ޖަރުމަނު ބުންޑެސްލީގާގެ ބޮރޫޝިއާ ޑޯޓްމުންޑްއަށް ކުޅެމުންދިޔަ ފޯވަޑް ޑޮންޔެލް މާލެން އިންގްލިޝް ޕްރިމިއާ ލީގުގެ އެސްޓަން ވިލާއަށް ސޮއިކޮށްފިއެވެ. އުމުރުން 25 އަހަރުގެ މާލެން ވިލާއަށް ސޮއިކޮށްފައިވަނީ 23 މިލިއަން ޔޫރޯގެ އަގަކަށެވެ. އަދި އެހެން ކަންތައްތަކަށް ބެލުމަށްފަހު މިއަދަދު އިތުރު ތިން މިލިއަން ޔޫރޯ އިތުރު ވެގެންދިއުމަކީވެސް ގާތް ކަމެކެވެ. ނަމަވެސް މާލެން ވިލާއަށް ސޮއިކުރި އަދަދާއި އޭނާ އެ ޓީމަށް ސޮއި ކުރީ ކިހާ މުއްދަތަކަށް ކަމެއް ވިލާއިން ޔަގީން ކޮށްދީފައެއް ނުވެއެވެ. ނެދަލަންޑްސްގެ ބައިނަލްއަޤްވާމީ ކުޅުންތެރިއެއް ކަމަށްވާ މާލެން ވަނީ މިދިޔަ ސީޒަންގައި ޑޯޓްމުންޑަށް 13 ލަނޑު ކާމިޔާބު ކޮށްދީފައެވެ. އަދި އެ ޓީމު ޗެމްޕިއަންސް ލީގުގެ ފައިނަލަށް ގެންދިއުމުގައިވެސް މާލެން ވަނީ މުހިންމު ދައުރެއް އަދާކޮށްފައެވެ. ވިލާއިން މިސީޒަންގައި ޗެމްޕިއަންސް ލީގުގައި ރަނގަޅު ކުޅުމެއް ދައްކަމުން ދިއުމާއެކު މިސީޒަންގެ ފަހު ބައިގައި އެ ޓީމު ޗެމްޕިއަންސް ލީގުގައި އިތުރަށް ކުރިއަށް ދިއުމުގައި މާލެންއަށް މުހިންމު ދައުރެއް އަދާކުރެވިދާނެކަމަށް ބެލެވެއެވެ. މާލެން ވަނީ ނެދަލަންޑްސް ޤައުމީ ޓީމަށް 41 މެޗު ކުޅެދީ ނުވަ ލަނޑު ޖަހައިދީފައެވެ. އަދި އެންމެ ފަހުން ބޭއްވި ޔޫރޯ 2024 ގައި ވާދަކުރި ނެދަލަންޑްސް ޓީމުގައި ހިމެނިފައެވެ. ޑޯޓްމުންޑްގެ ސްޕޯޓިން ޑިރެކްޓާ ސެބަސްޓިއަން ކޭލް ވަނީ މާލެން އެ ޓީމަށް ކޮށްދިން ހިދުމަތަށް ޝުކުރު އަދާކޮށްފައެވެ. އަދި މާލެން ވަނީ ޑޯޓްމުންޑްގެ ރީނދުލާއި ކަޅުގެ ޖާޒީގައި ފާހަގަ ކޮށްލެވޭ މޮޅު ކުޅުމެއް ދައްކާ މުހިންމު ލަނޑުތަކެއްވެސް އެ ޓީމަށް ކާމިޔާބު ކޮށްދީފައިކަން އޭނާ ފާހަގަ ކުރިއެވެ.