސްދެވެނޭ ގޮތްތަކެއް ހޯދައިދިނުންކަމުގައި އެމަނިކުފާނު ވިދާޅުވި އެވެ.
"މި ޕާޓީ އަކީ ފަހަތަށް ބަލާނެ ޕާޓީއެއް ނޫން. މި ޕާޓީން އަބަދުވެސް މަސައްކަތްކުރާނީ ގައުމުގެ މުސްތަގުބަލަށް. ޕާޓީން ފަހަތަށް ބަލާނީ އިބްރަތެއް ހާސިލްކުރުމަށް އެކަނި،" މައުމޫން ވިދާޅުވިއެވެ.
އާޓިފިޝަލް ބީޗްގައި ބޭއްވި ޖަލްސާގައި ޕީޕީއެމްގެ އިސް ބޭފުޅުންގެ އިތުރުން ގިނަ އަދަދެއްގެ އާންމުން ވަނީ ބައިވެރިވެފަ އެވެ.