މާލޭގައި ހުންނަ، ވިލިމާލެ ފެރީ ޓާމިނަލް ކައިރިއަށް ވެއްޓިފައި އޮތް ވޮލެޓެއް ވަގަށް ނެގުމުގެ ތުހުމަތުގައި ހޯދާ މީހެއްގެ ވީޑިއޯ ފުލުހުން މިއަދު އާންމުކޮށްފިއެވެ. ފުލުހުންގެ އިދާރާއިން ހާމަކޮށްފައިވާ ގޮތުގައި، މި މައްސަލައަކީ ވިލިމާލެ ފެރީ ޓާމިނަލް ސަރަހައްދަށް ވެއްޓިފައި އޮތް ވޮލެޓެއް ގެއްލުނު މައްސަލައެކެވެ. އެ ސަރަހައްދުގެ ސީސީޓީވީ ފޫޓޭޖްތައް ބެލިއިރު، އެ ވޮލެޓް ނަގާފައިވަނީ ކާކުކަން މިހާތަނަށް ދެނެގަނެވިފައި ނުވާ ކަމަށް ފުލުހުން ބުނެއެވެ. https://x.com/PoliceMv/status/2046163126320812225 ވޮލެޓު ނެގި ކަމަށް ތުހުމަތުވާ މީހާގެ ވީޑިއޯ ހިއްސާކޮށް އެ މުއައްސަސާއިން ވަނީ އޭނާ ހޯދުމަށް އާންމުންގެ އެހީއަށް އެދިފައެވެ. އެގޮތުން ވީޑިއޯއިން ފެންނަ މީހާއާ ބެހޭ އެއްވެސް މަޢުލޫމާތެއް ލިބިފައިވާނަމަ މާފަންނު ޕޮލިސް އިންވެސްޓިގޭޝަން ނަންބަރު 9660183 އަށް ގުޅައި އެ މަޢުލޫމާތެއް ހިއްސާކުރުމަށް ފުލުހުން ވަނީ އެދިފައެވެ. މިފަދަ މައްސަލަތަކުގައި ތުހުމަތުކުރެވޭ މީހުން ހޯދުމަށް ފުލުހުން އާންމުކޮށް ސީސީޓީވީ ފޫޓޭޖްތައް އާންމުކުރާއިރު، އާންމުންގެ ފަރާތުން ލިބޭ އެއްބާރުލުމަކީ މިފަދަ މައްސަލަތައް ހައްލުކުރުމަށް ލިބޭ ވަރަށް ބޮޑު އެހީތެރިކަމެއްކަން ފުލުހުން ފާހަގަކުރެއެވެ.