މާޗް މަހުން ފެށިގެން ކަރަންޓް ބިލަށް ގެނައި ބަދަލާ ގުޅިގެން ފާއިތުވި ދެ މަހުގެ ކަރަންޓް ބިލް ނުދައްކައި އޮއްވައި ހިތަދޫގައި ހުންނަ ޕްރައިވެޓް ހޮސްޕިޓަލް އައިއެމްޑީސީން މިއަދު ކަރަންޓް ކަނޑާލައިފި އެވެ. ކުރީގެ ހެލްތު މިނިސްޓަރު ޑރ. މަރިޔަމް ޝަކީލާގެ ހިއްސާ އޮންނަ ކުންފުންޏަކުން ހިންގާ އައިއެމްޑީސީީގެ އިތުރަށް ހިތަދޫގައިި ހުންނަ ސިމްޑީގެ ޝޯ ރޫމުން ވެސް އިއްޔެ ހަވީރު ވަނީ ކަރަންޓް ކަނޑާލައިފަ އެވެ. އައިއެމްޑީގެ އޮފިޝަލަކު މިއަދު "ހަވީރަ" ށް ވިދާޅުވީ އެ ހޮސްޕިޓަލުން ކަރަންޓް ކަނޑާލީ މެންދުރު ފަހު 1:15 ގައި ކަމަށެވެ. އޭނާ ވިދާޅުވީ ކަރަންޓް ކަނޑާލުމާ ގުޅިގެން ހޮސްޕިޓަލްގެ މަސައްކަތްތައް ހުއްޓުމަކަށް އައިސްފައިވާ ކަމަށެވެ. އަދި އެތަނުފައި މި ވަގުތު 12 ޕޭޝަންޓަކު އެޑްމިޓްކޮށްގެން ވެސް ފަރުވާ ދެމުން ދަނިކޮށް، ކަރަންޓް ކަނޑާލުމުން ވަރަށް ބޮޑު ހާސްކަމެއްގެ ތެރޭގައި ތިބި ކަމަށް އޮފިޝަލް ވިދާޅުވި އެވެ. އަޅުގަނޑުމެންގެ ހުރޭ ބެކަޕް ސިސްޓަމެއް ވެސް. އެކަކު އޭތި މި ވަގުތު ހުރީ ޓެކްނިކަލް މައްސަލައެއް ދިމާވެގެން ބޭނުން ކުރެވޭ ކަހަލަ ހާލަތެއްގައެއް ނޫން. އެހެންވެ މިކަމަށް ހައްލެއް ހޯދޭނެ ގޮތަކާ ބެހޭ ގޮތުން މަޝްވަރާ ކުރަމުން މި އަންނަނީ.--އޮފިޝަލް އޭނާ ވިދާޅުވީ އައްޑޫގައި ހުރި ހަމައެކަނި ޕްރައިވެޓް ހޮސްޕިޓަލުން ކަރަންޓް ކަނޑާލި މައްސަލާގައި ކޯޓް އަމުރެއްގެ ދަށުން ވެސް ހިދުމަތް އަލުން ލިބޭތޯ މަސައްކަތް ކުރަަމުން އަންނަ ކަމަށެވެ. "އަޅުގަނޑުމެންނަށް ހީވަނީ ހޮސްޕިޓަލަކުން ކަރަންޓް ކަނޑާލާ އިރު އެކަމާ ދޭތެރޭ އެކަން ކުރި ބަޔަކު ވެސް ވަރަށް ފުންކޮށް ވިސްނަން ޖެހޭނެހެން،" އޭނާ ވިދާޅުވި އެވެ. "މިއީ ރައްޔިތުންނަށް ދެވޭ ވަރަށް ބޮޑު އަނިޔާއެއް." ހިތަދޫގައި ހުންނަ އައިއެމްޑީސީ ހޮސްޕިޓަލްގެ ޑެންޓަލް ކްލިނިކްގައި މީހަކަށް ފަރުވާ ދެނީ: ކަރަންޓް ކަނޑާލުމުން ހޮސްޕިޓަލް ވަނީ ހުއްޓުމަކަށް އައިސްފައި. ހަވީރު ފައިލް ފޮޓޯ އައިއެމްޑީސީން ކަރަންޓް ކަނޑާލައިފައި މި ވަނީ މާޗް މަހުން ފެށިގެން ބިލަށް ގެނައި ބަދަލާ ގުޅިގެން، އެ މައްސަލަ އަށް ހައްލެއް ހޯދައިދޭން ފެނަކަ ކޯޕަރޭޝަނަށް ސިޓީ ވެސް ފޮނުވައިފައި ވަނިކޮށެވެ. އެކަމަކު އެ ސިޓީއަކަށް އަދި ޖަވާބެއް ނުލިބެ އެވެ. އައްޑޫގެ ވަރަށް ގިނަ ވިޔަފާވެރިން ވަނީ ކަރަންޓްގެ އަގު ބޮޑު ކުރި މައްސަލަ ފެނަކައިގެ އިތުރުން ކޯޓަށް ވެސް ހުށަހަޅައިފަ އެވެ. ބިލް ނުދައްކައިގެން ހިތަދޫގެ ފިހާރަކުން ރޭ ކަނޑާލުމުން އެ ރަށު މެޖިސްޓްރޭޓް ކޯޓުން ވަނީ އެ މައްސަލާގައި ފެނަކަ އަށް ވަކި ގޮތެއް އަންގަންދެން ކަރަންޓް ދީފައި ބޭއްވުމަށް ވަގުތީ އަމުރެއް ވެސް ނެރެފަ އެވެ.