ރައީސް ޔާމީނު ވިދާޅުވީ އެމަނިކުފާނުގެ ވެރިކަމުގައި ފެށުނީއްސުރެ ހުޅުމާލެއިން ބިން ވިއްކަމުން އައި ގޮތް ތަހުގީގުކުރުމަށް ނަޒާހަތްތެރި މިނިވަން ކޮމިޝަނެއް އެކުލަވާލައިގެން އެކަން ބަލަންޖެހޭ ކަމަށެވެ.
އެމަނިކުފާނުގެ ވެރިކަމުގައި ހުޅުމާލޭ ދެވަނަ ފިޔަވަހި ހިއްކި ދުވަހުން ފެށިގެން ހުޅުމާލެއިން ބިންތައް ދޫކުރަމުން އައިސްފައިވާ ގޮތް މިނިވަން ކޮމިޝަނަކުން ތަހުގީގުކުރުމަށް ކުރީގެ ރައީސުލްޖުމްހޫރިއްޔާ އަބްދުﷲ ޔާމީން ގޮވާލައްވައިފި އެވެ. 
ރޭ އޮތް ޕީއެންއެފް ޖަލްސާއެއްގައި މިހާރު ފެންމަތިވެގެން އުޅޭ ބިންވެރިޔާ ސްކީމުން ބޭރުން ބަޔަކަށް ގޯތި ދޫކުރި މައްސަލައަށް އަލިއަޅުވައިލައްވައި ދެއްކެވި ވާހަކަފުޅުގައި ރައީސް ޔާމީން ވިދާޅުވީ މިހާރު ކުރިއަށްދާ ތަހުގީގަކީ ރައްޔިތުންގެ ލޮލުގައި އަޅުވާ އަނދުނެއް ކަމަށެވެ. މި މައްސަލައަކީ މިއަދަކު އިއްޔެއަކު ހިނގި ކަމެއް ނޫންކަން ފާހަގަކުރައްވަމުން ޔާމީން ވިދާޅުވީ މިއީ އެތައް ޒަމާނަކަށް ދިގުލައިގެން ގޮސްފައިވާކަމެއް ކަމަށާއި، އެކަން ހިނގަމުން އައިކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް އެނގިވަޑައިގަންނަވާނެ ކަމަށެވެ. 
އެޗްޑީސީގެ އެމްޑީ އިބްރާހީމް ފަޒުލް ރަޝީދަށް ކޮރަޕްޝަންގެ ތުހުމަތުކުރައްވަައި އެ ކުންފުނީގެ ކުރީގެ ޗެއާމަން އަހްމަދު ޒުހޫރު ފާއިތުވި ޖުލައި މަހު ރައީސް މުއިއްޒަށް ފޮނުއްވި ސިޓީފުޅެއް އިއްޔެ މީޑިޔާތަކުންވަނީ ތިލަކޮށްފަ އެވެ. އެ ސިޓީގައި ފަޒުލް ވިޔަފާރިވެރިން އަތުން ގިނަ އަދަދެއްގެ ފައިސާ ނަންގަވާކަމަށާއި، ނުގަވާއިދުން ބިންތައް ދެއްވަމުން ގެންދަވާކަމަށް ތުހުމަތުކުރައްވާފައިވެ އެވެ. 
ރައީސް ޔާމީނު ވިދާޅުވި ގޮތުގައި މިހާރު ފުލުހުން ހިންގަމުންދާ ތަހުގީގަކީ އެ މައްސަލައިގެ ލިޔެކިޔުންތައް ސޯޝަލް މީޑިޔާއަށް ފެންމަތިވެ ގޮތް ހުސްވެވަޑައިގަތުމުން ރައްޔިތުންނަށް ދަޅައެއް ދެެއްކުމަށް ހިންގަވާ ކަމެއް ކަމަަށެވެ. އަދި ފުލުހުންނަށް މި މައްސަލާގައި ރަނގަޅު ތަހުގީގެއް ހިންގޭނެކަމަށް ގަބޫލުނުކުރައްވާ ކަމަށެވެ. 
އެމަނިކުފާނު އިތުރަށް ވިދާޅުވީ ފަޒުލްގެ ކޮރަޕްޝަނުގެ ވާހަކަ ދައްކާތާ އަހަރެއްހައި ދުވަސްވެފައިވާއިރު، އެކަން ރައީސް މުއިއްޒަށް އެނގިވަޑައިނުގެން އޮތުމަކީ މުސްތަހީލު ކަމެއް ކަމަށެވެ. އަދި ރައީސްގެ އިތުރަށް ސަރުކާރުގެ ވަޒީރުންނާއި ރައްޔިތުންގެ މަޖިލީހުގެ މެންބަރުންނަށްވެސް މިކަންކަން އެނގޭނެ ކަމަށް ޔާމީން ވިދާޅުވި އެވެ. 
ތަހުގީގެއް ނަމެއްގައި ފެށި ނަމަވެސް އަދި ފަޒުލްއާއި އެޗްޑީސީގެ ބައެއް ވެރިން ސަސްޕެންޑުކުރި ނަމަވެސް ފަޒުލްއާމެދު ރައީސް މުއިއްޒަށް ފިޔަވަޅެއް ނޭޅުއްވޭނެ ކަމުގައި ޔާމީން ވިދާޅުވި އެވެ. އަދި ފަޒުލްއަކީ ގުރުބާން ކަންބަޅިއެއްކަމުގައި ސިފަކުރައްވަމުން ޔާމީން ވިދާޅުވީ އެކަންބަޅި ގުރުބާން ނުކުރެވޭނެ ކަމަށެވެ. 
"މުއިއްޒަށް މިކަން އެނގިވަޑައިގަންނަވާނީ އިއްޔެއަކު މިއަދަކު ނޫން. ރެޔަކު ނޫން އެނގޭނީ. ވަރަށް ކުރީއްސުރެ މިވާހަކަ ދައްކާތާ އެތައް ޒަމާނެއް، ފަޒުލްގެ ކޮރަޕްޝަނުގެ ވާހަކަދައްކާތާ ގާތްގަނޑަކަށް އަހަރެއް މިވީ. އަނެއްކާ މުއިއްޒު ކައިރީގަ ތިތިބަ ވަޒީރުންނާއި މަަޖިލިސް މެންބަރުންނަށްވެސް މިކަން އެނގޭ. އެކަމަކު އެއްވެސް ފިޔަވަޅެއް ނާޅައި އަޅައިނުލާ އެދިޔައީ،" ޔާމީން ވިދާޅުވި އެވެ. 
އިތުރަށް ރައީސް ޔާމީނު ވިދާޅުވީ ބިމުގެ ކޮރަޕްޝަނަކީ ކުރިއްސުރެ ހިނގަމުން އަންނަ ކަމެއް ކަމަށެވެ. އެގޮތުން ނިމުނު އިބްރާހީމް މުހައްމަދު ސޯލިހުގެ ސަރުކާރުގައިވެސް އަދި އޭގެ ކުރިންވެސް ހިނގާފައި އޮތް ކަމެއް ކަމަށް ވިދާޅުވެ ޔާމީން ހުށަހެޅުއްވީ ބިމާ ގުޅޭ ކޮރަޕްޝަނުގެ މައްސަލަތައް ވަކި މިނިވަން ކޮމިޝަނެއް މެދުވެރިކޮށް ތަހުގީގުކުރުމަށެވެ. 
އެގޮތުން އެމަނިކުފާނުގެ ވެރިކަމުގައި ހުޅުމާލޭ ދެވަނަ ފިޔަވަހި ހިއްކި ދުވަހުން ފެށިގެން އަދި ބިން ދޫކުރަން ފެށީއްސުރެ ކަންކަަން ހިނގާފައި ހުރި ގޮތް ބަލަންޖެހޭކަން ފާހަަގަކުރައްވަމުން ޔާމީން ވިދާޅުވީ، އެމަނިކުފާނުގެ ވެރިކަމުގައި އެމަނިކުފާނަށް އެނގިވަޑައިނުގެން އެމަނިކުފާނުގެ ނަންފުޅު ބޭނުންކޮށްގެން އެއިރު ޕާޓީގެ އިސްވެރިންގެ ގޮތުގައި ތިއްބެވި ބައެއް ބޭފުޅުން ހުޅުމާލެއިން ބިން ހޯދައިގެން ބޮޑެތި ވިޔަފާރިވެރިންނަށް ބިންތައް ވިއްކައިގެން މަންފާ ހޯދާފައިވާ ކަމަށެވެ. 
"އެހެންވީމަ މިހުރިހާ މައްސަލައެއް ބެލެންވީ. ވަކި ސަރުކާރެއްގެ މައްސަލައެއް ނޫން ބެލެންވީ. ބިން ހިކުނު ދުވަހުން ފެށިގެން މި ހުޅުމާލޭގެ ބިމުން ފޮތި ކަފާފައި ދިނީ. ރައީސް ޔާމީނުގެ ސަރުކާރުގައި ހިނގާފަ ހުރި ކަންތައް ބަލަންވީ ސޯލިހު ސަރުކާރުގަ ހިނގާފައި ހުރި ކަންތައް ބަލަންވީ. މިހާރު ހިނގަމުންދާ ކަންކަން ބަލަންވީ،" ޔާމީނު ވިދާޅުވި އެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ