ޕީޕީއެމްގެ ޕްރައިމަރީގައި ވާދަކުރައްވާ އުމަރު ނަސީރަށް މަޝްހޫރު މަހުޖަނު އަދި ޖުމްހޫރީ ޕާޓީގެ ލީޑަރ ޤާސިމް އިބްރާހިމް ހަރަދުކުރައްވާކަމަށް ދެކެވޭ ވާހަކަތައް ޖުމްހޫރީ ޕާޓީން ދޮގުކޮށްފިއެވެ.
ޖުމްހޫރީ ޕާޓީން ނެރުނު ނޫސްބަޔާނެއްގައި ބުނެފައިވަނީ އެ ޕާޓީގެ ޕާލަމެންޓްރީ ގްރޫޕުގެ މެންބަރު އަދި ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެންބަރ ޢަބްދުﷲ ޢަބްދުއްރަޙީމް ރައްޔިތުންގެ މަޖިލީހުގައި ޖަލްސާއެއްގައި އުމަރު ނަސީރަށް ޤާސިމް ހަރަދުކުރައްވާކަމަށާއި ޤާސިމް މަސައްކަތް ކުރައްވަމުން ގެންދަވަނީ ޕީޕީއެމްގެ ތެރޭގައި ބަޢާވާތް ކުރައްވަންކަމަށް ވިދާޅުވި ވިދާޅުވިމަކީ ޒިންމާދާރުކަންކުޑަ ވާހަކަތަކެއްކަމުގައެވެ.
އަދި އަބްދުﷲ އަބްދުއްރަހީމްގެ ވާހަކަތަކަކީ ޖުމްހޫރީ ޕާޓީއާއި ޤާސިމްގެ އަގުވެއްޓޭގޮތަށް ވަރަށް ޒިންމާދާރުކަން ކުޑަގޮތަކަށް ދައްކާފައިވާ ވާހަކަތަކެއްކަމަށާއި އެވާހަކަފުޅާމެދު ހިތާމަކޮށް އެޢަމަލް ކުށްވެރިކުރާ ކަމަށްވެސް ޖުމްހޫރީ ޕާޓީގެ ބަޔާނުގައި ބުނެފައިވެއެވެ.
".. ޖުމްހޫރީ ޕާޓީގެ ލީޑަރަކީ އެއްވެސް އިރެއްގައި އެއްވެސް ޕާޓީއެއްގެ ތެރޭގައި ހަމަނުޖެހުމެއް އުފެއްދުމަށް އެހީތެރިވެދޭ ނުވަތަ ހިތްވަރުދޭނެ ބޭފުޅެއް ނޫންކަމަށާއި، އެފަދަ ތުހުމަތުތައް ޕާޓީގެ ލީޑަރުގެ އިސްތަށިފުޅުގައި އެޅުއްވުމަށް އެއްވެސް ބޭފުޅަކު މަސއްކަތްކުރެއްވުމަކީ އެގޮތަށް މަސައްކަތްކުރައްވާ ބޭފުޅުންގެ ޒިންމާދާރުކަން ކުޑަކަން ދޭހަވާ ކަމެއްކަމުގައި މިޕާޓީން ގަބޫލްކުރަމެވެ"
އަދި މިހާރުގެ ސަރުކާރުގެ ޤާނޫނީ ސައްހަކަމާއި ދޭތެރޭ ޢަބްދުﷲ ޢަބްދުއްރަހީމް ދައްކަވާފައިވާ ވާހަކަތަކަކީ ޖުމްހޫރީ ޕާޓީގެ ނިންމުމެއް ނުވަތަ ޕާޓީގެ ފިކުރެއް ނޫންކަމަށާއި، އެތުހުމަތުތަކަކީ ޢަބްދުﷲ އަބްދުއްރަޙީމް އަމިއްލަފުޅަށް، އަމިއްލަފުޅު ފިކުރުގައި ދައްކަވާފައިވާ ވާހަކަފުޅުތަކެއްކަމަށްވެސް ޖޭޕީގެ ބަޔާނުގައި ބުނެފައިވެއެވެ.